دیار دێرسم و بێرێزییا ل ھەمبەر ئالا رەنگین
بوویەرێن ل کۆنسێرتا سترانبێژ دیار دێرسم یا ل ستوتتگارتێ بوونه رۆژەڤا مەدیایێ. د دەما کۆنسێرتێ دا ئالایەکێ کوردستانێ ل سەر ملێ دیار دێرسم ھاتە دانان. پشتره پێلا نیقاشان دەست پێ کر.
کۆمەک ژ جوانێن ژ رۆژئاڤا چوون و ئالایەکێ کوردستانێ ل سەر ملێ دیار دانان. پشترە رایەدارەکێ ئەلمان هاته سهر ستێجێ و ئالا ل سەر ملێ وی راكر. بەری کو ئهو رایهدارێ ئەلمان نێزیكی دیار ببیت، دیاری ملێ خوە درێژی وی کر کو بهێت ئالای راكهت. پشترە د ناڤبەرا كارمهندێن وێ هۆلێ و جوانێن کوردپەروەر دا نیقاشەک دەرکەت.
مە دەرس دا ڤان کوردێن نەتەوەپەرەست یێن پاشڤەروو!!
د ئەنجامێ دا، بوویەر د مەدیایێ دا ھاتە راگھاندن و د ناڤ کوردان دا بوو مژارەکا سەرەکی. گاڤا کو بوویەرێ بالا خەلکێ كێشای، دیار دێرسم و ھونەرمەندێن پهكهكێ ژ بۆ پاراستنا دیار سەفەربەر بوون. گەر مەدیایێ ئەو نەگۆتبا، یێن کو دیار دپاراستن دا د ناڤ خوە دا بێژن، مە دەرس دا ڤان کوردێن نەتەوەپەرەست یێن پاشڤەروو. لێ گاڤا کو بوویەر د مەدیایێ دا ھاتە راگھاندن و كارڤهدان ژ کوردان ل سهر دهركهتن، رەوش گوھەری. ژ بەر کو، د داویێ دا، دیار سترانان دبێژیت و ژ ڤی كاری داھاتیەکێ گرنگ، ھەتا پر باش، قازانج دکەت. دیار خودان ھن شۆپینەرانە، ب تایبەتی ل باشوورێ کوردستانێ. بێرێزییا دیار بۆ ئالایێ رەنگین دێ زیانێ گههینیته دارایی و ھەم ژی ناڤ و دەنگێ وی. وەکی دن، سترانێن دیار ژ بۆ پهكهكێ ئاموورەکێ باشێ پرۆپاگاندایێ یە. پهكهكه دیاری دئینیته کۆنسێرتێن قەندیلی ل باشوور، ب تایبەتی ژ بۆ كێشانا جهماوهرێ باشوور. ئەو كارتێكرنێ ل جوانان دکەت. ژ بەر ڤێ یەکێ، ئەو ھەمی ھەول ددن کو ناڤ و دەنگێ دیاری زیندی بھێلن.
ل گۆری دیار و ئاپۆچییان گهنجێن ئالا بلند كرین تێكدهرن
دیار و دەردۆرا وی یا پهكهكێ، ب گۆتنا ” خوە پاراستنا ھەره باش ئێریشە”، ھەر کەس خستنە بەر رەخنەیان، ھەتا ھەقارەتێ ژی دکهن. ل گۆری دیار و ئاپۆچییان؛ ئهو سێ جوانێن ژ بهر كو حهز ژ ئالای دكهن و ئالا ئیناینه ناڤ هۆلێ تێكدهرن، کوردێن د ھۆلێ دا کو ھەول دان مایتێكرنێ بکهن ژی وهكی تێكدهرانه، دلبخوین دارا ژ بەر راگھاندنا ڤێ نووچەیێ وەکی تێكدهرانه، کهنالێن تەلەڤیزیۆنێ یێن کو دیمەن وەشاندنین وەکە خزمەتکارێن دژمنان، و کوردێن کو ل سەر مەدیایا جڤاکی رەخنە ژی کرین ب دەردۆرێن “گرێدایی دەولەتێ” پێناسە دکهن. ب کورتی، ئاپۆچی دبێژن ژ بلی دیاری ھەر کەس توهمهتباره، و پیلانهك و تێكدانهك ل دژی دیاری ھەیە.
نهجارا یهكهمه دیار دێرسم ئالایێ كوردستانێ ل عهردی ددهت
تەنێ بهری چەند مەھهكان، د مەھا سباتێ دا، دیار ل سلێمانیێ ئالایێ کو ل سەر ملێ وی ھاتبوو دانان هاڤێته عەردی. دەما کو كارڤهدان نیشانی وی ھاتینه دان، ئەو دەرکەت و گۆت، “نا، نە وسا بوو، من ئالا نەدیت.” و مخابن، ھەمی دەزگەھێن مەدیایێ یێن ل باشوورێ کوردستانێ، تایبهت رووداو، رێز بوون دا کو داخویانیا دیار بەلاڤ بکهن و كارڤهدانا کوردان بێواتە بکهن.
نھا، پرس ئەڤەیه گەلۆ “چما دیار دێرسم، و نە کەسەکێ دی، ب ئالایێ کوردستانێ دبیته رۆژەڤ؟“
دڤێت کەس عاجز نهبیت، ل جھێ کو ئاگر نهبیت دووكێل دەرناکەڤیت، کەس دیاری تۆھمەتبار ناکەت. تەنێ ھەستێن راستین یێن دیاری د کریارێن وی دا خویا دبن، و مرۆڤ فەرق دکهن. دووڤ را، ژ بۆ کو ژ كارڤهدانێن دی دوور بکەڤیت، ئەو ھەول ددەت کو کریارێن خوە ڤەشێریت. گەر دیاری ب راستی رێز ل ئالایێ رەنگین گرتبا و ژێ حەز كربا، ئهو دا دهست ژ لێدانا سازێ بهردهت دەما کو وێ ژنا بەرپرسیار ئالا ژ سەر ملی وی راكری، دا مایتێكرنێ د رهوشێ دا كهت و ل کێلەکا جوانێن کورد راوهستیت. لێ ئەو چ دکەت؟ ئەو ملێ خوە بەر ب ژنا ئەرکدار ڤە دبهت، و دەما کو رەوش گوڕ دبیت، رادبیت و ل جوانان دقێریت، “ھوون دخوازن چ بکهن؟” پاشی، وهختێ تێگههشتی کو ئەو زێدە چوویە، دبێژیت، “ھەر کەسهكی ئالایێ خوە ھەیە… هتد.”
دیار دێرسم ئالایێ كوردستانێ ب وێنهیێ ئۆجالان وهكههڤ دكهت
بالا خوە بدهنێ کو ئەو نەحەقی و بێرێزیێ ل ئالایێ کوردستانێ د کۆنسێرتێ دا نابینیت؛ ئەو وەک کو ههلگرتنا وی ئالای ب تەڤاھی نۆرمالە، دئاخڤیت، ئەو ئالای ناپارێزیت، ئەو خوە دپارێزیت. و دیسا، د ئاخافتنا خوە دا، ئەو ئالایێ کوردستانێ ب وێنەیێ ئۆجالانی وەکھەڤ دکەت، دبێژیت کو وێنەیێ ئۆجالان ژی ھاتیە نیشاندان. ئەو ئالایێ کوردستانێ وەکی ئالایێ “باشوورێ کوردستانێ” پێناسە دکەت. ئەو نابێژیت ئالایێ کوردستان. وەکی دن، ئەو کەسێن کو ئالا نیشان داین وەکی “تێكدهر” ب ناڤ دکەت. ب قاسی کو ئەم دزانین، ھەتا نھا، ئەو کەسێن کو نیشاندانا ئالایێ کوردستانێ وەک تێكدان حهساب دكهن نهژادپەرەستێن ترک و ئەندامێن مهههپێ بوون. ما دیار دێرسم ئەندامەکی مهههپێ یه داکو ئەو کەسێن کو ئالایێ کوردستانێ نیشان ددهن و بلند دکهن وان وەکی تێكدهر حهساب بكهت؟ خەتا ئاپۆچی و خەتا مهههپێ نوکە ل سەر یەک رێبازێ تەڤدگەرن. ئەو ژی نههێلانا نرخێن پیرۆزێن کووردستانی نە.
نھا ئهو د سهر وێ بێرێزیێ را داخواز دكهت لێبۆرین ژ وی بهێته خواستن و دبێژیت: “ئەز 40 سالن موزیکێ چێدکهم، ئەز ناھێلم کەس کەدامن بخوت”.
دیار دێرسم پێشمهرگه ژی ب جهحش ناڤكربوون
دبێژن “ئارشیڤ ناھێن ژ بیر کرن،” بلا ئەم بیرا دیار بینین کو بهری 5 سالان، د دەربارێ شەر و ئەردنیگاریێ دا کو وی قەت ژێ فێم نهكربوو، وی گۆتبوو، “پێشمەرگە کەرێن ترکیێ نە، ئەو دگهل وان تەڤلی ئۆپەراسیۆنا دبن”، دیار، تەڤگەرا 100 سالی یا پێشمەرگەیان وەکی “جەحش-کەر” ب ناڤ کر، تە بێرێزی و سڤکاتی ب نرخێن کوردان کر، تە درەو کرن، تە ب زانەبوون تۆڤێ دژمناتیێ د ناڤ کوردان دا چاند، ما تە ژ پێشمەرگەیان لێبۆرین خواست؟
باخچەلی چ قاس ژ ئالایێ رەنگین حهز دکەت دیار دێرسم ژی ئەو قاس ژێ حهز دکەت
گەر مەدیا، تایبهت رووداو، کو دیار و پهكهكه ھەول ددن زەختێ لێ بکهن دا کو لێبۆرینێ بخوازن و خەلەتیێن خوە پاقژ بکهن، بکەڤنه د ناڤ یاریێن وان و دیاری بێگونەھ بکهن، دبیت کو ئەو ژ دیاری ژی خرابتر رەزیل ببن. بلا دیار ناڤێ خوە ب پراكتیکی پاقژ بکەت، گەر ئەو بخوازیت. نە ھەوجەیە کو دلبخوین یان نووچەگههانێن دی مەلاقیێ بوو وی بکهن و ناڤێ وی پاقژ بکهن.
ژ بۆ مە، ئەڤ یەک ئاشكهرایه: دەولەت باخچەلی چ قاس ژ ئالایێ رەنگین حهز دکەت دیار دێرسم ژی ئەو قاس ژێ حهز دکەت.
