سێكته‌را ئابووری وێ ژ گرنگترین بابه‌تێن نیقاشا لاڤرۆڤ و رایه‌دارێن كوردستانێ به
وه‌زیرێ كارێن ده‌رڤه ئێ رووسیا فه‌ده‌رال، ئیرۆ سەردانا ئیراقێ كر و ل گه‌ل رایه‌دارێن وێ جڤیا، هه‌ر ئیرۆ وێ سه‌ردانا ھەرێما کوردستانێ بكه و وێ ل گه‌ل سه‌رۆكێ پارتا ده‌مۆكراتا كوردستانێ، سه‌رۆكێ هه‌رێمێ و سه‌رۆكێ حكوومه‌تێ بجڤه، سێكته‌را ئابووری و پێشهاتێن ناڤچه‌یێ وێ ژ گرنگترین بابه‌تێن نیقاشێ به.
وەزیرێ كارێن دەرڤە ئێ رووسیایێ سه‌رگی لاڤرۆڤ، ئیرۆ رۆژا دوشه‌می سه‌ردانا به‌خدایێ كر ل گه‌ل هه‌ڤتایێ خوه محه‌مه‌د حه‌كیم جڤیا، تێكلیێن مۆسكۆ و بخدایێ، رۆژه‌ڤا ئیراقێ و ناڤچه‌یێن نیقاش كرن.
تێ چاڤه‌رێ كرن هه‌ر ئیرۆ لاڤرۆڤ سه‌ردانا هه‌ولێرێ بكه و هه‌ڤدیتنا ب سه‌رۆكێ پارتا ده‌مۆكراتا كوردستانێ مه‌سعوود بارزانی، سەرۆکێ ھەرێما کوردستانێ نێچیرڤان بارزانی، سەرۆک وەزیر مه‌سروور بارزانی، ھەڤدیتنان پێكبینە.
تێكلیێن هه‌ولێر و مۆسكۆ و هه‌ر وها ره‌وشا ناڤچه‌یێ و سێكته‌را ئابووری وێ ل سه‌ر لیستا بابه‌تێن نیقاشا لاڤرۆڤ ب رایه‌دارێن هه‌رێما كوردستانێ به.
ئەڤ یه‌كه‌مین جاره سه‌رگی لاڤرۆڤ تێ هه‌رێما كوردستانێ، وه‌ختا كو نێچیرڤان بارزانی وه‌كه سه‌رۆكێ هه‌رێما كوردستانێ ده‌ست ب كار بووی، لاڤرۆڤ ب رێیا بالیۆزێ رووسیا ئێ بەخدایێ، ماکسیم ماکسمۆڤ پیرۆزباھی ل وی کربوو.
هه‌رێما كوردستانێ و رووسیا فه‌ده‌رال د سالێن بووری ده، تێكلیێن خوه هه‌ری خورت كرنه تایبه‌ت د وارێ ئه‌نه‌رژیێ ده، كو لهەڤهاتنه‌كه مه‌زن ل گه‌ل شركه‌تا رۆسنه‌فت ئا هكوومه‌تا رووسیایێ ئیمزا كریه و ل گۆری وێ، رووسیا وێ نه‌فتێ ل هه‌رێما كوردستانێ ده‌رخه.
سه‌رۆكێ هه‌رێما كوردستانێ نێچیرڤان بارزانی و سێرگی لاڤرۆڤ د وه‌ختا کۆربەندا ئابووری ئا جیھانی دە، ل سانت پەتەرسبۆرگا رووسیایێ، ب ھەڤرە جڤیابوون و تەکەزی ل سەر پێشخستنا تێكلیێن دوئالی کربوون.
