سه‌رۆكێ پارتیا ده‌مۆكراتا كوردستانێ و رێبه‌رێ ملله‌تێ كورد مه‌سعوود بارزانی ئیرۆ راگهاند، ئالا كوردستانێ هێمایا یەکگرتن، ئازادیخوازی، قوربانیدان و ئاشتیخوازیا گەلێ کوردستانێ یە.
مه‌سعوود بارزانی ئیرۆ رۆژا سێشه‌می 17/12/2019ان ب هه‌لكه‌فتا رۆژا ئالایا كوردستانێ په‌یامه‌ك وه‌شاند و تێده گۆتییه: ئالا كوردستانێ هێمایا یه‌كگرتنا گه‌لێ كوردستانێ یه، ئه‌ڤ ژی ته‌كستا په‌یاما بارزانی یه:
ب ناڤێ خوەدایێ مەزن و دلۆڤان
ب ھەلکەفتا رۆژا ئالا کوردستانێ گەرمترین پیرۆزباھیێن خوە پێشکێشی مالباتێن شەھیدان و پێشمەرگەیێن قەھرەمان و ھەموو ھەموەلاتیێن خوەشتڤی یێن کوردستانێ دکم. ئالا کوردستانێ ھێمایا یەکگرتن، ئازادیخوازی، قوربانیدان و ئاشتیخوازیا گەلێ کوردستانێ یە.
ل ڤێ رۆژا پیرۆز دا تەکەز ل سەر پەیاما ئاشتی و پێکڤەژیانا گەلێ کوردستانێ دکین و ھەزاران سلاڤ ل گیانێ پاکێ وان شەھیدان کو ب ناڤێ ئالا پیرۆزا کوردستانێ جانێ خوە گۆری کرن.
بژی کورد بژی کوردستان
مەسعوود بارزانی
17/12/2019
