نێچیرڤان بارزانی ل ده‌ربارا خوه‌پێشاندانێن ئیراقێ داخوازا یاساپارێزیێ كر

نێچیرڤان بارزانی ل ده‌ربارا خوه‌پێشاندانێن ئیراقێ داخوازا یاساپارێزیێ كر

سەرۆکێ ھەرێما باشوورێ کوردستانێ تەکەز ل سەر نەتوندوتیژی و یاساپارێزی و ره‌فتارا مەدەنیانە یا ل گەل خوەپێشاندەرێن ئیراقێ کر و ھەموو ھەڤکاریەکێ ھەرێما کوردستانێ ژ بۆ ئارامی یا ئیراقێ و چارەسەر کرنا کێشەیان دەربری.

ل ھەڤدیتنەکە بەری نیڤرۆ یا ئیرۆ یەکشەم 15/12/2019ان ل ھەولێرێ ل گەل برێز ڤنجەنت گوڵاومە بەرپرسێ نڤیسینگەھا یه‌كێتیا ئەورۆپا ل ھەرێما کوردستانێ، نێچیرڤان بارزانی ب کورتی د دەربارێ رەوشا ھەرێما کوردستانێ و گۆتوبێژا د ناڤبەرا ئالیێن سیاسیی ێن ژ بۆ پێکانینا ھەڤپەیمانیا فراکسیۆنا کوردستانیان ل بەخدا و گۆتوبێژا ھەولێر و بەخدایێ باس كر.

ژ ئالیێ خوە ڤە بەرپرسێ نڤیسینگەھا یه‌كێتیا ئەورۆپا سپاسی ھێسانکاری و ھەڤکاریێن ھەرێما کوردستانێ یا ژ بۆ کارێن وان کر و گرینگیدانا ھەرێما کوردستانێ ب رەوشا کۆچبەر و پەنابەران ب تایبەت ئەو پەنابەرێن ل ئەنجاما ئالۆزیێن ڤێ داویێ ل سووریێ روودان، ل ھەرێما کوردستانێ کریە بلند نرخاند، ھەڤکاری و ھەماھەنگیا د ناڤبەرا یه‌كێتیا ئەورۆپا و ھەرێما کوردستانێ ژی ل ھەڤکاریکرنا پەنابەران دوپات کر.

نرخاندنا روودانێن ناڤچەیێ ب گشتی و خوەپێشاندانێن ئیراقێ ب تایبەتی، ھەر وھا رەوشا ناڤچەیێن کێشە ل سەر و دەشتا نه‌ینه‌وایێ، ئالیەکی دنێ ڤێ ھەڤدیتنێ بوو.