سەرۆککۆمارێ ترکیەیێ رەجەپ تاییپ ئەردۆگان رەد کر کو پرۆسەیا چەکدانینا پارتیا کارکەرێن کوردستانێ (په‌كه‌كێ) راستی سستی یان ئاستەنگیان ھاتبە و تەکەز کر کو پرۆژەیا وان یا ب ناڤێ “ترکیەیا بێتەرۆر” بەردەوامە و نھا شکەفتێن وێ پارتیێ یێن ل ئالیێ دنێ سینۆر تێن ڤالاکرن.
ئەردۆگان د دەما ڤەگەرا خوەیا ژ سەردانا فەرمی یا ژ باژارێ سێئۆلێ، پایتەختا کۆرەیا باشوور، د ناڤا فرۆکەیێ دە بەرسڤا پرسێن رۆژنامەڤانان دا. سەرۆککۆمارێ ترکیەیێ دیار کر کو پرۆسەیا ئاشتی و چەکدانینا په‌كه‌كێ ددۆمە و وان د ڤی واری دە تو گاڤان پاشڤە ناڤێژن.
ل سەر پرسا دەربارێ ھەبوونا سستی یان راوەستانێ د پرۆسەیا چەکدانینێ دە، ئەردۆگان گۆت کو کار ل گۆری وێ چارچۆڤەیا کو یاسا دیار دکە ب رێ ڤە دچە و ئەوێ ب ت رەنگی تاویزان ل سەر ڤی بابەتی نەکن. ئەردۆگان دیار کر کو ئەو ھەموو پێنگاڤان ب ھوورگلی دشۆپینن و گۆت: “دبە کو جارنان ژ بەر ھەستیاریا مژارێ ھنەک پێشکەتن د رایا گشتی دە خویا نەبن، لێ بریارداریا مە پر زەلال و نەگوھێربارە “.
سەرۆککۆمارێ ترکیەیێ ھەر وھا ئاشکەرە کر کو شکەفت و بارەگەھێن په‌كه‌كێ یێن ل ئالیێ دنێ سینۆر قۆناغ ب قۆناغ تێن ڤالاکرن و کارێن دەستنیشانکرن و پشتراستکرنێ ژی تام ل گۆری پلانا دیارکری برێڤە دچن.
ئەردۆگان دا زانین کو لژنەیەک ب سەرۆکاتیا جیگرێ سەرۆککۆمار و لگەل سازیێن پێوەندیدارێن دەولەتێ، ب تەمامی ھایداری ھوورگلیانە و کۆنترۆلا دۆسیایێ د دەستێ وان دەیە.
دەربارێ گاڤێن پاشەرۆژێ دە، ئەردۆگان تەکەز کر کو پشتی تەمامبوونا پرۆسەیا چەکدانینێ و پشتراستکرنا وێ د پراتیکێ دە، ئەوێ دەرباسی قۆناغەکە نوو ببن و گۆت: “چارەسەرکرنا پرسه‌كه ب ڤی رەنگی مەزن، پێویستیا وێ ب برێڤەبریەکە گەلەکی ھەستیار ھەیە. لەوما گرینگ نینە کی ژ چ ئالی چ دبێژە؛ ئەمێ وان شکەفتان ب تەمامی ڤالا بکن و دێ ھەر کەس ببە شاھدێ داویھاتنا یەکجارییا تەرۆرێ”.
