پارلامەنتەرا دەم پارتیێ مەرال دانش بەشتاش راگھاند کو د پێڤاژۆیا چارەسەریێ دە خەتمینەکا بەربچاڤ ھەیە و بانگا ئاڤێتنا گاڤێن بەربچاڤ و یاسایی ل حکوومەتا ترکیەیێ کر.
مەرال دانش بەشتاش ژ بۆ مەدیایا فەرمی یا پەکەکێ ئاخڤی و رەوشا داوی یا پێڤاژۆیا چارەسەریێ نرخاند. بەشتاشێ بال کشاند سەر نەهاڤێتنا گاڤێن ژ ئالیێ دەستھلاتێ ڤە و گۆت: “ل گۆری نێرینا من پرسگرێکا بنگەھین ئەوە کو ئیرادەیا سیاسی ناگوھەرە گاڤێن بەربچاڤ و یاسایی. یاسایا چارچۆڤەیێ و راپۆرتا کۆمیتەیا پارلامەنتۆیێ ھەیە لێ د ئاڤاکرنا زەمینا یاسایی دە دەرەنگخستنەکا جدی ھەیە.”
بەشتاشێ دا زانین کو جڤاک بەرسڤێن زەلال ل سەر رەوشا گرتیان، گرتیێن نەخوەش و ڤەگەرا ل وەلات دخوازە و رەخنە ل وێ یەکێ گرت کو پێڤاژۆ ژ بۆ ئینیسیاتیفا بورۆکراسیا ئەولەھیێ تێ ھشتن و پارلامەنتۆ بێدەستھلات تێ ھشتن.
ب بیرخستنا کو بریارێن پارلەمانێ ترکیەیێ دڤێت وەرن بجھانین، بەشتاشێ گۆت: “پرسگرێکا کوردان نە تەنێ پرسگرێکەکا ئەولەھیێ یە. ئەڤ تێکۆشینا ھەبوونێیە، پرسگرێکا ناسنامەیێ، وەلاتیبوونا وەکھەڤ، پەروەردەیا ب زمانێ دایکێ و نوونەراتیا سیاسییە. دەما کو ئەڤ داخواز بێن پاشگوھکرن، مرۆڤ نکارە بەحسا ئاشتیەکا راستەقینە بکە.”
