سەرۆکێ ھەرێما کوردستانێ نێچیرڤان بارزانی و سەرۆککۆمارێ ئیرانێ مەسعوود پزیشکیان تەکەزی ل سەر گرینگیا دیالۆگ و ھەڤکاریا ھەڤپار کرن و راگھاندن کو دیالۆگ باشترین رێیە ژ بۆ بدەستخستنا ئاشتی و ئارامیا بەردەوام ل ھەرێمێ.
سەرۆکێ ھەرێما کوردستانێ نێچیرڤان بارزانی ئیرۆ 12ێ مژدارا 2026ان ل سەر حەسابێ خوەیێ تۆرا جڤاکییا “X”ێ پەیامەک بەلاڤ کر و دا زانین کو وی ڤێ سبەھێ ل باژارێ ئانتالیایێ یێ ترکیەیێ لگەل سەرۆککۆمارێ ئیرانێ مەسعوود پزیشکیان ھەڤدیتنەکە بەرھەمدار پێک ئانیە.
نێچیرڤان بارزانی دەربارێ ناڤەرۆکا جڤینێ دە دیار کر کو وان بەحسا بەرفرەھکرنا پێوەندیان کریە و گۆت: “مە دەربارێ رەوشا پێوەندیێن دوالی یێن د ناڤبەرا ھەرێما کوردستانێ، ئیراق و ئیرانێ دە دانوستاندنا بیرباوەریان کر.”
سەرۆکێ ھەرێما کوردستانێ ھەر وھا دەستنیشان کر کو ژ بۆ ئارامیا ناڤچەیێ پێنگاڤێن ھەڤپار پێویستن و گۆت: “مە تەکەزی ل سەر گرنگیا بەردەوامیا ھەڤاھەنگی و خەباتێن ھەڤپار کر ژ بۆ رووبرووبوونا ئاستەنگی و پرسگرێکێن ناڤچەیێ. ھەر وھا مە پشتراست کر کو دیالۆگ، ھەڤتێگھیشتنا ھەڤپار و ھەڤکاریا بەرفرەھ باشترین رێ نە بەر ب ئاشتی و ئارامیا ماییندە ڤە.”
ھەڤدیتنا نێچیرڤان بارزانی و مەسعوود پزیشکیان ل پەراویزا لووتکەیا سەرۆکێن جیھانێ د چارچۆڤەیا کۆنفەرانسا گوھەرینا کەشووھەوایێ یا نەتەوەیێن یەکگرتی (COP31) دە پێک ھات، کو ئەڤ چەند رۆژن ب بەشداریا سەرکردەیێن گەلەک وەلاتێن جیھانێ ل باژارێ ئانتالیایێ یێ ترکیەیێ تێ لدارخستن.
