پارتیێن کوردان یێن کو د بن کۆنێ “ھەڤبەندیا نەتەوەیی یا کوردستانێ” (ھەڤبەندی) دە ھاتنە جەم ھەڤ، بریار دان کو ل دژی داخویانیێن گەفخوارنێ یێن سەرۆکێ پارتیا زەفەرێ ئومید ئۆزداگ سەری ل دادگەھێ بدن. سەرکردەیێن ھەڤبەندیێ تەکەز کرن کو ئەو ژ گەفێن ھاتنە کرن ناترسن و دێ پێڤاژۆیا یاسایی ب ئاوایەکی جدی بدن دەستپێکرن.
ئەڤ ھەلوەستا ھەڤبەندیێ پشتی ئاخافتنەکا توند یا ئومید ئۆزداگ ھات کو د ڤان رۆژێن داوی دە ل ئەنقەرەیێ پێک ئانیبوو. ئۆزداگ د ئاخافتنا خوە دە ئارمانجا راگھاندنا ھەڤبەندیێ یا کو ھەفتەیا بۆری ل ئامەدێ ب بەشداریا 170 سیاسەتمەداران و ئاڤاکرنا ئەنجومەنا 51 کەسی ھاتبوو دامەزراندن، کربوو ئارمانج و ب بیرخستنا چارەنڤیسا شێخ سەعید و سەیید رزا، ب ئەشکەرەیی گەفا دارڤەکرنێ ل سەرکردەیێن کورد خواربوو.
پارتییا وەلاتپارێزێن کوردستانێ و پەسەکێ: ئەم ستوویێ خوە ناتەوینن
سەرۆکێ پارتیا وەلاتپارێزێن کوردستانێ (PWK) موستەفا ئۆزچەلیک دا خویاکرن کو ئەوێ د وارێ یاسایی دە گاڤێن پێویست باڤێژن و دەستنیشان کر کو چاوا شێخ سەعید و سەیید رزا سەری نەتەواندنە، ئەو ژی دێ ھەتا داویێ ل سەر دۆزا خوە بسەکنن.
ژ ئالیێ خوە ڤە، سەرۆکێ گشتی یێ پارتیا سۆسیالیستا کوردستانێ (پەسەکێ) بایرام بۆزیەل ژی دیار کر کو داخوازێن وان یێن ژ بۆ ناسکرنا ناسنامەیا کوردی، زمانێ فەرمی و پەروەردەیێ و سیستەمەکە فەدەرال مافێن رەوا نە. بۆزیەل دا زانین کو کەسێن وەکی ئۆزداگ ب زمانێ کۆمکوژیێ گەفان ل وان دخون، لێ ئەو ب چ ئاوایی ستوویێ خوە ل ھەمبەری ڤان گەفان ناتەوینن.
داخوازێن ھەڤبەندیێ و کارڤەدانا ئۆزداگ
ھەڤبەندیا نەتەوەیی یا کوردستانێ د داخویانیا خوەیا دامەزراندنێ دە بال کشاندبوو سەر مافێ چارەنڤیسێ، ستاتویا سیاسی و پاراستنا دەستووری یا زمان و چاندا کوردی.
لێبەلێ، ئومید ئۆزداگ د ئاخافتنا خوە دە ل دژی ڤان داخوازان دەرکەتبوو و گۆتبوو، “ئەم رێ نادن کو ھوون ڤی وەلاتی پارچە بکن و ئەم دێ ھەمان تشتێ کو ل شێخ سەعید و سەیید رزا ھات کرن ل وە ژی بکن.” ل ھەمبەری ڤێ ھەلوەستا نیژادپەرەست و توند، ئالیێن ھەڤبەندیێ بریار دان کو تێکۆشینا خوە ھەم د قادا سیاسی و ھەم ژی د قادا دادگەھێ دە بدۆمینن.
