جه‌میل بایك رێ ژ بۆ سپایێ مهه‌مه‌د خوه‌ش دكه‌ بچه‌ رۆژئاڤا كوردستانێ

بایك رێ ژ بۆ سپایێ محه‌مه‌د خوه‌ش دكه‌ بچه‌ رۆژئاڤا كوردستانێ

بایك: پێویست بوو هه‌ر د زوو ده‌ ل گه‌ل رژیما سووریێ لهه‌ڤهاتن پێكهاتبا

ل دو رۆژێن رابووری كونسه‌یا برێڤه‌بر ئا كۆما جڤاكێن كوردستانێ دو جاران ب زه‌لالی ب ناڤێ ده‌ستهلاتا رۆژئاڤا كوردستانێ هه‌لوه‌ست راگهاندن، هه‌موه‌خت جڤاكا ناڤنه‌ته‌وه‌ئی هه‌ولێن وێ هه‌نه‌، ئه‌ردۆگان رازی بكن كو تێكلیا یه‌په‌گێ ب په‌كه‌كێ ڤه‌ تونه‌یه‌، د راستی ده‌ ئه‌ردۆگان ڤێ دخوازه‌.

هه‌ڤسه‌رۆكێ كونسه‌یا برێڤه‌بر ئا كۆما جڤاكێن كوردستانێ كه‌جه‌كێ، وه‌ختا كو ولاتێن ئه‌ورۆپایێ ژ بۆ چاره‌سه‌ركرنا پرسگرێكا رۆژئاڤا كوردستانێ هاتنه‌ خه‌تێ، ب تایبه‌ت پشتی هه‌ولێن سه‌رۆكێ فرانسایێ كو ب ئه‌ردۆگان ره‌ گۆتیه‌: (یه‌په‌گه‌ نه‌ په‌كه‌كه‌یه‌)، ژ نوو ده‌نگێ خوه‌ كر و فه‌رمان ژ بۆ ده‌ستهلاتا رۆژئاڤا كوردستانێ شاندن ژ بۆ كو چ ره‌فتاره‌كێ ب لهه‌ڤهاتنا ئاگربه‌ستێ بكن.

جه‌میل بایك هه‌ڤسه‌رۆكێ كه‌جه‌كێ ئیرۆ رۆژا یه‌كشه‌می 20/10/2019ان، ل هه‌ڤدیتنه‌كه‌ مه‌دیایی ده‌ ب د رێژی ل سه‌ر مژارا رۆژئاڤا كوردستانێ ئاخڤی یه‌ و وه‌كه‌ سه‌یوان و مه‌رجه‌عا یه‌په‌گێ و هه‌سه‌دێ فه‌رمان كرنه‌ و هه‌لوه‌ستا خوه‌ ئا ل سه‌ر لهه‌ڤهاتنا ئه‌نقه‌رێ ژی ئانیه‌ زمان.

بایك د به‌شه‌كا گۆتنێن خوه‌ یێن ئیرۆ ده‌ دبێژه‌: پێویست بوو هه‌ر دزوو ده‌ لهه‌ڤهاتنا هه‌سه‌دێ و ره‌ژیما به‌شار ئه‌سه‌دی پێك هاتبا، ژ به‌ر كو هێزێن سووریایا ده‌مۆكراتیك هه‌سه‌ده‌ تو جاره‌كێ نه‌خوه‌ستیه‌ ژ سووریێ جودا ببه‌، هه‌موه‌خت ته‌كه‌زی ل یه‌كپارچه‌یا خاكا سووریێ كریه‌.

جه‌میل بایك هه‌موه‌خت به‌هسا هه‌لوه‌ستێن ئه‌مه‌ریكایێ، رووسیا فه‌ده‌رال و ئه‌ورۆپایێ ژی كریه‌ و وها ئاخڤی: ئه‌مه‌ریكایێ كورد فرۆتن و ل گه‌ل رووسیا فه‌ده‌رال مه‌شروعیه‌تا ئێریشا سه‌ر رۆژئاڤا ب ئه‌ردۆگان هات داییه‌، ئه‌ورۆپایێ ئیخانه‌ ل گه‌لێ كورد كر.

بایه‌ك هه‌موه‌ختا ڤان گۆتنێن خوه‌، بانگ ل گه‌ل ژی كریه‌ كو ب تو ئاوایه‌كی ناڤچه‌یێن خوه‌ چۆل نه‌كن، هه‌ر چه‌ند ئێریشا داگیركاریێ توند و دژوار ببه‌.

كونسه‌یا برێڤه‌بر ئا جڤاكێن كوردستانێ دوهـ رۆژا شه‌می 19/10/2019 به‌یانه‌كه‌ نڤیسكی ل ده‌ربارا رۆژئاڤا كوردستانێ وه‌شاند و تێده‌ وه‌كه‌ سه‌یوانا سیاسی ئا یه‌په‌گێ و هه‌سه‌دێ ئاخڤی یه‌، هه‌موه‌خت گۆتنێن ئیرۆ ئێن جه‌میل بایك ئێ هه‌ڤسه‌رۆكێ كونسه‌یا كه‌جه‌كێ، ب زه‌لالی فه‌رمانێن په‌كه‌كێ ژ بۆ یه‌په‌گێ و هه‌سه‌دێ تێده‌ دهێن دیتن، ئه‌ڤ یه‌ك ژی ب رامانا دایینا مه‌شرووعیه‌تێ ب تركیێ تێ كو ئێریشا سه‌ر رۆژئاڤا دژوارتر بكه‌.

ئه‌ڤ هه‌لوه‌ستێن كه‌جه‌كێ ده‌ركه‌تنه‌ هۆلێ وه‌ختا كو ئه‌ورۆپا ب هێز ژ بۆ چاره‌سه‌ركرنا پرسگرێكا رۆژئاڤا كوردستانێ هاتنه‌ خه‌تێ، وه‌كه‌ هه‌ولێن ئه‌ممانوه‌ل ماكرۆن ئێ سه‌رۆكێ فرانسایێ كو ل رۆژا ئه‌ینی 18/10/2019ان د كۆنفه‌ره‌نسه‌كه‌ چاپه‌مه‌نیێ ده‌ گۆت كو وی ب ئه‌ردۆگان گۆتیه‌: (یه‌په‌گه‌ نه‌ په‌كه‌كه) یه‌، مه‌به‌ستا ماكرۆن ژ ڤێ گۆتنێ ئه‌وه‌ كو یه‌په‌گێ ته‌كۆشین ل دژی ته‌رۆرێ كریه‌، تێكلیا وێ ب په‌كه‌كێ ڤه‌ تونه‌یه‌، لێ به‌لێ جه‌میل بایكێ هه‌ڤسه‌رۆكێ كه‌جه‌كێ، پشتی وان گۆتنێن ماكرۆن دو جاران ده‌ركه‌ت و ب زه‌لالی ده‌ست نیشان كر كو په‌كه‌كه‌ سیاسه‌تێ ل رۆژئاڤا د مه‌شینه‌، ئه‌ڤ ژی گه‌ر ب به‌هانه‌ وه‌ره‌ مه‌یزه‌ كرن، دێ ژ بۆ ئه‌ردۆگان به‌س به‌ كو سپایێ مهه‌مه‌دی بشینه‌ رۆژئاڤا كوردستانێ.