ئینسیاتیفا یەکیتیا دەمۆکراتیک دەربارێ گەشەدانێن داوی یێن ل باشوورێ کوردستانێ داخویانیەکا نڤیسکی وەشاند. ئینسیاتیفێ بانگ ل ھێزێن سیاسی، ب تایبەتی ل پەدەکێ و یەنەکێ کر کو پرسگرێکێن ناڤخوەیی ب رێیا دیالۆگێ چارەسەر بکن و تەکەز کر کو د ڤێ قۆناغا گرنگ یا رۆژھلاتا ناڤین دە، یەکیتیا نەتەوەیی ژ بۆ پاراستنا ستاتویا ھەرێما کوردستانێ پێدڤیەکا سەرەکی یە.
د دەستپێکا داخویانیێ دە ھات دیارکرن کو گەلێ کورد ب سەدان سالن بەردێلا گرانا جودابوون و پارچەبوونا ناڤخوەیی ددە. ئینسیاتیفێ دەستنیشان کر کو ئەزموونێن دیرۆکی نیشان ددن کو بێیی یەکیتیێ، کورد ھەر گاڤ ل ھەمبەری ئێریشێن دەرڤە بێپاراستن مانە و لاواز کەتنە.
مەترسیا ل سەر ستاتویا ھەرێمێ
داخویانیێ بال کشاند سەر ستاتویا باشوورێ کوردستانێ کو ب بەردێلێن مەزن ھاتیە بدەستخستن و وھا ھات گۆتن: “مخابن کو ژ بەر پرسگرێکێن ناڤخوەیی، نیقاشێن ل سەر ستاتویا باشوورێ کوردستانێ ژی دەرکەتن ھۆلێ. گەلێ مە ب فکارە کو پرسگرێکێن د ناڤبەرا ھێزێن کورد دە کوورتر ببن و ستاتویا کوردا ل باشوور لاواز وەرە خستن.”
ئینسیاتیفا یەکیتیا دەمۆکراتیک ب بیر خست کو ژ کۆمارا مەھابادێ ھەتا جینۆسایدا ئەنفالێ و شەرێ ناڤخوەیی یێ سالێن 90ێ، ئەنجامێن بێتفاقیێ ھەر تم گران بوونە. د داخویانیێ دە ھات دیارکرن کو رۆژھلاتا ناڤین د قۆناغەکا گرنگ را دەرباس دبە، ھێزێن ناڤنەتەوەیی رێڤەبەریێن ناڤەندی خورت دکن و ھێزێن ھەرێمی تفاقێن نوو ل دژی کوردان ئاڤا دکن.
ژ بەر ڤێ یەکێ، ئینسیاتیفێ بانگ ل پێشەنگ و رێڤەبرێن کورد کر کو ھشیار بن و وھا پێ دە چوو: “باوەریا مە ئەوە کو ھەر دو ھێزێن کورد یەنەکە و پەدەکە دێ کاربن پرسگرێکێن خوەیێن ناڤخوەیی ب رێیا دییالۆگێ چارەسەر بکن. د ناڤا ڤان شەرت و مەرجێن دژوار دە دەم نە دەما بەرژەوەندیێن تاکەکەسی یان حیزبییە، دەم دەما دەستھەڤگرتنێیە دا کو گەلێ کوردستانێ وەرە پاراستن.”
بانگا ژ بۆ نووکرنا پەیمانا ستراتەژیک
د داویا داخویانیێ دە ھات دەستنیشانکرن کو ستاتویا باشوور ب سایا پەیمانەکا ستراتەژیک یا ھەڤپار ھاتیە بدەستخستن و دڤێت ئەڤ پەیمان نەیێ راکرن، بەرەڤاژی وێ ب ئارمانجا خورتکرنا یەکیتیێ وەرە نووژەنکرن.
ئینسیاتیفا یەکیتیا دەمۆکراتیک بانگا خوە وھا ب داوی کر: “ئەم باوەر دکن کو ھێزێن سییاسی دێ بەرپرسیاریێن خوەیێن نەتەوەیی بینن جھ. لەورا گەلێ کورد دخوازە کو حەلەبچێ دەست بدە دوھۆکێ و ھەولێر دەست بدە سلێمانیێ دا کو چ ھێزێن بیانی نکاربن مەترسیێ ل سەر ستاتویا سییاسی چێبکن.”
