داگیركاریا تركیێ ل سه‌ر رۆژئاڤا كوردستانێ د دۆمه‌

داگیركاریا تركیێ ل سه‌ر رۆژئاڤا د دۆمه‌

ئێریشا داگیركاری ئا تركیێ ل سه‌ر رۆژئاڤا كوردستانێ ده‌وام دكه‌، ئیرۆ رۆژا پێنجشه‌می بۆردۆمانا تركیێ ژ سه‌رێ كانیێ ده‌ستپێكر و پشتره‌ ل كۆبانێ، قامشلۆ و گرێ سپیێ، هه‌ژماره‌كا هه‌مولاتی ئێن سڤیل شه‌هید كه‌تن.

نێزی 10 هه‌مولاتیان شه‌هید كه‌تن

داگیركاریا تركیێ ل سه‌ر رۆژئاڤا د دۆمه‌

ئیرۆ رۆژا دویه‌مین ئا ئێریشا داگیركاری ئا تركیێ بوو ل سه‌ر رۆژئاڤا كوردستانێ، شه‌ر و په‌ڤچوون ل ئه‌نیێن گرێ سپی، سه‌رێ كانیێ، گونده‌واری قامشلۆ و عامۆدێ هه‌بوو، لێ به‌لێ زرارا هه‌ری مه‌زن ب هه‌مولاتی ئێن سڤیل كه‌تنه‌، ل گرێ سپیێ و قامشلۆ هه‌ژماره‌كا سڤیلان كو ژن و زارۆ د گه‌ل ده‌نه‌ شه‌هید كه‌تن، چاڤكانیان ته‌سبیت كرنه‌ كو ته‌نێ ل قامشلۆ و گرێ سپی ئیرۆ 9 سڤیل شه‌هید كه‌تنه‌ 2 ژ وان زارۆنه‌، كه‌چه‌كه‌ ته‌مه‌ن 3 سال و خۆرته‌كێ ته‌مه‌ن 11 سال كو خوشك و برا بوون و ل گه‌ل دایكا وان، هه‌ر هه‌موو كه‌تنه‌ به‌ر مۆشه‌كێن تركیێ و پشتی بریندار كه‌تین، ب سه‌ده‌ما سه‌ختی ئا برینێن وان، شه‌هید كه‌تن.

تركیێ دبێژه‌ وان 176 شه‌رڤان هنگافتنه‌

وه‌زاره‌تا پاراستنا نه‌ته‌وه‌ئی ئا تركیێ، ئیرۆ د به‌یانه‌كه‌ نڤیسكی ده‌ ئه‌شكه‌ره‌ كر كو ژ ده‌ستپێكا ئێریشا (كانیا ئاشتێیێ) كو ئێڤارا رۆژا چارشه‌می 9/10/2019 ده‌ستپێكر، 176 شه‌رڤانێن هێزێن سووریایا ده‌مۆكراتیك و یه‌كینه‌یێن پاراستنا گه‌ل یه‌په‌گێ هاتنه‌ هنگافتن، هه‌ر وها د ده‌ خوه‌یا كرن كو ئۆپه‌راسیۆنا (كانیا ئاشێتیێ) وێ بدۆمه‌ و ئارته‌شا تركیێ و هه‌ڤپه‌یمانێن وێ ئێن ئۆپۆزسیۆنا سووریێ ل ئه‌نیا گرێ سپیێ پێشده‌ چوونه‌، باله‌فرێن جه‌نگی ژی 18 خالێن كو د پلانا ئۆپه‌راسیۆنێ ده‌ پێشوه‌خت هاتبوون ته‌سبیت كرن، هلدانه‌.

ته‌قاندنا 7 تانكێن ئارته‌شا داگیركار

ژ ئالێ خوه‌ ڤه‌، ناڤه‌ندا مه‌دیایی ئا هێزێن سووریایا ده‌مۆكراتیك هه‌سه‌دێ ره‌تكریه‌ كو ئه‌ڤ هه‌ژمارا شه‌رڤانان كو ئارته‌شا تركیێ ئانیه‌ زمان هاتبن هنگافتن، وان د به‌یانێن جودا ده‌، ئه‌شكه‌ره‌ كر د رۆژا یه‌كه‌مین ئا ئێریشا سه‌ر رۆژئاڤا ده‌، 3 شه‌رڤانێن خوه‌ ژ ده‌ستدابوون، د رۆژا دویه‌مین ده‌، هنه‌ك بریندارێن وان هه‌نه‌، هه‌موه‌خت شه‌رڤانان رێ ل پێشده‌چوونا میلیشیایێن ئارته‌شا ئازاد ئا سووریێ كو تركیێ پشتگریێ لێ دكه‌ گرتنه‌، 4 تانكێن داگیركاران ژی ب مۆشه‌كێن دژه‌ تانك وێرانكرنه‌ و شه‌وتاندنه‌، هه‌سه‌ده‌ ته‌سبیت كر كو وان د سه‌ر 15 كه‌سان ده‌ ژ چه‌كدار و میلیشیایێن ئارته‌شا ئازاد ئا سووریێ كوشتنه‌.

60 هزار كه‌س ئاواره‌ بوونه‌

داگیركاریا تركیێ ل سه‌ر رۆژئاڤا د دۆمه‌

ژ ده‌ستپێكا ئێریشا سه‌ر رۆژئاڤا كوردستانێ، نێزی 60 هزار كه‌س ژ خه‌لكێ سڤیل ئاواره‌ بوونه‌، ب ئاوایه‌كی كو باژاركێن سه‌رێ كانیێ و دربێسیێ چوول بوونه‌، سه‌ده‌ما ئاواره‌ بوونێ بۆ دژوار و سه‌ختی ئا بۆردۆمانا تركیێ یه‌ ل ناڤه‌ند و گونده‌وارێن هه‌ردو باژاران، هه‌موه‌خت پێله‌كه‌ هه‌ری مه‌زن ئا ئاواره‌ بوونێ ل گرێ سپیێ هه‌یه‌.

ئه‌ردۆگان و (فه‌تح) ئا رۆژئاڤا

داگیركاریا تركیێ ل سه‌ر رۆژئاڤا د دۆمه‌

سه‌رۆك كۆمارێ تركیێ ئیرۆ د ناڤا جڤینه‌كه‌ پارتیا خوه‌ دا گۆتار پێشكێش كر و وها ئاخڤی: “پشتا ب خودێ گه‌رمه‌، ئینشاء الله فه‌تح وێ رزقێ مه‌ به”.

 ره‌جه‌ب ته‌یب ئه‌ردۆگان ل همبه‌ر سه‌ركردێن پارتا خوه‌، ئه‌ورۆپا و وه‌لاتێن دژبه‌رێن ئۆپه‌راسیۆنا داگیركاری ره‌خنه‌ كرن و گۆ “ئه‌مێ ئۆپه‌راسیۆنێ بدۆمینن و چ دبه‌ بلا ببه‌”، هه‌موه‌خت جڤینا خوه‌ ب سۆره‌تا (فه‌تح) ئا قورئانا پیرۆز ب داوی كر و گۆ: “ئینشاالله فه‌تح وێ ببه‌ رزقێ مه”‌.

ئارته‌شا تركیێ ب موباره‌كا ئه‌مه‌ریكایێ، ئێڤارا دوهـ چارشه‌می ئێریشا داگیركاری ل سه‌ر رۆژئاڤا كوردستانێ ده‌ستپێكر، ژ بۆ كو هه‌رێمه‌كا ئه‌وله‌هیێ وه‌ره‌ ئاڤا كرن كو ئامانج ژێ گوهه‌رینا ده‌مۆگرافی ئا ناڤچه‌یێ یه‌.