سەرۆک مەسعوود بارزانی ب بۆنەیا سالڤەگەرا 242یێ یا ئاڤاکرنا باژارێ سلێمانیێ پەیامەکا پیرۆزباھیێ بەلاڤ کر و راگھاند: “سلێمانی ھەر دەم جھێ ھەلقولینا بیر و ھەستێ نەتەوەیی، رەوشەنبیری و فەرھەنگێ بوویە و دێ ھەر بمینە.”
سەرۆک مەسعوود بارزانی ئیرۆ شەمبیێ، 14ێ مژدارا 2026ێ، ل سەر تۆرا جڤاکی یا “X”ێ ب بۆنەیا سالڤەگەرا ئاڤاکرنا باژارێ سلێمانیێ پەیامەک وەشاند.
سەرۆک بارزانی د پەیاما خوە دە پیرۆزباھی ل خەلکێ باژێری کر و گۆت: “د بیرئانینا 242 سالیا ئاڤاکرنا باژارێ سلێمانیێ دە، پیرۆزباھیەکا گەرم ئاراستەیی نشتەجھێن برێز و خۆشەویست یێن وی باژارێ دیرۆکی یێ کوردستانێ دکم.”
سەرۆک بارزانی ھەر وھا بال کشاند سەر رۆلا دیرۆکی یا ڤی باژێری د تەڤگەرا رزگاریخوازا کوردستانێ دە و دەستنیشان کر: “سلێمانی ئەو باژارە کو بوویە بەشەکی گرینگێ دیرۆک، ناسنامە و خەباتا نەتەوەیی یا گەلێ کوردستانێ. ئەڤ باژارە ھەر دەم جھێ ھەلقولینا بیر و ھەستێ نەتەوەیی، رەوشەنبیری و فەرھەنگێ بوویە و دێ ھەر بمینە.”
د داویا پەیامێ دە سەرۆک بارزانی ھێڤیا ئارامی و پێشکەتنێ ژ بۆ باژێرێ سلێمانیێ خوەست و نڤیسی: “ھێڤیا ئارامی و ئاسوودەییەکا بەردەوام ژ بۆ وی باژارێ عەزیزێ کوردستانێ دخوازم.”
