ئه‌مه‌ریكا دبێژه ئه‌ردۆگانی خه‌لیفێ دائیشێ د پاراست
هه‌یا به‌ری كوشتنا وی ئه‌ردۆگان دگه‌ل به‌خدادی ل سه‌ر خه‌ت بوو
سه‌رۆكێ تركیێ ئه‌ردۆگان دكه‌ڤه به‌ر هنه‌ك گومان و سووچێن دن د مه‌له‌فا ئه‌بو به‌كر به‌خدادی یێ خه‌لیفێ دائیشێ ده، لێ ئه‌ڤ جار هه‌ڤپه‌یمانا تركیێ ئه‌ڤ سووچ خستنه پال ئه‌ردۆگان، وه‌ختا به‌رپرسیاره‌كێ به‌رێ یێ كۆچكا سپی ئه‌شكه‌ره كری كو به‌خدادی خه‌لیفه و رێبه‌رێ دائیشێ ل ژێر پاراستنا ئه‌ردۆگان ده بوو.
ل 26 جۆتمه‌ها ئیسالێ خه‌لیفه به‌خدادی ل گوندێ باریشا یێ سینۆرێ ئیدلبێ د ئۆپه‌راسیۆنه‌كه ئه‌مه‌ریكایێ ده تێ كوشتن، ئه‌ڤ ناڤچه راسته راست ل ژێر چاڤدێریا تركیێ ده بوو، ب گوتنه‌كه دن خانیێ كو به‌خدادی تێده ژیان دكر ب هنه‌ك كیلۆمه‌ترین كێم دووری بنگه‌هـ و ناڤه‌ندێن ئارته‌شا تركیێ یێن ل سینۆرێ ئیدلبێ بوو، ئه‌ڤ یه‌ك سه‌ده‌ما سه‌ره‌كه یا ڤه‌كرنا ده‌ریێ گۆمانان بوو كو تركیێ هایا وێ ژ جیێ به‌خدادی و مالباتا وی هه‌بوو، به‌لكو راسته راست ل ژێر پاراستنا وێ ده بوو.
ل گۆر پێگه‌ها گلۆبالیست، برێت مه‌كگۆرك شاندیێ تایبه‌ت یێ دۆنالد ترامپ ئێ سه‌رۆكێ ئه‌مه‌ریكایێ ژ بۆ هه‌ڤپه‌یمانێتیا ناڤنه‌ته‌وه‌ئی ئا ل دژی دائیشێ پێزانین ل سه‌ر مه‌له‌فا كوشتنا به‌خدادی، جیێ ڤه‌هه‌ویانا وی و هه‌موه‌خت كوشتنا وی دانه، هه‌ر چه‌ند كو ئه‌ڤ پێزانێن مه‌كگۆره‌ك نه پێزانینه‌كه نوویه ئه‌شكه‌ره دبه، لێ به‌لێ وه‌كه دانپێدانه‌كه فه‌رمی ژ ئالیێ به‌رپرساره‌كه ئه‌مه‌ریكایێ تێن فێم كرن.
شاندیێ به‌رێ یێ سه‌رۆكێ ئه‌مه‌ریكایێ ژ بۆ ئیراقێ و سووریێ دبێژه: تركیێ تو ئالیكاریه‌ك ژ بۆ ده‌ست نیشان كرنا جیێ به‌خدادی نه‌كر، هه‌ر چه‌ند كو به‌خدادی ل نێزی ناڤه‌ندێن ئارته‌شا تركیێ ل سینۆرێ ئیدلبێ ڤه‌شارتی بوو، ئه‌ڤ یه‌ك دبه به‌لگه‌یه‌كه ئه‌شكه‌ره كو ئه‌نقه‌رێ به‌خدادی د پاراست.
مه‌كگۆرك وها دبێژه: «ئه‌مه‌ریكایێ هه‌ست كر كو ترك نه‌ئالیكاره، له‌وما بریار دا ئێریشا سه‌ر جیێ به‌خدادی ژ ئیراقێ وه‌ره پێكانین نه ژ تركیێ، هه‌ر چه‌ند كو تركی پێتر نێزی جیێ خه‌لیفه بوو».
ئه‌ڤ گۆتنێن برێت مه‌كگۆرك هه‌موه‌ختا پێله‌كه دژوار ئا سووچباریا جڤاكا ناڤنه‌ته‌وه‌ئی ژ بۆ ئه‌نقه‌رێ تێن، داخوه‌یانیا ئیستخباراتا ئیراقی ژی ل بیر تینه وه‌ختا راگهاندی كو برایێ ئه‌بو به‌كر به‌خدادی ب چاڤساغیا رایه‌دارێن تركیێ گه‌له‌ك جاران سه‌ردانا ئیستانبۆلێ كریه، هه‌ر وها به‌یانا وزاره‌تا كارێن ده‌رڤه یا ئه‌مه‌ریكایێ وه‌ختا ناڤێن هنه‌ك به‌رپرسیارێن تركیێ ئه‌شكه‌ر كرین كو په‌ره‌یان ژ بۆ رێخستنا دائیشێ دشینن.
ئه‌مه‌ریكایێ هه‌بوونا تێكلیه‌كه ڤه‌شارتی یا ئه‌نقه‌رێ و به‌خدادی ب زارێ برێت ماكگۆرك شاندیێ به‌رێ یێ سه‌رۆكێ ئه‌مه‌ریكایێ بۆ هه‌ڤپه‌یمانێتیا شه‌رێ دائیشێ ده‌رخستن، ل ڤر پرسا كو تێ كرن ئه‌ڤه: گه‌لۆ چما واشنتۆنێ ئه‌ڤ ب سه‌رێ ئه‌نقه‌رێ ئانی؟ به‌رسڤ ب نه‌رینا پێگه‌ها گلۆبالیسیت ئه‌ڤه كو ئه‌مه‌ریكایێ د خوه‌ست هنه‌ك ئارمانجێن سیاسی ب ئۆپه‌راسیۆنا كوشتنا به‌خدادی بجی بكه، ئه‌و ئارمانج هه‌گه‌ر ل سه‌ر هه‌سابا تركیێ ژی به، ژ بۆ ئه‌مه‌ریكا تو پسگرێك نینه، ئه‌مه‌ریكا ل داویێ سه‌رساغ ژ سووچێن چێكرنا به‌خدادی ده‌رچوو، هه‌ری كێم روویێن خوه ل به‌رانبه‌ر جڤاكا ناڤنه‌ته‌وئی سپی كرن، بۆ ئه‌مه‌ریكا گرینگ نینه ئه‌گه‌ر روو سپی بوونا وێ ل سه‌ر هه‌سابا هه‌ڤپه‌یمانا وێ تركیێ به.
گۆتنێن برێت مه‌كگۆرك هنه‌ك پێزانێن سه‌نته‌ری له‌كۆلینێن ستراتیجی یێ كوردی ژی سه‌راستكرنه، وه‌ختا ب به‌رده‌وامی ل سالێن ده‌رباسبووی دیكۆمه‌نتێن هه‌بوونا تێكلیا ل ناڤبه‌را ئه‌ردۆگان و به‌خدادی د وه‌شاندین، سه‌نته‌را له‌كۆلینان ئه‌شكه‌ره كربوو كو ئه‌ردۆگان ب رێیا هاكان فیدان سه‌رۆكێ ئیسخباراتا تركیێ و سه‌رهه‌نگێ خانه‌نشین كه‌مال ئاسكین تان په‌یوه‌ندی ب به‌خه‌دادی ره دكر، ئه‌ڤ په‌یوه‌ندی هه‌یا وه‌ختا كوشتنا به‌خدادی ل گوندێ باریشا یێ سینۆرێ ئیدلبێ د به‌رده‌وام بوون.
