رێبەرێ بلندێ ئیرانێ ب رەشنڤیسا رێکەفتنا ل گەل ئامەریکایێ رازی بوویە، لێ سوپایێ پاسداران ل دژی دەردکەڤە
ل گۆری نووچەیەکە رۆژنامەیا ناڤدارا ئامەریکی نیو یۆرک تایمس، د پەیوەندیێن ناڤبەرا واشنگتۆن و تەھرانێ دە گەشەدانەکە گرینگا دیپلۆماتیک روو دایە. رۆژنامەیێ ژ زارێ بەرپرسەکی پایەبەندێ ئامەریکی ڤەگوھەستیە کو رێبەرێ کۆمارا ئیسلامی یا ئیرانێ، موجتەبا خامەنەیی، ب وێ رەشنڤیسا رێکەفتنا دەستپێکێ یا کو د ئەنجاما دانوستاندنان دە ل گەل ئامەریکایێ ھاتیە ئامادەکرن، رازی بوویە. ئەڤ گاڤا خامەنەیی، تەڤی کو ھەتا نھا ب ئاوایەکی فەرمی و ئەشکەرە نەھاتیە راگھاندن ژی، د ناڤا جڤاتێن دیپلۆماتیک دە وەکی “پێنگاڤەکە ئەرێنی و ستراتەژیک” تێ نرخاندن.
لێبەلێ، سینۆرێن ڤێ رێکەفتنا دەستپێکێ و ئەنجامێن وێ یێن ئابۆری گەلەکی رێنیشاندەرن. ھەمان بەرپرسێ ئامەریکی تەکەز کریە کو تەنێ ب ئیمزەکرنا “یاداشتا ھەڤتێگەھشتنێ”، چ سوودەکە دارایی یان ژی ئابۆری یا بلەز ناگھیژە تەھرانێ. ھات راگھاندن کو راکرنا دۆرپێچێن ئابۆری و پەیداکرنا پشتەڤانیا دارایی تەنێ ب جیبجیکرنا مەرجێن گران یێن پەیمانێ ڤە گرێدایییە. د ناڤ ڤان مەرجێن سەرەکە دە، رادەستکرنا یورانیوما دەولەمەندکری و ھلوەشاندنا بەشەک ژ سازیێن ئەتۆمی یێن ئیرانێ جیھ دگرن.
ل ئالیێ دن، ئەڤ ھەولدانا دیپلۆماتیک رووبێروویی ئاستەنگیەکە مەزنا ناڤخوەیی یا ئیرانێ دبە. رۆژنامەیا واڵ ستریت جۆرنال بال کشاندیە سەر ناکۆکیێن کوور یێن د ناڤبەرا ئالیێن سیاسی و سەربازی یێن ل تەھرانێ. ل گۆری راپۆرتا رۆژنامەیێ، ناڤەندێن ئەولەھی و سەربازی یێن سەر ب سوپایێ پاسدارێن ئیرانێ ھێژ رازیبوونا خوە ل سەر ڤێ رێکەفتنێ نیشان نەدانە. ئەڤ ھەلوەستا ھشک یا سوپایێ پاسداران د ئاستا ناڤدەولەتی دە وەکی ئاستەنگیا ھەری مەزن یا ل پێشیا سەرکەفتنا پێڤاژۆیا ئاشتیێ تێ بناڤکرن.
ل سەر قۆناغێن جیبجیکرنا ڤێ دیتنا نوو، وەزیرێ دەرڤەیێ ئیرانێ عەبباس ئیراقچی داخویانیەک دا و نەخشەرێیا تەھرانێ ئەشکەرە کر. ئیراقچی دیار کر کو پێڤاژۆیا لھەڤکرنێ ژ دو قۆناغێن سەرەکە پێک تێ؛ قۆناغا یەکەم ئیمزەکرنا یاددشتا لێکتێگەھشتنێ د ناڤبەرا تەھران و واشنگتۆنێ دەیە، و قۆناغا دویەم ژی گھیشتنا رێکەفتنەکا ئاشتیێ یا ماییندە و چارەسەرکرنا ھەموو دۆزێن گرتی یێن د ناڤبەرا ھەر دو وەلاتان دەیە.
وەزیرێ دەرڤەیێ ئیرانێ د داویا داخویانیا خوە دە پەیامەکە خورت دا و دەستنیشان کر کو ئیران ژ پێگەھەکە بھێز و خوەدی ئیرادەیەکە سیاسی ھاتیە سەر مێزێ گۆتوبێژان. ئیراقچی ھەر وھا دا زانین کو پێڤاژۆ هێژ بەردەوامە و هێژ ژی فەرسەند ھەیە کو ھندەک گوھەرتنێن تەکنیکی و سیاسی د نڤیسا یادداشتا لێکتێگەھشتنێ دە وەرن کرن.
