هێرشا دەولەتا ترک ل چیایێ ئەزمەر شێوازەکێ نوویە 

ئاساییشا هەرێما کوردستانێ و ل پەی وێ پەکەکێ، ل سەر بوویەرا کوشتنا دوو ئەندامێن پەکەکێ «دەمهات عەگید» سەیدخان ئایاز و «جەمیل ئامەد» ئەسەر ئرماک، داخویانی بەلاڤ کرن.

دەمهات عەگید د تەمەنەکێ بچووک دا تەڤلی پەکەکێ ببوو، دەمەکێ‌ درێژ وەک زێرەڤانێ جەمیل باییك کار دکر و هایداری هەموو پەیوەندیێن کوور یێن سیاسی و شەخسی یێن جەمیل باییك بوو، دەمەکێ درێژ دەمهات ل سلێمانیێ دما و پەیوەندیێن جەمیل باییك دگەل یەکێتییا نشتیمانییا کوردستانێ و ئیرانێ ب رێڤە دبرن و بەردەوام ئاگاهی بۆ جەمیل باییك رێ دکرن.

دەمهات راستەراست پەیوەندی دگەل ده‌زگه‌ها ئیستیخباراتی یێ یەنەکێ «ده‌زگه‌ها زانیاری» دا هەبوو، ده‌ستوورییا مانا وی ل سلێمانیێ هەتا ئێمناهییا وی و خانیێ ئەو تێدا دما ژ ئالیێ لاهور شێخ جەنگی و پۆلات شێخ جەنگی هاتبوو تەئمین کرن، د هەمان دەمێ دا پەیوەندیێن پەکەکێ یێن دگەل هێزێن ناڤدەولەتی و هەرێمی ل سەر دەستێ دەمهات ب رێڤە دچوون.

هێرشا ترکان یا توند ل سەر وان هەردوو کەسان ئه‌گه‌را سەرەکی ئەوبوو کو ئەڤ کەس خودان رۆلەکێ تایبەت یێ دیبلۆماسی بوون و هەردوو کەس وەک «سندۆقێن ره‌ش» یێن جەمیل باییك بوون، ب کوشتنا ڤان هەردوو کەسێن کو وەک دەست و پێیێن جەمیل باییك دهاتنه‌ هه‌ژمارتن، ئەو پەیوەندیێن تاری و قرێژ بێ شاهد هێلان.

ده‌مهات و جه‌میل ب ئه‌گه‌رێ كارێن وان یێن تایبه‌ت هاتنه‌ ئارمانج كرن

داخویانیا پەکەکێ و کەجەکێ ل دەربارا ڤان هەردوو كادرێن خوە ئه‌و بوو كو حکوومەتا هەریما کوردستانێ و پارله‌مه‌نا کوردستانێ بوویەرێ ب زەلالی دیار بکه‌ن، بەره‌ڤاژی ئەسل ئەوە کو پەکەکە ب خوە دزانیت کو بوویەر چی یە و کێ ئاگاهی دایە و کێ ئەڤ کەس تەعقیب کرینە.

 داخویانییا پەکەکێ بەس ژ بۆ خاپاندنا گەلێ کوردە، د ڤان سالێن داویێ دا پەکەکێ هەموو بوویەرێن هاتینه‌ ژیان کرن حکوومەتا هەرێمێ وەکە بەرپرس دایە نیشاندان، گەلۆ پەکەکێ د خەباتا خوە یا باشوور دا کەنگی ئێزن ژ حکوومەتا هەرێمێ وەرگرتییە، هەتا نها ژی ئه‌و دانپێدانێ ب حکوومەتا هەرێمێ ناکه‌ن، پەکەکە هەموو کێماسی و نەباشیێن خوە ب حکوومەتا هەرێمێ دڤەشێریت، ئەسل کێماسییا سەرەکی یا پەکەکێ ب خوە یە، پێدڤییه‌ پەکەکە بوویەرا ئەزمەری و یێن بەرا وێ ژی ل گەل هەڤالبەندێن خوە و یێن دگەل وان بزاڤێ دکەن، گۆتوبێژ بکەن.

ل سەر هنده‌ك بوویەرێن بەری نها رووداین و پەکەکێ حکوومەتا هەرێمێ پێ سووچدار کری، ئەم دێ هندەک راستییان ئیفشا بکه‌ین، ئەو بوویەرا 15/8/2018ێ ل گوندێ کۆچۆ یێ سەر ب شەنگالێ روودای کو د ئەنجام دا‌ خۆرته‌كێ شنگالی هاتییه‌، کوشتن پەکەکێ ب لەزگینی حکوومەتا هەێمێ سووچدار کربوو، لێ بەلێ ل وێ ناڤچەیێ چ هێزێن پێشمەرگەی نینن و ناڤچە ل بن دەستهه‌لاتا پەکەکێ و حەشدا شەعبی دا یە.

ل گۆری تێلەفزیۆنا چرا یا سەر ب پەکەکێ ڤە، بەرا بالەفرێن ترکیێ بهێن ئۆتۆمبێلا «زەکی شنگالی» ژ ئالیێ کۆپتەرێن ئیراقێ هاتبوو تەعقیب کرن، به‌را باله‌فرێن ترکیێ هێرشێ ل سەر ئۆتۆمبێلا «زەکی شنگالی» بكه‌ن دیمەن هاتبوون گرتن.

ئەم بەحس ل بوویەرەکا دی یا کوشتنا 3 ئەندامێن کۆمیتا دیپلۆماسی یا پەکەکێ بکه‌ین کو ل 21 ئادارا 2019ێ ل نێزیكی ناڤچەداریا قەلادزێ یا سەر ب سلێمانیێ ڤه‌ روودا بوو، د ڤێ بوویەرێ دا 4 ئەندامێن کۆمیتا دیپلۆماسی و هەڤدەم بەرپرسێ خەباتێن باشوور «ناڤدار ئامەد، سەرحەد ڤارتۆ و سینانێ سۆر» هاتنه‌ کوشتن و «رزا ئالتۆن» ب برینداری دەرباس بوو. هەرچەنده‌ جهێ بوویەر لی چێبووی ل بن دەسهلاتا یه‌كێتییا نشتیمانی یا کوردستانێ دا‌ بوو، لێ بەلێ دوبارە داخویانییا پەکەکی هێرش بوو ل سەر حکوومەتا هەرێما کوردستانێ و ب چ ئاوایەکێ بەحس ل یەنەکی نەکر.

بوویەرا کوشتنا ئەندامێ سەرکردایه‌تییا پەکەکێ «دیار غەریب» ل 27/6/2019ێ چێبوو، لێ بەلێ کەجەکێ ل 5/7/2019ێ ئەڤ خەبەره‌ ئەشکەرە کر، ل گەل ڤێ هێرشێ 4 کەسێن مەدەنی ژی شەهید ببوون، «دیار غەریب» ب ئیزنا یەکیتیێ کۆمبوون ل قەلادزی و رانیێ ساز کربوون، پشتره‌ ب زانینا یەنەکێ بەر ب قەندیلێ دچیت، لێ دیسان پەکەکێ حکوومەتا هەرێمێ ب کوشتنا «دیار غەریب» سووچدار کر و گەفێن تۆلڤه‌كرنێ ل حکوومەتا باشوور کرن.

بۆچی په‌كه‌كێ د بوویه‌را كوشتنا «ده‌مهات عه‌گید و جه‌میل ئامه‌د» دا‌ ناڤێ یه‌نه‌كێ ب زه‌لالی ئینا

گەر پەکەکە دخوازیت راستییا کوشتنا «دەمهات عەگید و جەمیل ئامەد» فام بکەت بلا ڤێ پرسی ژ هەڤالبەندێن خوە یێ ستراتیجی «پۆلات شێخ جەنگی و لاهۆر شێخ جەنگی» بکەت

 د ڤێ بوویەرا داویێ دا ژی یا کوشتنا «ده‌مهات عه‌گید و جه‌میل ئامه‌د» پەکەکێ دژاتییا خوە ل هەمبەر حکوومەتا باشوور نیشان دا، لێ بەلێ ب جوداهییەکا بچووک، جوداهی ئه‌وه‌ کو یەکەم جارە پەکەکە ب زەلالی باس ل هەڤالبەندا خوە یەنەکێ دکەت و زەلالیێ ژێ دخوازیت، گەلو دبیت ئه‌گه‌ر چ بیت کو ئەڤ جاره‌ پەکەکی ناڤێ یەنەکی ئینا و داخوازا زەلال کرنێ ژێ كربیت؟

ئەڤ بوویەرە هەموو ڤێ راستیێ دیار دکه‌ن کو پەیوەندیێن پەکەکی یێن تاری دگەل ئیستیخباراتا ترکیێ «میت»ێ و ئیستیخباراتا ئیرانێ «ئیتیلاعات»ێ و یا یەنەکی «زانیاری» بنگەهێ خوە وه‌ردگریت، ژ بۆ ڤێ بوویەرێ ژی پەکەکە باش فام دکەت کو دەستهه‌لاتا حکوومەتا هەرێمێ ل سەر ئاسمانێ هەرێمێ نینه‌، بەلکو ئەڤ یەک د دەستهه‌لاتا حكوومەتا ناڤەندی یا ئیراقێ دا‌ یە، لێ بەلێ هەر هێرشەکا ئاسمانی یا ل سەر پەکەکێ چێدبیت و دبیته‌ ئەگەرا کوشتنا ئەندام و كادرێن وێ، پەکەکە راستە راست حکوومەتا هەرێمێ سووچدار دکەت، ژ ڤێ یەکێ ژی پەکەکێ ب تەنێ یەک ئارمانج هەیە، ئەو ئارمانج ژی ئەڤەیه‌ کو حکوومەتا هەرێما کوردستانی ل بەرچاڤێن خه‌لكی بێخیت و رەش بکەت.

گەر پەکەکە دخوازیت راستیا کوشتنا «دەمهات عەگید و جەمیل ئامەد» فام بکەت بلا ڤێ پرسی ژ هەڤالبەندێن خوە یێن ستراتیجی «پۆلات شێخ جەنگی و لاهۆر شێخ جەنگی» بکەت، ل هەمان دەمێ بەرسڤا هەری راست ل جەم پەکەکێ و جەمیل باییك ب خوە هەیە.