د رۆژێن داوی دە، بەرپرسێن پەکەکێ دەربارێ پێڤاژۆیا تەسلیمبوونێ دە داخویانیێن نەرینی ددن.
د داخویانیەکێ دە کو د ئیلۆنێ دە ھاتبوو دایین، جەمیل بایک گۆت، “ئەم ژ بۆ شەرەکی مەزن ئامادە نە.”
د 6ێ جۆتمەھێ دە، مستەفا کاراسو گۆت، “پێڤاژۆیا ئاشتیێ گھیشتیە خالەکا بێچارە؛ چ گاڤێن بەربچاڤ نایێن ئاڤێتن.”
بەسێ ھۆزات گۆت، “ترکیە چ پێنگاڤان ناهاڤێژە؛ ئەگەر رەوش ب ڤی ئاوایی بدۆمە، ئەم ژی دێ نەچار بمینن کو بکەڤین ناڤ نیقاش و نرخاندنێن جودا”…
گەلۆ ب راستی پێڤاژۆ گھیشتیە خالەکا بێچارە، و چ پێنگاڤ نایێن ئاڤێتن؟
بەری ھەر تشتی، دڤێت ئەم بپرسین: پەکەکێ ژ بۆ ھەلوەشاندنا خوە و دانینا چەکان ژ بۆ دەولەتا ترک چ مەرج دانیبوون، کو نھا ئەو ل بەندێیە دەولەتا ترک پێنگاڤا یەکەم باڤێژە؟ عەبدوللاھ ئۆجالان ژخوە د نامەیا خوەیا 25ێ سباتێ دە دیار کربوو کو وی ژ بۆ کوردان تشتەکێ وەکی دەولەت، فەدەراسیۆن، مافێن چاندی یان ژی خوەسەری داخواز نەکریە.
مەرجێ یەکانەیێ ئۆجالان ئەوە کو سەربەست وەرە بەردان و وەرە گارانتیکرن کو کاربە لگەل مەدیایێ باخڤە. رێبەرێن پەکەکێ ژی، قەت بەحسا مافێن دەستووری یێن کوردان یان مژارێن ب ڤی رەنگی ناکن. ئەو ژی دبێژن کو دڤێت ئۆجالان بهێتە بەردان، لێ د راستیێ دە ئەو ھەول ددن کو خوە بێخن ناڤ ھەڤکێشەیێ و ل چارەسەریەکێ دگەرن کو مسۆگەر بکەت ئەو ژی، ‘د چاڤێ گەل دە وەک قەھرەمان بمینن’.
رێبەرێن پەکەکێ ژخوە ب دۆرێ سەردانا ئیمرالیێ دکن دا کو لگەل ئۆجالان بجڤن. ھەر وھا ڤیلایەک ژ بۆ ئۆجالان ھاتیە چێکرن، و تێ گۆتن کو رۆژنامەڤان ژی دێ د دەمەک نێزیک دە ل ور سەردانا وی بکن.
ب گۆتنەکا دن، ھەما ھەما ھەموو شەرتێن کو ئۆجالان خوەستبوون، پێک ھاتنە.
نەخوە، چما سەرۆکێن پەکەکێ داخویانیێن نەرینی ددن؟
ژ بەر کو د ناڤبەرا دەولەتا ترک و پەکەکێ دە رێکەفتنەک ھەیە. ئەو ب ھەڤرێزی تەڤدگەرن. دەولەتا ترک دخوازە کو پەکەکە چەکێن خوە دەینە، لێ ناخوازە ئەڤ یەک پێک وەرە ھەتا کو رەوشا ل ئیرانێ زەلالتر ببە.
ئارمانجا ترکیێ ئەوە کو د ئۆپەراسیۆنەکا مەزن یا ل دژی ئیرانێ دە یان ژی د نیقاشێن دەربارێ کوردان دە ب رێیا ئۆجالان باندۆرێ بکە. دەولەت دێ رێبەریا ئۆجالان بکە؛ ئۆجالان دێ رێبەریا پەکەکێ بکە؛ و پەکەکە دێ رێبەریا پژاکێ بکە؛ و ب ڤی ئاوایی، دەولەتا ترک دێ د پێڤاژۆیا ئیرانێ دە باندۆرێ بکە. پلان ئەڤەیە.
ژ بەر ڤێ سەدەمێ، وسا دخویە کو پەکەکە و دەولەتا ترک ب ھەڤ رە بریار دانە کو پێڤاژۆیێ ھێدی بکن.
وەکی دن، پێڤاژۆ بەر ب پێش ڤە دچە؛ شاندە ھەر مەھ ژ قەندیلێ دچن ئیمرالیێ ژ بۆ ھەڤدیتنان. د ناڤبەرا دەولەتێ و قەندیلێ دە میکانیزمایەکا بەردەوام و سیستەمەکە تەلەفۆنێ یا رۆژانە ھەیە. پەکەکە دکارە ل باکورێ کوردستانێ و ترکیەیێ ھەر جورە چالاکیان پێک بینە کو پەسنێ ئۆجالان و پێڤاژۆیێ ددن. ب گۆتنەکا دن، پێڤاژۆ ل پشت پەردێ ددۆمە.
مەسەلە ب تەنێ ئەوە کو رەوشا ل ئیرانێ زەلالتر ببە.
