سه‌رۆك وه‌زیرێ مه‌سروور بارزانی ئیرۆ سه‌ردانا تركیێ كر و ل ئه‌نقه‌رێ ژ ئالیێ مه‌ولوود چاویشئۆغلۆ وه‌زیرێ كارێن ده‌رڤه هات پێشوازی كر، مه‌سروور بارزانی راگهاند، ئه‌و دگه‌ل هه‌بوونا په‌كه‌كێ ل شه‌نگالێ نینن.
مه‌سروور بارزانی سه‌رۆك وه‌زیرێ هه‌رێما باشوورێ كوردستانێ ئیرۆ رۆژا پێنجشه‌می 28/11/2019ێ دگه‌ل شانده‌كه حكوومه‌تا باشوور سه‌ردانا تركیێ كر، ئه‌ڤ سه‌ردان ل سه‌ر داخوازیا فه‌رمی یا ده‌وله‌تا تركیێ هات پێكانین.
مه‌سروور بارزانی یه‌كه‌م جڤینا خوه ل ئه‌نقه‌رێ ل گه‌ل مه‌ولوود چاویشئۆغلۆ وه‌زیرێ كارێن ده‌رڤه پێكانی، هه‌ردو ئالیان تێكلیێن دو ئالی ره‌وشا ناڤچه‌یێ ب گشتی نیقاش كرن.
مه‌سروور بارزانی و مه‌ولوود چاویشئۆغلۆ كۆنفرانسه‌كه چاپه‌مه‌نیێ یێ هه‌ڤپار پێكانی و تێده ئه‌نجامێن جڤینا خوه و پرسێن مه‌دیاكاران به‌رسڤاندن.
مه‌سروور بارزانی د به‌رسڤا پرسه‌كێ ده ل ده‌ربارا شه‌نگالێ گۆت: «كۆنترۆلا شه‌نگالێ د ده‌ست حكوومه‌تا هه‌رێما كوردستانێ ده نینه، به‌لكو د ده‌ست حكوومه‌تا ئیراقا فه‌ده‌رال ده‌یه، هه‌موه‌خت ل ده‌ربارا په‌كه‌كێ و هێزێن گرێدای وێ ده‌ست نیشان كر كو حكوومه‌تا باشوور ل گه‌ل هه‌بوونا په‌كه‌كێ د شه‌نگالێ ده نینه».
د ڤێ ده‌ربارێ ده، وه‌زیرێ كارێن ده‌رڤه یێ تركیێ ته‌كه‌ز كر كو هه‌بوونا پارتیا كاركه‌رێن كوردستانێ په‌كه‌كێ د هوندرێ شه‌نگالێ ده ب خه‌ته‌ر تێ هه‌ژمارتن.
مه‌سروور بارزانی یه‌كه‌م جاره وه‌كه سه‌رۆك وه‌زیرێ هه‌رێما باشوور سه‌ردانا تركیێ دكه‌ت و ئه‌ڤ سه‌ردان ژ ده‌ستپێكا دامه‌زراندنا كابینه‌یا 9 سه‌رۆكتیا تركیێ ژ مه‌سروور بارزانی داخواز كربوو.
