گرووپا عەسائب ئەھل ئەل-حەق بریارا دانینا چەکێن خوە دا
گرووپا چەکدار، عەسائب ئەھل ئەل-حەق، کو قهیس خەزعەلی سەرۆکاتیا وێ دکە راگھاند، وان بریار دایە ھەموو چەکێن خوە رادەستی دەولەتێ بکن و ھێزێن وان بکەڤن بن فەرمانداریا گشتییا ھێزێن چەکدارێن ئیراقێ.
گرووپا عەسائب ئەھل ئەل-حەق ئیرۆ 2ێ خزیزانا 2026ان، د داخویانیەکێ دە گوھەرینەکە مەزن د ستراتەژیا خوەیا سەربازی دە راگھاند. گرووپێ دیار کر کو ئەڤ بریار وەکی بەرسڤەکێ ژ بۆ داخوازێن “مەرجەعیەتا بلند یا ئۆلی” و د چارچۆڤەیا ھەلوەستا نشتمانییا چارچۆڤەیا ھەڤاھەنگیێ دە ھاتیە گرتن.
د داخویانیێ دە ھات دەستنیشانکرن، سەرکردایەتیا عەسائب ئەھل ئەل-حەق بریار دایە کو ھەموو پەیوەندیێن خوەیێن سەربازی ب دەستەیا حەشدا شەعبی رە ببرە و چەکێن خوە تەنێ د بن دەستھلاتا دەولەتێ دە بھێلە. ئەڤ گاڤ وەکی جیبجیکرنا سۆزێن بەرێ یێن ئەمیندارێ گشتییێ گرووپێ، قهیس خەزعەلی، تێ دیتن.
ژ بۆ جیبجیکرنا ڤێ بریارێ، گرووپێ کۆمیتەیەکە ناڤەندی ب سەرۆکاتیا حەجی جەواد تلێباوی ئاڤا کر. ئەڤ کۆمیتە دێ ڤان سێ ئەرکێن سەرەکە ب جھ بینە:
ئامادەکرنا لیستەیا ناڤێن ھەموو چەکداران.
سەرژمێریکرنا ھەموو چەک، ئاموور و پێدڤیێن لۆژیستیکی.
رێکخستنا پرۆسەیا گرێدانا ڤان ھێزان ب فەرمانداریا گشتییا ھێزێن چەکدارێن ئیراقێ ڤە، ل گۆری یاسایێن دەولەتێ.
ھەڤدەم لگەل ڤێ بریارێ، گرووپا چەکدارییا ب ناڤێ “اصحاب الكهف” د داخویانیەکێ دە ئەڤ پێنگاڤ رەد کر”اصحاب الكهف ئیدیعایێن کو دبێژن “مەرجەعیەتا بلند پشتگریا رادەستکرنا چەکان دکە” وەکی گۆتنێن پووچ و بەتال ب ناڤ کر و راگھاند، ئەو داخوازێن سیاسی یێن ژ بۆ رادەستکرنا چەکان قەبوول ناکن.
ئەڤ گەشەدانا نوو ل ئیراقێ وەکی دەستپێکا قۆناغەکە نوو یا سینۆردارکرنا چەکان د دەستێ دەولەتێ دە تێ نرخاندن، کو دبە باندۆرەکە مەزن ل سەر ئارامیا سیاسی و ئەولەھیا وەلات بکە.
