ئەنجوومەنا نشتمانییا کوردی ل سووریێ (ئه‌نه‌كه‌سێ) دەربارێ ئێریشێن ل دژی مالباتێن کوردێن کو پشتی سالان ژ کۆچبەریێ ڤەگەریانە سەر مال و ملکێن خوە یێن ل گرێ سپی، داخویانیەکە توند بەلاڤ کر و داخواز کر کو تاوانبار بێن دارزاندن و پاراستنا ڤەگەریایان بێ میسۆگەرکرن.
ل گۆری داخویانیا سەکرەتەریا گشتییا ئه‌نه‌كه‌سێ، دوھ 26ێ جۆتمەھێ ھەژمارەک ژ مالباتێن کوردێن کو ڤەگەریانە ھەرێما گرێ سپی و گوندەوارێ وێ، راستی لێدان، ئێریشێن فیزیکی و گەفێن کوشتنێ ھاتنە. دا زانین ژی، ئەڤ گەف و ئێریش گھیشتنە ژن و زارۆکان ژی و وەساییتێن وان ژ ئالیێ کەسێن ئێریشکار ڤە ھاتنە شەوتاندن.
ئەنکسێ دیار کر، ڤەگەرا ڤان مالباتان ب ئاگاھداری و ھەڤاھەنگیا پارێزگاریا رەقایێ، رێڤەبەریا ناڤچەیا گرێ سپی و ھێزێن ئەولەھیێ پێک ھاتبوو. ھەروھا مالباتان ل سەر داخوازا رێڤەبەریا ھەرێمێ ھەموو بەلگە، پێناسە و تاپۆیێن پێویستێن خوەدیتیا خانی و زەڤیێن خوە پێشکێش کربوون، دا کو بکاربن ملکێن خوەیێن دەستەسەرکری وەرگرن.
ئه‌نه‌كه‌سێ بال کشاند سەر وێ یەکێ کو ئەڤ کریار ل گەل وان بنپێکرنێن کو د تەباخا بۆری دە ل دژی مالباتێن ڤەگەریایی یێن ل سەرێ کانیێ قەومین، ئاستەنگیەکە مەترسیدار ل پێشیا پێڤاژۆیا ڤەگەرا دلخوازی، ئەولە و ب روومەتا کۆچبەران چێدکە و دەربەکە گران ل ئاشتیا جڤاکی و ئارامیا ھەرێمێ دخە.
ئه‌نه‌كه‌سێ د داخویانیا خوە دە داخواز ژ حکوومەتا سووریێ و پارێزگارێ رەقایێ کر کو:
– کۆمیتەیەکە فەرمییا لێکۆلینێ پێک بینن، دا کو راستیا بوویەرێ ئاشکەرە ببە و تاوانبار ل گۆری قانوونێ بێن جەزاکرن.
– رێکارێن لەزگین ژ بۆ دابینکرنا ئەولەھیا مالباتێن ڤەگەریایی و پاراستنا ملکێن وان وەرن گرتن.
د ھەمان دەمێ دە، ئه‌نه‌كه‌سێ بکارئانینا بەھانەیا “پەوەندیا ب ھێزێن سووریەیا دەمۆکراتیک (هه‌سه‌دێ)” ژ بۆ ئاستەنگکرن ئان ژی ئێریشکرنا سەر سڤیلێن کورد رەد کر و راگھاند، نابە مافێن سڤیل و مولکیەتێ تەڤلی ناکۆکیێن سیاسی ببن، ھەروھا خەلکێ سڤیل نە بەرپرسێ بریارێن دەستھلاتێن دەڤەرێ نە.
د داویا داخویانیێ دە، بانگ ل خەلکێ ھات کرن کو خوە راگرن، رێ نەدن پرۆڤۆکاسیۆن و ئالۆزیان و پشتا خوە بدن رێکارێن قانوونی. ھەروھا تەکەزی ل سەر بەرپرسیاریا ئالیێن پەیوەندیدارا د وارێ پاراستنا مافێن ھەموو وەلاتیان و پاراستنا ئەولەھیێ دە ھات کرن.
