دەم پارتی: ژ بۆ ئاشتیا بەردەوام پێدڤی ب گارانتیێن یاسایی و یاسایەکا چارچۆڤەیی ھەیە
مەجلسا پارتیێ یا پارتیا وەکھەڤی و دەمۆکراسیا گەلان (دەم پارتی) بەیاننامەیا جڤینا خوە یا 11-12ێ تیرمەھێ ژ بۆ رایا گشتی ئاشکەرە کر. د بەیاننامەیێ دە بانگ ل حکوومەتێ ھات کرن کو ژ بۆ ئاڤاکرنا ئاشتیەکا بەردەوام بەرپرسیاریێن خوەیێن حقووقی ب جھ بینە و ژ بۆ پێڤاژۆیێ “قانوونەکا چارچۆڤەیی” ئامادە بکە.
مەجلسا پارتیێ یا دەم پارتیێ، پشتی جڤینەکا دو رۆژان کو ل ناڤەندا گشتی یا پارتیێ ل دار کەت، ئەنجامنامەیا خوە یا داوی پارڤە کر. د داخویانیێ دە بال ھاتە کشاندن سەر سالڤەگەرا یەکەمین یا بریارا بداویبوونا تێکۆشینا چەکداری (11ێ تیرمەھا 2025ێ) و ھاتە دەستنیشانکرن کو تەڤی دەرباسبوونا سالەکێ ژی، دەستھلاتداریا سیاسی د وارێ قانوونی و دەمۆکراتیک دە گاڤێن پێویست نەهاڤێتنە.
د بەیاننامەیا کو ژ ئالیێ پارتیێ ڤە ھاتە وەشاندن دە، گرینگیا ئاڤاکرنا زەمنەکا یاسایی ھاتە دەستنیشانکرن و وھا ھاتە گۆتن:
“نەبوونا گارانتیێن قانوونی و پاشخستنا رێزکنامەیێن دەمۆکراتیک، باوەریا جڤاکێ یا ب پێڤاژۆیێ خراب دکەت. ئاڤاکرنا ئاشتیەکا ماییندە نە تەنێ ب بێدەنگکرنا چەکان و راوەستاندنا پەڤچوونان، د ھەمان دەمێ دە ب ئاڤاکرنا سیستەمەکێ یاسایی و دەمۆکراتیک یا بھێز ممکونە.”
دەم پارتیێ د ڤێ چارچۆڤەیێ دە داخواز کر کو ژ بۆ چارەسەرکرنا پرسگرێکێ “قانوونەکا چارچۆڤەیی”یا بەرفرەھ و تەڤگر وەرە ئامادەکرن. ل گۆرا داخویانیێ، ئەڤ قانوون دڤێت مژارێن سەرەکی یێن مینا: “ڤەگەرا ئەولە و بروومەت یا کۆچبەر و پەنابەران، ئاسانکرنا بەشداریا سیاسی یا ھەموو ئالیان، گارانتیکرنا ماف و ئازادیێن بنگەھین ل بەر خوە بدە.
مژارەکا دن یا سەرەکی یا بەیاننامەیێ رەوشا رێبەرێ پەکەکێ عەبدوللاھ ئۆجالان و تەجریدا ل سەر وی بوو. دەم پارتیێ دیار کر کو تەجریدا کو نێزیکی 50 رۆژانە بەردەوام دکە ل دژی جەوھەرێ پێڤاژۆیێیە و وھا دۆماند:
“ژ بۆ کو پێڤاژۆیا ئاشتیێ پێشڤە بچە و ئەنجام بدە، پر گرینگە کو شەرت و مەرجێن خەبات و ژیانا ئازاد دەملدەست بهێن ئافراندن دا کو برێز عەبدوللاھ ئۆجالان بکاربە ب باندۆر وەکی برێڤەبەرێ دانوستاندنان رۆلێ خوە بلەییزە.”
د دەواما داخویانیێ دە، پارتیێ فکارێن خوەیێن ل سەر رەوشا مافێن مرۆڤان و ئازادیێن سیاسی یێن ل ترکیەیێ ئانین زمان. سیاسەتا دانانا قەیوومان ل سەر شارەداریان، زەختێن ل سەر قۆناغێن سیاسەتا دەمۆکراتیک، بنچاڤکرن و گرتنا رۆژنامەڤان و سیاسەتمەداران وەکە “دەستهەلاتداری” ھاتن پێناسەکرن و ھاتە گۆتن کو ئەڤ نێزیکاتی باوەریا جڤاکێ یا ب دەولەتا یاسایی کێم دکن.
د بەشا داوییا بەیاننامەیێ دە ھاتە راگھاندن کو پارتی نھا د ئامادەکاریا لدارخستنا “کۆنگرەیا مەزن یا ئاسایی یا 5ێ” دەیە. ھاتە دەستنیشانکرن کو ئەڤ کۆنگرە دێ بیتە نووبوونەکا رێخستنی و دینامیکەکا نوو دەتە تێکۆشینا دەمۆکراسی، وەکھەڤی و ئازادیێ یا ل ترکیەیێ.
