بلۆمبێرگ: «مه تاقه‌تا ئه‌حمه‌قی نه‌ما دێ خوه كاندید كه‌م»
ملیاردێرێ ئه‌مه‌ریكی مایكل بلۆمبێرگ رادگه‌هینیت، وی بریارا دایه خوه ژ بۆ هلبژارتنێن سه‌رۆكتیا ئه‌مه‌ریكایێ یێن سالا 2020ێ كاندید بكه‌ت، ژ به‌ر كو ب گۆتنا وی، وان تاقه‌تا ئه‌حمه‌قیێن ترامپی بۆ 4 سالێن دن نه‌مایه.
مایكل بلۆمبێرگ ملیاردێرێ ئه‌مه‌ریكی و ئه‌ندامێ هه‌ری دیار یێ پارتییا ده‌مۆكراتان، داخوازییا خوه یا كاندیدكرنێ ژ بۆ سه‌رۆكتیا ئه‌مه‌ریكا دایه پارتیا خوه و دبێژه: «ژ به‌ر كو وان تاقه‌تا ئه‌حمه‌قیێن دۆنالد ترامپ بۆ 4 سالێن دن نه‌مایه».
بلۆمبێرگ ته‌مه‌ن 77 ساله ئه‌و رادگه‌هینیت، وی 30 ملیۆن دۆلار ژ بۆ هه‌وا بانگه‌شه‌یا خوه ژ بۆ سه‌رۆكتیا ئه‌مه‌ریكایێ ته‌رخان كرنه و ل سه‌ر پێگه‌ها خوه نڤیسایه: «ئه‌و دێ خوه به‌ربژار كه‌ت و ترامپی راستی شكه‌ستنێ كه‌ت».
مایكل بلۆمبێرگ هه‌روها گۆتییه: «مه شیان نینن بۆ 4 سالێن بهێت ته‌حه‌مولا ره‌فتارێن ترامپ یێن به‌ره‌لا و نه ئه‌خلاقی بكه‌ین، ترامپ ب گه‌ف ل سه‌ر مانا ئه‌مه‌ریكایێ و پره‌نسیپێن وێ تێ هه‌ژمارتن، گه‌ر ویلایه‌ته‌كا دن بر، ئه‌مێ باجه‌كا گران بده‌ین».
مایكل بلۆمبێرگ ملیاردێرێ ئه‌مه‌ریكی كو سه‌رمایێ وی دگه‌هیته 50 ملیار دۆلاران، دێ دگه‌ل 17 كاندیدێن دن بزاڤا بده‌ستخستنا ره‌زامه‌ندیا پارتیا خوه یا ده‌مۆكرات كه‌ت ژبۆ ده‌ست نیشان كرنا وی ژ بۆ هه‌ڤركیا ترامپی ل هلبژارتنێن 2020ێ.
