بەردەڤکێ پارتیا دەمۆکراتا کوردستانێ (په‌ده‌كێ) رادگھینە کو بزاڤێن ژ بۆ پارڤەکرنا قەوارەیا ھەرێما کوردستانێ ب دەستێ ناڤخوەیی ژ پەیمانا “سایکەس-پیكۆ” کارەساتبارترە، ھەروسا تەکەز دکە کو کلیتا چارەسەرییا پرسگرێکان ل ناڤخوەیا ھەرێما کوردستانێ یە نە ب رێیا به‌غدایێ، و بزاڤ ژی ژ بۆ بجھئانینا دەستپێشخەرییا سەرۆک بارزانی بەردەوامن.
بەردەڤکێ پارتیا دەمۆکراتا کوردستانێ (په‌ده‌كێ) مەحموود محەمەد ئیرۆ یەکشەمێ، 15ێ مژدارا 2026ێ، د داخویانیەکێ دە ژ بۆ کوردستان24ێ بال کشاند سەر داوی پێشھاتێن سیاسی و ھزرا دو-ئیدارەییێ، بەرسڤا وان گۆتگۆتکان ژی دا یێن کو بەحسا بزاڤێن ژ بۆ پارڤەکرنا ھەرێما کوردستانێ دکن و راگھاند: “گەلێ کورد زێدەتری سەدسالەکێ یە و ژ سالا 1916ێ ڤە گازن ژ دەستھلاتێن ھەرێمی و وەلاتێن بیانی (وەکی فرانسا، بریتانیا و رووسیا) ھەیە، کو ئاخا کوردستانێ پارچە کریە. ڤێ یەکێ ژی برینەکە کوور د دیرۆکا نەتەوەیا مە دە چێ کریە، کو ب ھێسانی نایێ دەرمانکرن.”
بەردەڤکێ په‌ده‌كێ ھشیاری ژی دا و گۆت: “ب ت ئاوایی د لۆژیک و ئاقل دە نایێ قەبوولکرن کو د ڤێ قۆناغێ دە ب دەستێ خوە بێن ڤێ پشکا کوردستانێ ژی کو یەکپارچەیە بکن دو پارچە یان دو ھەرێم. ئەگەر داگیرکەر بیانی بووبن و ئەو ستەم ل ھەمبەری گەلێ مە کربە، وێ دەمێ ئەگەر ئالیێن ناڤخوەیی ب دەستێ خوە سەری ل پارچەکرنا وێ بدن، کارەکی گەلەک ژ وێ ژی خرابتر دکن و بەحسکرنا وێ ژی ژ بۆ خەلکێ کوردستانێ نەخوەشە، ژ بەر کو ت گارانتیەک ژی نینە کو ب پارڤەکرنا ھەرێما کوردستانێ پرسگرێکێن گەلەک مەزنتر چێ نەبن.”
د دەرھەقا چارەنڤیسا دەستپێشخەریا سەرۆک مەسعوود بارزانی ژ بۆ شکاندنا ختماندنا سیاسی و نێزیکبوونا ل گەل ئالیان، مەحموود محەمەد ئاماژە ب وێ یەکێ دا کو پشتی پەیام و بانگا جەنابێ سەرۆک، په‌ده‌كێ ھەمی رێکارێن پێدڤی ب جھ ئانینە داکو چاوا دەست ب بجھانینا ڤێ پەیامێ بێ کرن و ئەو بزاڤ ژی دێ بەردەوام بن.
د دەرھەقا سەدەما روونشتن و جڤینا ل گەل یەکیتیا نشتمانییا کوردستانێ (یه‌نه‌كێ)، بەردەڤکێ په‌ده‌كێ گۆت: “ت ئاستەنگ د ھۆلێ دە نینە و پێشتر ژی پرسگرێکێن گەلەک کوور د ناڤبەرا ھەر دو ئالیان دە ھەبوونە و ھاتنە چارەسەرکرن، ژ بەر کو گرینگیا ھێزێن سیاسی د وێ یەکێ دەیە کو د دەما چێبوونا ئارێشەیان دە، چارەیان ببینن داکو ب ھەڤ رە کار بکن.”
د بەرسڤا پرسیارەکێ دە ل سەر بریارا دادگەھا فەدەرالا ئیراقێ ل سەر رەدکرنا گلیا ھلوەشاندنا گەرا پارلامەنتۆیا کوردستانێ، مەحموود محەمەد تەکەز کر کو برنا دەرڤەیا پرسگرێکێن ناڤخوەیی بۆ به‌غدایێ ب رێیا گلیان رێیەکە راست نینە، بەلکی پێدڤییە ئالی د ناڤخوە دە دانووستاندنان بکن و ئەگەر ھەر نێرینەکا جودا ژی ھەبە، ب ھەڤفێمکرنەکا ھەڤپار چارەسەر بکن.
بەردەڤکێ په‌ده‌كێ داخواز ژ ھەمی وان پارتیان ژی کر یێن کو خوەدیێن کورسیێن پارلامەنتۆیێ نە کو ھەست ب بەرپرسیاریا نشتمانییا ڤێ قۆناغێ بکن و گۆت: “دەنگدەران بەرپرسیارییا برێڤەبرنا وەلات خست سەر مللێ وان داکو پارلامەنتۆ قانوونان دەربخە و چاڤدێریێ بکە، ھەروسا ل گەل پێکانینا حکوومەت و سازیێن رەوا، لەوما ئەرکێ ھەمییانە کو پێکڤە وەلات ب رێ ڤە ببن.”
د داویێ دە ژی، بەردەڤکێ په‌ده‌كێ زەلال کر کو ھەمی بزاڤێن وان ژ بۆ وێ یەکێ نە کو زەمینەکێ بئافرینن کو زێدەتر تەبایی و ھەڤفێمکرن چێ ببە و ب یەکرێزیێ ژ ڤێ قۆناغا دژوار و ئاستەنگان دەرباز ببن؛ ھەروسا بریاردانا ل سەر ئاوایێ پێکانینا کابینەیا حکوومەتێ ژی بۆ ئەنجاما دانووستاندنێن ناڤبەرا ئالیێن سیاسی د پاشەرۆژێ دە دمینە.
