ل سالا 1988ان پشتی کارەساتا ھەلەبچە کو تێدا پێتری پێنج ھەزار کوردێن بێ تاوان ب کۆم ژ ئالیێ دەولەتا ئیراقێ ڤە ب چەکێ قەدەخە کری ڤە ھاتن شەھید کرن، ھەروەھا ژبەر ھەبوونا پارتییا دەمۆکرات ئا کوردستانێ ل دەڤەرێن ھەڤسینۆر دگەل باکورێ کوردستانێ کو ب پارتییەکە ناسیۆنالیزما کوردستانێ تێ ناسکرن، پێلەکە ھزر و ھەستا “ناسیۆنالیزم”ی ئا ھەری مەزن ل باکورێ کوردستانێ ب گشتی و تایبەتی ل ناڤچەیێن بۆتان و جزیرێ پەیدا دبە، ترکیێ ھەر زوو ھەست ب ڤێ یەکێ و مەترسیا وێ لسەر ترکیێ دکە ژبەر ڤێ یەکێ ھەول ددە رێگرییێ ل ڤێ یەکێ بکەت.
ترکیێ ژ بوو رێگرتن ل بەلاڤ بوونا ھزرا نەتەوەیی ل باکوورێ کوردستانی و رێگری کرن ل کوردێن باکوورێ کوردستانێ ب دووڤچوونا پارتییا دەمۆکراتا کوردستانێ ھەژمارەک ژ زەلامێن خوەێن ئیستخباراتی و پەروەردە کری ژ ئالیێ میتێ ڤە ئەرکدار دکە کو ل چارەسەریێ بگەرن، چارە ژی ل جەم ترکیێ ب تەنێ دیتنا شوونگرەکێ بوو ل جھێ پارتییا دەمۆکرات کوردستانێ و ھزر و فەلسەفەیا جەنەرال مەلا مستەفایێ بارزانی، ترکیێ بریار دا کو ب رێیا زەلامێن خوە PKK و ئۆجالان ب ڤێ یەکێ ئەرکدار بکن.
ژبۆ ڤێ یەکێ ھەژمارەکە زێدە ژ رۆژنامەڤانان دچن “دۆلا بیقاع و شامێ” و ھەڤدیتنان دگەل ئۆجالان پێک دئینن، دبە چوونا رۆژنامەڤانان بوو جەم کەسەک سیاسی کارەکە نۆرمال بە لێ بەلێ ئەڤ رۆژنامەڤانێن دچوون جەم ئۆجالان رۆژنامەڤانێن درست نەبوون بەلکو ئەو نوونەرێن دەولەتا ترکیێ بوون، ئەم دکارین وەھا ببێژین کو ئەڤ ھەڤدیتنە، ھەڤدیتنا دناڤبەرا دەولەتا ترکیێ و ئۆجالان بوون.
ئا راست ھەیا ڤێ دەمێ خەلکێ ب باشی نە ئۆجالان ناس دکر نە پەکەکە لێ بەلێ ب سایا چوونا ڤان ب ناڤ رۆژنامەڤانان و درست کرنا بەرنامەیێن مەدیایی و رەپۆرتاژێن رۆژنامەڤانی و بەرچاڤ کرنا وان رەپۆرتاژ و بەرنامەیان لسەر کەنالێن گرێدایی دەولەتا ترکیێ ئێدی ھەر کەسێ پەکەکە و ئۆجالان ب باشی ناس کرن، ب واتایەکە دن ئەم دکارن ببێژین کو ئەڤ یەک پیلانەکە بەرنامە کری ئا دەولەتا ترکیێ بوو ژ بوو وێ یەکێ کو پەکەکێ و ئۆجالان ب گەلێ کورد رە بدن ناسکرن تاکو بکارن رێ ل ھمبەر وێ حەز و ڤییانا گەلێ کورد ل باکور ل ھمبەر باشوورێ کوردستانێ و PDK درست بووی کێم بکن و بەر ب تونە کرنێ ببن.
د ڤان ھەڤدیتنان دە کەسێ ژ ھەموویان گرنگ تر زەلامێ دەولەتا ترکیێ “یالچین کوچوک” بوو، یالچین کوچوک پێش ڤێ سالێ دگەل کۆمەک ژ زەلامێن دەولەتێ کۆڤارەک ب ناڤێ کۆڤارا رزگاری دەردکن کو تێدە باس ل پککعێ و ئۆجالان دکن، ھەرچەند د ڤێ سەردەمێ دە وەرگرتنا مۆلەتا کۆڤارەکێ و باس کرنا کوردان تێدە کارەکە ھەری زەھمەت بوو، لێ بەلێ ئەڤ یەک ژ بۆ کەسەکێ مینا یالچین کوچوک کارەکە پر ئاسان بوو ژبەرکو ئەو زەلامێ دەولەتێ بوو.
یالچین کوچوک دچە دۆلا بیقاع ل لبنانێ و ھەڤدیتنێن مەدیایی دگەل ئۆجالان ساز دکە، پاش کو ئەو ڤەدگەرە ترکیێ ل بالەفرخانەیا ترکیێ تێ دەستەسەر کرن و ئەو ڤیدیۆ و رەپۆرتاژێن وی دگەل ئۆجالان ئەنجام دای لسەر کەنالێ TRT تێن بەرچاڤ کرن و ب ڤی ئاوایی ئۆجالان ب خەلکێ رە ددن ناساندن و پرۆپاگندەیان ژ بۆ وی و پارتییا وی دکن.
تێکلییێن ئۆجالان و یالچین کوچوک ب ئاستەکە وھا پێشدە دچن کو ئۆجالان راستە راست بریارێن ترکیێ ب رێیا کوچوک وەردگرە و جێبەجێ دکە، کوچوک دبە سەدەم کو ل سالا 1993ان دە پەکەکە ئاگربەستێ دگەل دەولەتا ترکیێ راگەھینە، ھەرچەند کو ئەڤ ئاگربەستە بوو دەمەکە کورت بوو لێ بەلێ بابەت ب تەنێ نە ئەڤە، ژبەرکو ژ وێ رۆژێ پاش پەکەکێ ھەڤدیتنێن کوور دگەل رایەدارێن ھەری بلند ئێن دەولەتا ترکیێ پێک ئانین، ئۆجالان ب بکار ئانینا ئاخافتنەکە ھەری نەرم ل ھمبەر دەولەتا ترکیێ پەیڤا شەر ب دەولەتێ رە لاواز و کێم بھا کر.
