(چەند کەسێن لادەر ژ رێبازا ینک، بێی کو ل سەرکرداتیا پارتا مە ڤەگەرن، د وان بوویەران دە و ب مەبەستا چەند دەستکەتێن کاتی و شەخسی، بوون ئالیکار و دەستکێش ژ داگیرکاران رە و ب ڤی کارێ قرێژ و گەمار خوە خستن ناڤ رووپەلێن رەش ئێن دیرۆکا گەلێ مە).

ته‌نێ 2 رۆژ ل سه‌ر بوویه‌را ئیخانه‌تا 16ی ئۆكتۆبه‌را 2017ان ده‌رباسببوون، وه‌ختا كو كۆسره‌ت ره‌سوول ئێ جهگرێ یه‌كه‌مێ سه‌كره‌ته‌رێ یه‌كیتیا نشتیمانی، گرۆپه‌كه‌ دیار ئێ پارتا خوه‌ ب ژ ده‌ستچوونا 51% ئا خاكا كوردستانێ سووچبار كری، كۆسره‌ت ره‌سوول ئه‌ڤ كه‌س ب (كالفام) ناڤ كرن.

كۆسره‌ت ره‌سوول ل 18/10/2017ان په‌یامه‌ك ل ده‌ربارا ره‌وشا كه‌ركووكێ وه‌شاند و تێده‌ ب زه‌لالی گۆت: هنه‌ك کەسێن لادەر ژ رێبازا یەکیتی بێی کو ل سەرکرداتیا پارتیا مە ڤەگەرن، ب مەبەستا هنه‌ك دەستکەتێن کاتی و شەخسی، بوون ئالیکار و دەستکێشێن داگیرکاران و ب ڤی کارێ خوە ئێ قرێژ خوە خستن ناڤ رووپەلێن رەش ئێن دیرۆکا گەلێ مە و بەرپرساتیا کارەساتێن کەرکووک و دوز و ھەموو زیانێن جانی و مادی و مانەوی ئێن گەلێ مە دکەڤە ستۆێ وان کەسێن نەزان د ناڤ یەکیتی ده‌.

تێکستا پەیاما کۆسرەت رەسوول

جەماوەرێن دلسۆز و خوەراگرێن خەلکێ کوردستانێ

مالباتێن سەربلندێن شەھیدێن پێشمەرگێن قارەمان و جانفیدا ئێن کورداتیێ

ل جەم ھەمیان ئەشکەرەیە کو ئاگرێ خەباتا گەلێ مە ب دیرۆکا دەھان سال ژ تەمەنێ خوە، ژ بۆ بدەستئانینا ژیانەکە ئازاد و شەرەفمەندانە، ب بەردەوامی ھلۆر مایە و نفش ل پەی نفش پەیاما خوە ئا پیرۆز گھاندیە، ھەیا کو ئیرۆ گھشتیە دەستێ مە، ژ بۆ وێ مەرەمێ ژی چەندین سەرکردەیێن جوامێر و دەھان ھەزار لاو و مێرخاسان خوە کرن قوربانی و ب سەربلندی رووپەلێن دیرۆکێ نڤیساندن.

ھەیا ئاستێ بێتری 3 سالان گەلێ کوردستان، ل شوونا ھەموو ئازادیخوازان و مرۆڤدۆستێن جیھانێ ل بەرانبەری ھۆڤترین گرۆپا تەرۆریستی راوەستیا و داوی ل پلانا وێ گرۆپێ ئانی کو دخوەست پێڤاژۆیا دیرۆکێ راوەستینە و مە ڤەگەرینە سەردەما کەڤری و جاھلی.

نھا ژی د دەما کو ناڤ و دەنگێ جوامێرانەیێ پێشمەرگێن کوردستان ب جوانی کەتیە گوھێ تەڤاھیا مرۆڤدۆست و ئازادیخوازێن جیھانێ دە و کەس نەمایە د ڤێ جیھانا فرەھ دە کو ناڤێ پیرۆزێ پێشمەرگە نەھاتبە سەر زمانێ وی، گەلێ کوردستانێ ل بەندا وێ یەکێ بوو کو جڤاکا ناڤدەولەتی و دۆست و ھەڤپەیمانێن مە ل جیھانێ و ناڤچەیێ، ژ بۆ ئاڤاکرنا پێشەرۆژەکە گەشتر ژ بۆ نفشێن مە ئێن داھاتی، گوھداریا مە بکن و رێزێ ل ئیرادا مللەتێ مە بگرن، لێ مخابن ل شوونا وێ یەکێ، ئەم راستی ھەڤکاریەکە بەرفرەھ کرن و جارەکە دن ئەو راستی پشتراست کرن کو ( ژ بلی چیایێن کوردستانێ دۆستێن نەتەوا کورد تونە نە).

ھشتنا گەلێ مە ب تەنێ ل بەر ئێریشا میلیشیا ھەشدا شەئبی و یەکینەیێن ئارته‌شا  ئیراق و بوویەرێن چەند رۆژێن دەرباسبوویی ل کەرکووکێ و ناڤچەیێن دن ئێن کوردستانی و کۆمکوژیا ل دژی وەلاتیێن کورد ل باژارێ دوزخورماتوو و جھێن دن و دەرخستنا وان ژ بۆ کۆلانان و شەوتاندنا مال و ملکێن وان و تالانکرنا سامانێن وان، تەنێ وەک دەستپێکرنا ئەنفالکرنەکە نوو ل دژی کوردان ل سەر ئاخا باڤ و باپیرێن وان تێ خوەندن نەک تشتەکی دنە. لێ تشتێ کو برینێ کوورتر دکە ئەوە کو چەند کەسێن لادەر ژ رێبازا ینک بێی کو ل سەرکرداتیا پارتیا مە ڤەگەرن، د وان بوویەران دە و ب مەبەستا چەند دەستکەتێن کاتی و شەخسی، بوون ئالیکار و دەستکێش ژ داگیرکەران رە و ب ڤی کارێ قرێژ و گەمار خوە خستن ناڤ رووپەلێن رەشیێن دیرۆکا گەلێ مە.

دلسۆز و خەمخورێن کورداتیێ، ب شاھدبوونا ھەموو ئالیان، مە ب خوە ھەموو تشتێ ب دەست مە ھات، ژ بۆ پاراستنا سەر و مالێن وەلاتیان و ئاخا پیرۆزا کوردستانێ ل کەرکووکێ و جھێن دن و ب ئامانجا ژدەستنەدانا دەستکەفتێن ستراتیژی ئێن گەلێ کوردستانێ مە کر و ئەم پاشدە ڤەنەکشیان، لێ دیارە ژ بلی ھەڤکاریا دەرڤە، نەوەکھەڤیا ھێزێ و رۆلا نەجامێرانە ئا دەسترەشێن ناڤخوە، بوو سەدەما ڤالاکرنا بەشەکی ب باندۆر ژ سەنگەران و ڤالاکرنا پشتا ھێزێن مە د خزمەتا دژمن دە، ھشت کو ڤێ جارێ ژی ئەنجام نەکەڤن خزمەتا ئامانجێن مە ئێن نەتەوی و ھشت کو بەشەکی گرنگ ژ دەستکەفتێن گەلێ کورد ژدەست بچە.

تەڤی ھەموو تشتی و تەڤی کو زیان د وارێ ژدەستدانا دەستکەفتێن نەتەوی گەلەکی مەزنن، کارەساتێن کەرکووک و دوز و ھەموو زیانێن جانی و مادی و مانەوی ئێن گەلێ مە، دکەڤن ستوێ وان نەزانێن د ناڤ یەکیتی دە، لێ ئەڤ نە داویا رێیە و ئیرادا ئازادیخوازانە ئا گەلێ کورد، ل گەل ڤان جۆرێن کەتنان ناشکێ، لەوما رابوون و پێشڤەچوون نە کارەکی زەھمەتە، ئەم ژی ژ بۆ وان ئامانجان ھەر دەم پێشمەرگێن دلسۆزێن رێبازا شەھیدانن و مۆرالە مە، مۆرالە رۆژێن گران و رۆژێن خەباتێ نە و ژ ھەر دەمێ بێتر ئەمێ جەسوورانەتر و دلسۆزانەتر و ب بیر و باوەره‌کە فرەھتر ئەمێ ب ئەرکێ دیرۆکی رابن، کو خەباتا گەلێ مە و خوینا شەھیدێن مە کو ب نەھەقی ھاتیە رژاندن، وی ئەرکی ل سەر ملە مە دا تینە.

ل ڤر ژی ئەز بانگا تەڤاھیا ھێز و ئالیێن سیاسی ئێن کوردستانی دکم، ب زووترین دەم ھممەتێ بکن و ناڤمالا خوە رێکبخن و ئبرەتێ ژ بوویەران وەربگرن، یەکرێزی ئا گەلێ مە بپارێزن و وێ یەکرێزیێ بھێز بکن، ژ بەر کو تەنێ و تەنێ ئەو ریا تەکانە ئا خەبات و کورداتیێ یە.

سلاڤ ژ بۆ جانێ پاکێ شەھیدێن کورد و کوردستانێ، سلاڤ ل پێشمەرگێن قارەمان، بژی کورد، بژی کوردستان

جهگرێ سه‌كره‌ته‌رێ گشتی ئێ یەکیتیا نشتیمانیا کوردستانێ

 کۆسرەت رەسوول ئەلی

18/10/2017