پاش کو بریارا رەفراندۆمێ ژ ئالیێ پارتێن سیاسی ئێن هەرێما باشوورێ کوردستانێ ڤە هاتە دایین، ب سەرۆکاتیا مەسعوود بارزانی سەرۆکێ وێ دەمێ یێ هەریما کوردستانێ، دەولەتێن هەرێمی مینا (ترکیێ، ئیرانێ و ئیراقێ) هەر زوو کەتن جەبهە گرتنێ ل دژی ڤێ بوویەرا دیرۆکی کو کوردان ب تەڤاهی بریار ل سەر دابوو، ڤان ده‌وله‌تان هەر زوو ب رێێن دیپلۆماسی هەولا ژ بنبرنا ڤێ پرۆسەیا دیمۆکراسی كر.

 ژ وان هەولان هەڤدیتنا زوو ب زوو یا سەرۆکوزیرێن ڤان ده‌وله‌تان و وەزیرێن بەرەڤانیێ بوو، هەر وەها پاش کو ڤان گەفان کورد ژ بریارا وان پاشگەز نەکری ب رێیا گەفا برسیکرنا خەلک و گرتنا دەریێن سینۆری و باله‌فرخانەیان، خواست کوردان ل بریارا خوە پاشگەز بکەن، لێ بەلێ کورد ل سەر ڤێ یەکێ موکر بوون و ل 25/9/2017ێ و د کەشەکێ ده‌مۆکراسی دا، 92.73٪ ژ گەلی باشوور بریار ل سەر سه‌رخوه‌بوونا کوردستانێ دا، هەولێن دەولەتێن دژمن بێ فایدە بوون و کوردان بریارا خوە دا.

پشتی ره‌فراندۆمێ، دەولەتێن هەرێمی مانوورێن خوە یێن سیاسی دەرباسی مانوورێن لەشکری کرن و ب لهەڤهاتنەکا ساختە لگەل گرۆپەکهێ د ناڤ یه‌كیتیا نشتیمانی یا کوردستانێ دا، کو پشترا ئەڤ گرۆپە ژ ئالیێ کۆسرەت رەسوول عەلی یێ سکێرتەرێ یه‌كه‌مێ ڤێ حیزبێ ڤە ب گرۆپێ “کالفامان” هاتە ناسكرن، كارین پتر ژ نیڤا خاکا باشوورێ کوردستانێ داگیر بکەن. ئەڤ رێکەفتنە بوو سەدەم کو دەولەتا ئیراقێ ب بەهانەیا سەپاندنا یاسایێ ب هەڤبەشی لگەل سپایێ پاسدارێن ئیرانێ و حەشدا شەعبی و حزبوللا یا لبنانی ژ ئالیێ باشوورا رۆژئاڤایێ کەرکووکێ، ل دەمژمێر 2:30 شەڤا 16 ئۆکتۆبەرا سالا 2017ێ دا، ئێریشی پێشمەرگەهان بکەن.

یا راست ل دەستپێکێ ئێریش هات تێک شکاندن

 یا راست ل دەستپێکێ ئێریش هات تێک شکاندن و 7 وەساییتێن هەمەر یێن حەشدێ و ئارته‌شێ هاتن ژناڤبرن و 14 چەکدار ژی هاتن بەرتەرەف کرن، ب وێ یەکێ ئەوان فام كر کو هاتنا ناڤا کەرکووکێ ب شەر کارەکێ هەری ب زەحمەتە، ناچار مان رێیا دویەمین بکاربینن کو ئەڤ رێیە چۆل کرنا هندەک ژ سەنگەرێن پێشمەرگە بوو کو رۆژەکێ بەرێ ئانکو ل 15/10/2017 ب رێیا لادانا بەربەستێن ل سەر پرا مەریەم بەگ حازری بۆ هاتبوون کرن، ل ڤر بۆ کە ئارته‌شا داگیرکار هات ناڤا کەرکووکێ دا بێ كو تەقەیێ بکەن و پێشمەرگە دۆرپیچ کرن.

ل باشوورا رۆژئاڤایێ کەرکووکێ پێشمەرگە هایداری چۆلکرن و هاتنا ئارته‌شێ بۆ ناڤا کەرکووکێ نەبوون، هەر ژبەر ڤێ یەکی 25 پێشمەرگە دکەڤن بیسەیەکا حەشدێ و هەر هەموو شەهید دبن. ب ڤی ئاوایی کەرکووک تێ داگیرکرن و ئارته‌شا ئیراقێ دگەل کرێ گرتییێن خوە هەول دا بەر ب هه‌ولێرێ بچن، لێ ل پردێ تووشی سکەستنەکا دیرۆکی هاتن کو پشان ئەم دێ ل سەر وێ داستانێ ب پەیڤن.

پشتی 16ێ ئۆكتۆبه‌رێ هه‌رێما باشوورێ کوردستانێ ل ژێر مەترسیێ دا بوو

لێ دا باس ل ئارمانجا سەرەکی یا پیلانا 16ێ ئوکتۆبەرێ بکەین: پاش کو کەرکووک هاتیە داگیرکرن ب نەچاری پێشمەرگە ژ سینۆرێ (مەخموور، شنگال و زمار) و ناڤچەیێن دی پاشڤە ڤەکێشیان، تاکو بکارن ئارمانجا سەرەکی یا دەولەتێن هەرێمی تێک بشکێنن کو ئەو ئارمانج ژی داگیرکرنا هەولێرا پایتەخت و دەستەسەرکرنا مەسعوود بارزانی و ژناڤبرنا ستاتۆیا هەرێما کوردستانی بوو، گەر ئەڤ یەک پیک هاتبا چ تشتەک ب ناڤێ هەرێما باشوورێ کوردستانێ نەدما و حکوومەتا ئیراقێ دا مینا پارێزگەهێن دی یێن ئیراقێ ره‌فتارێ لگەل باژارێن (دهۆک، هەولێر و سلیمانیێ) ئەنجام دەت.

 ل رۆژا 16ێ ئۆکتۆبەرێ دا، ئاراسێ شێخ جەنگی د ناڤا هێزێن داگیرکەر دا ژ بۆ مەدیایێ داخوەیانی دان و راگهاند، ئارتێش بەر ب هەولیرێ دچیت، یا راست هەر ب ڤی ئاوایی بوو، لێ ل پردێ پێشمەرگه‌یان رێ ل ئارته‌شا داگیرکەر گرت و شیان ئێریشا وان تێک بشکێنن، ئیران و ئیراق ل پردێ ل به‌ندا تێکشکاندنا پێشمەرگەهان بوون تاکو ئەو هێزا ئیران و ئیراقێ ب چاڤساغیا هندەک کوردان ل هیران و نازەنینان هاتیە بجیهکرن، ل وی ئالی ئێریشی هەولێرێ بکەن و داویێ ب باشوورا کوردستانێ بینن، ب ڤێ یەکی دا ئارمانجا ئیراقێ و ئیرانێ پیک هێت.

گەلو د ڤێ ناڤبەرێ دەا ئارمانجا ترکیێ د بەشداری کرن د ڤی پیلانی دا چبوو؟

 یا راست ترکیێ دو ئامانجین سەرەکی هەبوون کو ئەو ئامانج ژی ئەڤە بوون:

– دەرکرنا هێزێن پەکەکێ ل کەرکووکێ و رێ نەدان ب ڤەگەرانا وان ژ بۆ کەرکووکێ.

-دابرینا رۆژئاڤایێ کوردستانێ ژ باشوورێ کوردستانێ، ژبەرکو ترکیێ هەموو رێ ل رۆژئاڤا گرتبوون، تاکە رێیا نەفەس هەلکێشانا رۆژئاڤا دەریێ سێمالکا بوو کو دکەفتە د سینۆری دەسهلاتداریا حکوومەتا هەرێمێ دا.

پشتی 4 سالان ژ پیلانا 16ێ ئۆکتۆبەرێ ئەڤ پیلانە هێژان بەردەوامە، لی بەلێ ئەڤ جارە ب شێوازەکێ نوو ژ ئالیێ ترکیێ ڤە ب رێیا داگیرکرنا رۆژئاڤا کوردستانێ.