د شەواتەکێ ده‌ ل هندستانێ 43 کەسان جانێ خوە ژ دەست دا

د شەواتەکێ ده‌ ل هندستانێ 43 کەسان جانێ خوە ژ دەست دا

ل گۆر رایەدارێن فەرمی پێتری 43 کەسان د شەواتەکە هەری مەزن دە ل شرکەتەکێ ل باژارێ نیو دێلهی، ئا پایتەختا هندستانێ جانێ خوە ژ دەست دا.

ئەڤ شەواتە ل سەرێ سبێ یا ئیرۆ رۆژا یەکشەمی 8/12/2019ان د بەشێن کەڤنار ئێن باژارێ دێلهی کەت و وەسائیتێن ئاگرڤەمراندنێ زوو هاتن رەوانە کرن ژ بۆ جهێ شەواتێ.

ل گۆر هێزێن بەرەڤانیا باژێر هەری کێم 100 کەس ژ کارکەران د ئاڤاهیێن بلند ئێن ڤێ شرکەتێ د وێ دەمێ دە د خەو بوون و ئەڤ یەک بو سەدەما بلند بوونا زیانێن جانی د ڤێ شەواتێ دە.

ئامیت شاه، وەزیرێ ولاتێ هندستانێ ڤێ بوویەرێ ب «ژ دەست دانا ب خەم ئا جانێن پر بها» وەسف دکە.

ناریندا مۆدی، سەرۆک وەزیرێ هندستانێ گۆتیە کو رایەدار و بەرپرس «هەموو ئیمکانات و خزمەتگوزاریان ژ بۆ کۆنترۆل کرنا ڤێ شەواتێ  بکار بینن».

جیێ کو ئەڤ شرکەتە تێدە، د بەشەکە باژێری دە یە کو دکان و شرکەتێن بچووک ئێن هەری زێدە تێدە نە و رێێن بچووک و تەنگ هەنە ژ بۆ گهشتن ب جیێ شەواتێ، ئەڤە هەموو بوونە سەدەما وێ یەکێ کو گهشتن ب جیێ شەواتێ دژوار بە.

هەیا دەمژمێر 9:30 سەرێ سبێ 60 کەس پێتر ب سەدەما ڤێ بوویەرێ هاتنە رەوانە کرن ژ بۆ نەخوەشخانەیێ.