تەڤگەرا کو ب سالانە ب درووشمێن “سەرھلدان”، “بەرخوەدان” و “سەرکەفتنێ” ل سەر پشت و خوینا جوانێن کورد خوە مەزن کریە، دەما کو رووپەلێن دیرۆکێ و راستیا قادێ تێن ڤەکرن، تێ دیتن کو د بنگەھا خوە دە نەیا بەرخوەدانێ، بەلکو یا “تەسلمبوونێ” یە. ئەڤ راستی ئیرۆ ژ ھەر دەمێ بێتر ل بەر چاڤانە. ئەو کەسێن کو خوە ب سالان وەکی “ئاپۆجی” و پارێزڤانێن مافێن گەلێ کورد ددن ناسکرن، دڤێت ئێدی ب راستیا خوەیا راستەقین وەرن ناسکرن و نیشاندان: ئەو نە تەڤگەرا بەرخوەدانێ، ئەو “تەڤگەرا تەسلیمجیان”ن.
زنجیرا تەسلیمیەتێ ل ھەموو پەرچەیێن کوردستانێ
پەکەکێ د درێژاھیا دیرۆکا خوە دە، ل شوونا کو ئاخ و مافێن گەلێ کورد بپارێزە، ھەر دەر و ھەر دەستکەفتی رادەستی دەولەتێن داگیرکەرێن کوردستانێ کرینە. دەفتەرا ڤێ خیانەتێ و رادەستکرنێ گەلەکی درێژە: باکورێ کوردستانێ ب تەڤاھی و بەشەک ژ باشوورێ کوردستانێ رادەستی ترکیەیێ کرنە؛ رۆژئاڤا رادەستی رەژیما سووریەیێ کریە؛ شنگال و کەرکووک رادەستی ئیراقێ کرینە و نھا ژی دخوازە بەشێ مایی یێ باشوورێ کوردستانێ ب تەمامی تەسلمی رێڤەبەریا بەغدایێ بکە. ھەر وھا ب ھەمان ئاوایی، ئارمانج دکە کو رۆژھلاتێ کوردستانێ ژی ب ھەمان دەردی رە روو ب روو بھێلن و د بن ناڤێ ئەنتەگراسیۆنا دەمۆکراتیک دە رادەستی ئیرانێ بکە.
ژ کینیایێ ھەتا بالافرێ: دیرۆکا تەسلیمیەتێ یا ئۆجالان
ئەڤ مەسەلەیا تەسلیمبوونێ و بێواتەبوونا بەحسکرنا “بەرخوەدانێ” نە تشتەکی نوویە؛ ئەو د ژیان و کەسایەتیا سەرۆکێ ڤێ تەڤگەرێ دە ژ رۆژا ئەول ڤە ھەیە. دەما کو ل کەنیایێ د سالا 1999ێ دە دخوەستن سەرۆکێ پەکەکێ دەستەسەر بکن، وی بێیی کو ب قاسی سەرێ دەرزیێ ل بەر خوە بدە یان فیشەکەکێ ژی بتەقینە، ب رەنگەکی ھەری ھێسان خوە تەسلمی ھێزێن ئەولەھیێ کر. نە تەنێ ئەڤ؛ دەما کو پارێزڤانا وی یا دلسۆز د وێ دەمێ دە ب فکار ژێ رە گۆتبوو: “سەرۆکێ من، دەبانچەیێ بگرە و ل بەر خوە بدە، ئەم نکارن ب ڤی رەنگی تەسلم ببن،” ئۆجالان ب ئاوایەکی کو روومەتا بەرخوەدانێ بنپێ دکە بەرسڤ دابوو و گۆتبوو: “ئەز بەرخوەدانەکە کلاسیک ناکم!”.
ھەلوەستا وی یا د دەما گرتنێ دە نهێنییا ڤێ راستیێ ئەشکەرە دکە. ھەر وھا دەما کو د بالافرێ دە ژ بۆ ترکیەیێ دھات ڤەگوھەستن، بێیی کو زلەهەک ل روویێ وی بکەڤە، ب ترس و ب ئارمانجا خلاسکرنا جانێ خوە ژ نوونەرێن میتێ رە گۆتبوو: “ل من نەخن، دیا من ترکە، ئەز ژ بۆ خزمەتا دەولەتا ترک ئامادە مە.” ئەڤ گۆتن و ھەلوەست نیشان ددن کو ژ رۆژا ئەول ڤە ئارمانج نە پاراستنا دۆزا نەتەوەیی، بەلکی پاراستنا بەرژەوەندیێن شەخسی بوویە.
ئەڤ زنجیرا تەسلیمیەتێ نیشان ددە کو پەکەکە و سەرۆکاتیا وێ نە تەنێ ژ دۆزا نەتەوەیی دوور کەتنە، لێ ب ئەشکەرەیی بێی کو شەرم و فەدی بکن، خیانەتێ ل گەلێ کورد دکن و ڤێ خیانەتێ وەکە وەلاتپارێزی پێشکێشی گەلێ کورد دکن، کەسێن ڤێ یەکێ رەخنە دکن ژی وەکە کرێگرتیێن میتێ ددن ناساندن، د دەمەکی دە کو کەسێ ژ ترکەکی نەتەوپەرەست زێدەتر خزمەتا ترکیەیێ کری و نە تەنێ نێزیکێ میتێ یە، بەلکو میت ب خوە یە ئۆجالانە.
د دیرۆکا ڤێ رێخستنێ دە گەلەک کەس ب ناڤێ “ئیتیرافچیتیێ” ھاتنە تاوانبارکرن و وەکە خاین ھاتنە نیشاندان. لێ بەلێ ئیرۆ دڤێت وەرە زانین کو نە پێویستە مرۆڤ ل کەسێن دن بنێرە دا کو ناڤێ “ئیتیرافچیێ ھەری مەزن” لێ بکە؛ نەدبوو کو ناڤێ کەسێن وەکی شەمدین ساکک وەکە ئیتیرافچیێ مەزن وەرە راگھاندن، ژ بەر کو ئیتیرافچیێ ھەرە مەزن، خاینێ ھەرە مەزن و میمارێ ڤێ تەسلیمیەتا دیرۆکی ئەبدوڵاھ ئۆجالان ب خوە یە.
رێخستنەکا کو ب سالان چاڤکانیێن مرۆڤی و زندی یێن ڤی گەلی ژ بۆ ئارمانجێن غەریب بکار ئانی و د ئەنجامێ دە ھەموو دەستکەفتیێن کوردستانێ ل سەر مێزێن بازرگانیێ پێشکێشی داگیرکەران کرین، ئێدی نکارە ڤێ روویێ خوەیێ گەمار، رەش و نەشرین ڤەشێرە. گەلێ کورد دڤێت ئێدی راستیا ڤێ “تەڤگەرا تەسلمجیان” ببینە و ل ھەمبەری ڤێ سیستەما خیانەتێ ھەلوەستەکە نەتەوەیی، ھشیار و ب روومەت نیشان بدە.
