دەم پارتی داخوازا قانوونا “دانانا چەکان” ژ پارلامەنێ ترکیێ دکە
د حەرکینا سیاسەتا ترکیەیێ دە پێنگاڤەکە نوویا قانوونی تێ نیقاشکرن. جیگرا سەرۆکا فراکسیۆنا پارتیا وەکھەڤی و دەمۆکراسیا گەلان (دەم پارتی) گولستان کلچ کۆچیگت داخویاند کو؛ دڤێت پارلامەنا ترکیەیێ قانوونەکە چارچۆڤەیی ژ بۆ کەسێن چەکان دادنن دەرخینە دا کو نەخشەرێیا ڤەگەرا وان یا بۆ ناڤ ژیانا سیاسی و جڤاکی ب زەلالی بێ دیارکرن.
کۆچیگت ئیرۆ چارشەمێ (3یی خزیرانا 2026ێ) بال کشاند سەر راپۆرتا کۆمیسیۆنێ و دەستنیشان کر کو دەرخستنا ڤێ قانوونێ پر دەرەنگ مایە و وەختەکی زێدە ھاتیە ونداکرن. ب گۆتنا کۆچیگت، ژ بۆ کو ئەڤ پرس ب لەز بێ چارەسەرکرن، دڤێت پارلامەن د وەرزێ ھاڤینێ دە ژی بێ ناڤبەر خەباتێن خوە ل سەر ڤێ پرسێ بمەشینە.
د داخویانیێ دە ھات تەکەزکرن کو دڤێت د بنگەھا ڤێ قانوونێ دە بەرسڤا پرسێن گرینگ ھەبە: ئەو کەسێن کو چەکێن خوە داتینن دێ ب چ ئاوایی تەڤلی ژیانا جڤاکی و سیاسی ببن و سیستەما دادوەریێ دێ چاوا سەرەدەریێ لگەل وان بکە.
کۆچیگت بال کشاند سەر رۆژەڤا ھەری گەرم و ب بیر خست کو د 11ێ تیرمەھا بێ دە، سالەک ب سەر دانانا چەکان یا 30 ئەندامێن پەکەکێ رە دەرباس دبە و ئەڤ کەس ھین ژی ڤەنەگەریانە. ل سەر پێنگاڤێن پارتیان، وێ ئاشکەرە کر کو ئاک پارتیێ ھەتا نھا چ رەشنڤیسەک پێشکێش نەکریە، لێ رەشنڤیسا دەم پارتیێ ئامادەیە و ئەڤ مژار لگەل عەبدوللا ئۆجالان ژی ھاتیە نیقاشکرن.
ل ئالیێ دن، ل گۆری ئاگاھیێن کو ژ پشتپەردەیا مەدیایا ترکیەیێ ھاتنە گرتن، پارتیا داد و پێشخستنێ (ئاک پارتی) ژی ل سەر پرۆژەقانوونەکە ژ 9 خالان پێک تێ دخەبتە. تێ چاڤگەرێکرن کو ئەڤ پرۆژەیا ئاک پارتیێ ب تایبەتی ل سەر دیارکرنا چارەنووس و ستاتوویا قانوونی یا وان کەسان بە یێن کو چەکێن خوە داتینن و ڤەدگەرن ترکیەیێ.
