ئالا كوردستانێ، هێڤێنه‌ك ژ بۆ یه‌كرێزی و رزگارییا نه‌ته‌وه‌یی

ئالا كوردستانێ، هێڤینه‌ك بۆ یه‌كرێزی و رزگارییا نه‌ته‌وه‌یی

«چاوا دبه‌ ئالییه‌ك كو خوه ب خه‌باتكارێ رزگارییا كوردستانێ پێناسه‌ بكه‌ و ئاماده‌ نینه‌ ل ژێر ئالا یه‌كه‌م كۆمارا كوردی به‌؟»

ئالا كوردستانێ به‌را 74 سالان و د رۆژه‌كه‌ وه‌كه‌ ئیرۆ ده‌، ل باژارێ مه‌هابادێ یێ رۆژهلاتا كوردستانێ ل پایته‌ختا كۆمارا كوردستان وه‌كه‌ یه‌كه‌م هكوومه‌تا مۆدێرێنا كوردی هات به‌رز كرن، ئالایه‌ك هكوومه‌تا كۆمارا كوردستانێ په‌ژراندبوو، د ده‌ریێن ته‌ڤاهیا سازیێن كۆمارێ ده‌ هاتبوو هلدان، هه‌یا كۆمار مابوو ب بایێ رزگارییا نه‌ته‌وه‌یی، ئازادانه‌ د هه‌ژیا. به‌را رووخیانا كۆمارێ ژی ژ ئالیێ پێشوایێ مه‌زن و هه‌رده‌م ساخێ گه‌لێ كورد و سه‌رۆكێ كۆمارا كوردستانێ، وه‌ك ئه‌مانه‌ته‌كێ راده‌سته‌ی جه‌نه‌رال مسته‌فا بارزانیێ نه‌مر هات كرن.

 پشتی سه‌رهلدانا مه‌زنا گه‌لێ باشوورێ كوردستانێ و رزگاربوونا وێ به‌شا ولات، ل سه‌ر په‌ژراندنا پارله‌مه‌نا كوردستانێ، ئالایێ مه‌ جاره‌كه‌ دن ئه‌و ده‌رفه‌ت ژ بۆ هات كو ل به‌شه‌كا خاكا نشتیمانی ئازادانه‌ بهێت به‌رز كرن.

ل ده‌ما چه‌ند سالێن رابووری، رۆژا 17 دیسامبه‌رێ ب رۆژا ئالای هات ناس كرن و هه‌ر سال د ڤێ رۆژێ ده‌، گه‌لێ كورد وه‌كه‌ رێزگرتن ل ئالا نشتیمانی و جه‌نگاوه‌ر و شۆرشگێرێن كو ژ بۆ رزگاریێ ولات و به‌رز مانا ئالایا نه‌ته‌وه‌یی جانێ خوه‌ به‌خشین، مه‌راسیمێن جۆر ب جۆر ساز دكن و ئاهه‌نگان دگێرن.

ئه‌ڤ هه‌لكه‌فته‌ ل باشوورێ كوردستانێ ب ئازادانه‌ و ل رۆژهلاتا كوردستانێ كو هێژان ل ژێر داگیركاریێ یه‌ ب نهێنی تێ برێڤه‌برن، لێ جهێ داخێ یه‌ ل رۆژئاڤا و باكورێ كوردستانێ و ب سه‌ده‌ما گوهه‌رینا ئالا و دیرۆكا خویناوی، ولاتیێن كورد ل ڤان به‌شێن ولات ژ بیرئانینا ئه‌ڤێ یادێ بێ به‌ش بوونه‌، وا دیاره‌ ل رۆژئاڤا به‌شه‌كا به‌رچاڤا ژ روونشتڤانێن وێ، ئالایا یاسایی یا كۆمارا كوردستانێ هلدده‌ن، لێ ب مخابنی ڤه‌ گه‌له‌ك جاران ل ژێر ده‌ستهلاتا كوردی یا وێ به‌شا ولات رێ ب وان ناهێت دان به‌لكو سڤكاتی ژی ب وان تێ كرن.

هیچ نه‌ته‌وه‌یه‌ك بێ ڤه‌گه‌رین بۆ پاشخانه‌یا دیرۆكییا خه‌باتێ و ئازارا رزگاریخوازیێ نه‌گهایه‌ سه‌ربه‌ستیێ

ئالا كوردستانێ ژبلی كو یادگاریه‌كه‌ كۆمارا كوردستانێ وه‌كه‌ یه‌كه‌مین ستاتۆیا سیاسی یا مۆدێرێنا كوردی، ئه‌گه‌ره‌كا گرینگه‌ ژی ژ به‌ر كو دیرۆك و رابووریێ خه‌بات و بزاڤا رزگاریخوازا نه‌ته‌وه‌یا مه‌ ب سه‌رده‌مێ نها ڤه گرێ دده‌ت‌، ئه‌ڤ پێكڤه‌ گرێدانه‌ پێویستیه‌كه‌ حاشاهه‌لنه‌گره‌ د سه‌ركه‌تنا خه‌باتا رزگاریخواز ده‌، ژ به‌ر كو هیچ نه‌ته‌وه‌یه‌ك بێ ڤه‌گه‌رین بۆ پاشخانه‌یا دیرۆكییا خه‌باتێ و ئازارا رزگاریخوازیێ نه‌گهایه‌ سه‌ربه‌ستیێ.

ئالا كوردستانێ د گارانتی كرنا فاكته‌ره‌كێ دنێ هه‌ری گرینگێ خه‌باتا رزگاریخوازیێ ده‌ رۆله‌كا یه‌كلاكه‌ر هه‌یه‌، ئه‌و ژی یه‌كێتییا نه‌ته‌وه‌یی یه‌، ژ به‌ر كو هیچ نه‌ته‌وه‌یه‌ك بێ كۆم كرن و كه‌نالیزكرنا پرانیا هه‌ری زۆرا هێزا به‌رده‌ست و ڤه‌شارتی یا گه‌ل ژ بۆ رزگاریێ، نه‌كاریه‌ ژ بن ده‌ستیێ رزگار ببه‌، ئالا یه‌ك ژ وان هێمایانه‌ كو دبه‌ سه‌رجه‌م ته‌خ و چینێن كوردستانێ ل هه‌ڤ كۆم بكه‌، ژ بۆ كو ب هه‌ڤره‌ كوردستانێ به‌ر ب رزگاریا یه‌كجاری ببه‌ن.

پرسه‌ك ل ڤر تێ كرن، ئه‌و ژی ئه‌ڤه‌ كو «چاوا دبه‌ ئالییه‌ك كو خوه ب خه‌باتكارێ رزگارییا كوردستانێ پێناسه‌ بكه‌ و ئاماده‌ نینه‌ ل ژێر ئالا یه‌كه‌م كۆمارا كوردی و په‌ژراندیێ یه‌كه‌م ناڤه‌ندا یاسادانینێ یا كوردی ئانكو پارله‌مه‌نا كوردستانێ چالاكیێن خوه‌ بكه‌ت؟» نه‌ك كو هه‌ر ڤی ئالای هلناده‌ به‌لكو ده‌ست دایه‌ ئالایه‌كێ دن و ب وێ سه‌ده‌مێ ده‌رز خستییه‌ ناڤ پێكهاته‌ و په‌رچه‌یێن نه‌ته‌وه‌یه‌كێ كو ژ بۆ رزگاریێ پێویستیه‌كه‌ گه‌له‌ك ب یه‌كرێزی و یه‌ك هه‌نگاڤیێ هه‌یه‌.

وه‌شانا به‌شا سۆرانی یا مالپه‌را مه‌ د رۆژا پیرۆزا ئالای ده‌ ده‌ستپێكر كو ئامانجا سه‌ره‌كه‌ ژێ «كاركرنه‌ ژ بۆ رزگارییا یه‌كجارییا نه‌ته‌وه‌یا كورد و سه‌رخوه‌بوونا كوردستانێ»، ئه‌م ب هێڤینه‌ خوه‌نده‌ڤانێن برێز ژی ژ بۆ ڤێ ئه‌ركا نه‌ته‌وه‌یی هه‌ڤكار و رێنیشانده‌ر بن و ب ره‌خنه‌ و پێشنیازێن خوه‌ ئالیكارێن مه‌ بن، ژ بۆ كو بكارین ب باشترین ئاوا خزمه‌تا نه‌ته‌وه‌یا خوه‌ بكن.