شاندا دەم پارتیێ سەردانا ڤێلایا ئۆجالان کر

Imarli-Heyet-net

شاندا ئیمرالیێ یا دەم پارتیێ، کو ژ پەرڤین بولدان، مدحەت سانجار و ئۆزگور فاک ئەرۆل پێک تێ، پشتی زێدەتر ژ دو مەھان جارەکە دن ژ بۆ ھەڤدیتنا ل گەل ئابدوڵاھ ئۆجالان گھیشتن گراڤا ئیمرالیێ.

شاندا ئیمرالیێ یا پارتیا وەکھەڤی و دەمۆکراسیێ یا گەلان (دەم پارتی) ب مەرەما ھەڤدیتن و جڤینا ل گەل سەرۆکێ په‌كه‌كه‌یا هلوه‌شیایی عه‌بدوللا ئۆجالان بەر ب گراڤا ئیمرالیێ ڤە ب رێ کەت.

شاندا دەم پارتیێ، کو پێک تێ ژ جیگرا سەرۆکێ پارلامەنتۆیا ترکیەیێ پەرڤن بولدان، پارلامەنتەرێ رھایێ مدحەت سانجار و پارێزەر ئۆزگور فاک ئەرۆل ئیرۆ یەکشەم، 22ێ مژدارا 2026ێ، ژ بۆ وێ ھەڤدیتنێ گھیشتن گراڤا ئیمرالیێ.

تێ چاڤەرێکرن کو پشتی ڤەگەرا وێ شاندێ ژ گراڤا ئیمرالیێ، داخویانیەک ل سەر ناڤەرۆک و دەما وێ جڤینێ بێ بەلاڤکرن.

سەردانا داویێ یا شاندا دەم پارتیێ ژ بۆ ئیمرالیێ ل 13ێ ئیلۆنا 2026ێ ھاتبوو کرن، کو ھەڤدیتنا یەکێ بوو پشتی پەژراندنا رێکخستنا “قانوونا چارچۆڤەیێ” د پارلامەنتۆیا ترکیەیێ دە.

د دەما زێدەتر ژ دو مەھێن بۆری دە، د دەمەکێ دە کو شرۆڤەیان بەحسا “راوەستانا” پرۆسەیێ دکر، مدحەت سانجار د دەستپێکا مەھا مژدارێ دە راگھاندبوو ئۆجالان د چارچۆڤەیا گرتیگەھا ئیمرالیێ دە بۆ جھەکی نوو ھاتییە ڤەگوھاستن، کو تایبەت ژ بۆ وی ھاتیە ئامادەکرن.

ل ھەمبەر ڤێ یەکێ ژی، پەرڤین بولدان تەکەز کربوو کو ئەو گوھەرتنا جھی نایێ واتەیا دەرکەتنا ژ گرتیگەھێ یان گوھەرتنا پێگەھا قانوونی، بەلکی تەنێ جھەکە ژ بۆ رێکخستنا شەرتێن کار کرنێ.