سەرۆکێ پارلامەنتۆیا ترکیەیێ نومان کورتولموش، ب ئارمانجا گوفتووگۆکرنا ل سەر ئاڤاکرنا “کۆمیسیۆنا چاڤدێریێ”یا کو بریارە ل پارلامەنتۆیێ وەرە دامەزراندن، دەست ب رێزەھەڤدیتنێن لگەل سەرۆک و نوونەرێن پارتیێن سیاسی کر. کورتولموش د چارچۆڤەیا ڤان ھەڤدیتنان دە لگەل سەرۆکاتیا جەهەپێ جڤیا.
نومان کورتولموش ئیرۆ (10ێ مژدارێ) سەردانا ناڤەندا جەهەپێ یا ل پارلامەنتۆیێ کر. ھەڤدیتنا کو نێزیکی 40 دەقیقەیان دەوام کر و ژ چاپەمەنیێ رە گرتی پێک ھات، د کەشوهەوایێ گۆتوبێژێن ل سەر پێڤاژۆیا سیاسی دە دەرباس بوو. ل گۆری زانیاریان، د ھەڤدیتنێ دە دەربارێ ئاڤاکرنا “کۆمیسیۆنا چاڤدێریێ”یا کو د چارچۆڤەیا خەباتێن نوو یێن یاسایی دە تێ پلانکرن، نێرین و پێشنیار ھاتن پارڤەکرن.
ھەڤدیتنێن لگەل ئاک پارتی، دەم پارتی و مھپێ
ھات راگھاندن کو نومان کورتولموش دێ د رۆژێن پێش دە سەردانێن خوە بدۆمینە و لگەل سەرۆکێن فراکسیۆن و نوونەرێن پارتیا داد و گەشەدانێ (ئاک پارتی) و پارتیا وەکھەڤی و دەمۆکراسیێ یا گەلان (دەم پارتی) رە ژی بجڤە. ھەر وھا ھاتە دیارکرن کو ژڤانێ کورتولموش یا لگەل پارتیا تەڤگەرا نەتەوەپەرەست (مەھەپێ) ژی ژ بۆ 12ێ مژدارێ ھاتیە پلانکرن.
سەرۆکێ پارلامەنتۆیێ کورتولموش د داخویانیێن خوەیێن بەرێ دە بال کشاندبوو سەر گرینگیا ئاڤاکرنا ڤێ کۆمیسیۆنێ و دەستنیشان کربوو کو ئەو دخوازن کۆمیسیۆن ب بەشداریا ھەری بەرفرەھ یا پارتیێن سیاسی و ب یەکدەنگیەکا خورت بهێت دامەزراندن، دا کو کاربە بنگەھەکێ ساخلەم و جڤاکی پەیدا بکە.
ل ئالیێ دن، بەرپرس و نوونەرێن دەم پارتیێ ژی د داخویانیێن خوەیێن داوی دە بانگا لەزکرنێ ژ بۆ ئاڤاکرنا ڤێ کۆمیسیۆنێ کربوون و بال کشاندبوون سەر وێ یەکێ کو دڤێت رێ ل بەر ئاستەنگی و سستبوونا د پێڤاژۆیێ دە بهێتە گرتن.
