سێ سه‌رۆكتیێن هه‌رێما باشوورێ كوردستانێ، ئیرۆ جڤینه‌كه به‌رفره‌هـ ل گه‌ل ئالیێن سیاسی ئێن كوردستانێ ل دارخست و تێده هه‌لوه‌ستا خوه ئا ل ده‌ربارا ره‌وشا ئیراقێ ئه‌شكه‌ره كرن، ئالیێن كوردستانی یه‌ك ده‌نگبوون كو ئه‌ڤا ل ئیراقێ چێدبه ب سه‌ده‌ما كێماسیێن كۆمبوویی یێن سالێن ده‌رباسبووی یه.
ئیرۆ سێشەمی 5/11/2019ان ب ئامادەبوونا د. بەرھەم سالھ سەرۆک کۆمارێ ئیراقا فەدەرال، نێچیرڤان بارزانی سەرۆکێ ھەرێما کوردستانێ، مەسروور بارزانی سەرۆکێ ھکوومەتا ھەرێما کوردستانێ، رێواز فایق سەرۆکا پارلەمەنا کوردستانێ، دەستەیا سەرۆکتیێن ھەرێما کوردستانێ و سەرۆک و نوونەرێن ئالیێن سیاسیێن ھەرێما کوردستانێ، ل سەرۆکتیا ھەرێما کوردستانێ ل ھەولێرێ، ژ بۆ نیقاش كرنێ د دەربارێ رەوشا ئیراقێ و ئەگەر و پێشھاتان و باندۆرێن وێ یێن ل سەر پرۆسەیا سیاسی ل ئیراقێ ب گشتی و ھەرێما کوردستانێ ب تایبەتی جڤینەکە بەرفرەھ ئەنجام دان.
ھەموو بەشدارێن جڤینێ ب گرینگیێ ڤە ل روودانێن ئیراقێ دنێرن و وھا باوەرن کو ئەوێ ئیرۆ ل قادا سیاسی و ئیداریا ئیراقێ ده رووددە، ئەنجاما کێماسیێن کۆمبوویێن چەندین سالیا ھوکمرانی و ب جیھ نەکرنا دەستوورێ بوویە، ژ بۆ وێ یەکێ ل جڤینێ ده ب دلگرانی ڤە رەوش نرخاندن، ل ھەمان دەمی دە ژ بلی دەربرینا دلگرانیێن ل بەرانبەر قوربانیێن خوەپێشاندەران و ھێزێن ئه‌وله‌كاریێ، ته‌كه‌زر ل مافێ رادەربرین و ئازادیا ولاتییان ل داخوازکرنا مافێن وان دە کرن.
بەشداربوویێن جڤینێ ل گەل داخوازێن رەوایێن خەلکێ ئیراقێ نە و پشتەڤانن کو ھکوومەتا ئیراقێ رێکارێن پێویست ژ بۆ چاکسازی و ب دەنگ ڤە ھاتنا داخوازیێن رەوایێن وان ل بەر بگرن.
ل جڤینێ دە پاراستنا ئارامیا ئیراقێ و دامەزراوێن دەستووری و یاساییان ب پێویست زانین، ل گەل بەر چاڤ گرتنا رەوشا ناڤچەیێ و ئەگەر و گەفێن سەرھلدانا تەرۆرێ و ھێزێن توندرەو ل سەر ئیراقێ، ب تایبەتی باندۆرا وان یا ل سەر ناڤچەیێن کوردستانیێن دەرڤەیێ ئیدارەیا ھەرێمێ.
مژارەکە دنێ جڤینێ تایبەت بوو ب ھەڤھەلوەستیا ئالیێ سیاسیێن ھەرێما کوردستانێ ل بەشداریەکی ب باندۆریا ژ بۆ چارەسەرکرنا گرفتێن ئیراقێ ب گشتی و داکۆکیکرنا ل مافێن دەستووریێن ھەرێما کوردستانێ و تەڤاھیا پێکھاتان.
ل ڤی دەرباری دە تەکەز ل سەر ھەولێن ئالیێن سیاسیێن کوردستانێ یا ژ بۆ ھەڤکاریکرنا ئیراقێ یا ب ناڤێ دەرباسبوونا ژ قەیرانان و دەستەبەرکرنا ھوکمرانیەکی درست و پێکانینا چاکسازی و بەر ب چاڤ گرتنا مافێن ھەموو پێکھاتان کرن.
بابەتا داخوازیا سه‌راستكرنا دەستوورا ئیراقێ، مژارەکە دن یا گرینگ یا جڤینێ بوو. ل ڤی دەرباری دە بەشدابوویێن جڤینێ تەکەز کرن کو ل ھەر سه‌راستكرنه‌كا دەستوورێ ده دڤێ سیستەما فەدەرالی و ماف و ئازادیێن ھەموو پێکھاتێن ئیراقێ و ماف و تایبەتمەندیێن ھەرێما کوردستانێ و قەوارە دەستووریا وێ پاراستی بن.
بەشدارێن جڤینێ تەکەز کرن کو ئەولەویەتا ھەرێما کوردستانێ و سازی و دامەزراوە و ئالیێن دن، پاراستنا ئارامی و دەستکەفت و بەرژەوەندیێن ھەرێما کوردستان و ئیراقێ و رووبرووبوونا تەرۆر و بەردەوامیا پرۆسەیا چاکسازیێ دبێ و پشتەڤانیا چاکسازیێن ل ئیراقێ دکن. ب ڤێ ناڤێ ده ژی ھەموو کوردستانیان دلنیا دکن کو ب یەکرێزی و یەک ھەلوەستی کار دکن و دەستکەفت و بەرژوەندیێن ھەرێما کوردستانێ دپارێزن.
