سەرۆکوەزیرێ ھەرێما کوردستانێ مەسروور بارزانی، ئیرۆ (15ێ مژدارا 2026ێ)، د مەراسیما دەستپێکرنا قۆناغا دویەما پرۆژەیا کەمبەرا کەسک یا ھەولێرێ دە گۆتارەک پێشکێش کر. سەرۆکوەزیر بارزانی د ئاخافتنا خوە دە بال کشاند سەر پاراستنا قەوارەیا ھەرێما کوردستانێ، گرنگیا پرۆژەیێن ژینگەھی و ئێریشا داوی یا ل سەر زەڤیا کۆرمۆرێ.
د چارچۆڤەیا قۆناغا دویەما پرۆژەیێ دە کو ب ھەڤکاریا وەلاتێ یوونانستانێ تێ مەشاندن، زێدەتری ملیۆنەک و 800 ھەزار شتل تێن چاندن. سەرۆکوەزیر بارزانی دیار کر کو ئەو دێ ژ بۆ باشکرنا کەشووھەوایێ ھەر تشتی بکن و گۆت کو ئەڤ پرۆژە نە تەنێ ژ بۆ ژینگەھێ، د ھەمان دەمێ دە ژ بەر دارێن بەرھەمدار ژ بۆ وارێ خوارنێ و پەیداکرنا دەرفەتێن کاری ژی گرینگە. وی سپاسیا ھێزێن پێشمەرگە و خوەبەخشان کر کو د ڤێ پرۆژەیێ دە جھ دگرن.
باندۆرا پرۆژەیا “رۆناکی” و پاقژکرنا ھەوا
بارزانی دەستنیشان کر کو بەرێ ژ بەر بەلاڤبوونا مووەلیدەیێن ئەھلی، کەشووھەوایا ھەولێرێ قرێژ بووبوو، لێ لگەل جیبجیکرنا پرۆژەیا “رۆناکی” باندۆرەکا ئەرێنی یا مەزن ل سەر پاقژکرنا ئاڤوھەوایێ ھەولێرێ و تەڤاھیا کوردستانێ چێبوویە. وی ھەر وھا ئانی زمان کو د دەمێن بۆری دە ھەولا برینا دارستانێن کوردستانێ ھاتیە دایین، لێ حکوومەت ژ بۆ پاراستنا سرووشتی ب بریارە.
ھەلوەستا ل دژی ئێریشا کۆرمۆرێ و ھەولێن دابەشکرنێ
سەرۆکوەزیرێ ھەرێما کوردستانێ د ئاخافتنا خوە دە ب توندی ئێریشا ل سەر زەڤیا کۆرمۆرێ یا گازێ شەرمەزار کر و ئەو وەکی “تاوانەکا ل دژی ھەموو خەلکێ کوردستان و ئیراقێ” ب ناڤ کر. بارزانی ھێڤی خوەست کو لژنەیا لێکۆلینێ یا ھەڤپار د زووترین دەم دە ئەنجامێن لێکۆلینێ ئەشکەرە بکە و ئەنجامدەرێن وێ تاوانێ بگھیژن سزایێ خوەیێ یاسایی.
د داویا ئاخافتنا خوە دە، مەسروور بارزانی پەیامەک دا کو پاراستنا قەوارەیا ھەرێما کوردستانێ ئەرکێ ھەموویانە و وھا گۆت: “ئەم دێ رووبروویی ھەر ھەولەکا ژ بۆ دابەشکرنا ھەرێما کوردستانێ ببن. پشتراستم ھەر کوردەکی دلسۆز و نشتمانپەروەر دێ ل دژی دابەشکرنا زێدەترا ھەرێما کوردستانێ راوەستە.” بارزانی دا خویاکرن کو تەڤی ھەموو ئاستەنگان، ئەو دێ د خزمەتگوزاری و جیبجیکرنا پرۆژەیان دە ل ھەموو ناڤچەیێن کوردستانێ بەردەوام بن.
