یه‌ك ژ وان جانێ خوه ووندا كر و برایێ وی بریندار كه‌تیه
هه‌ژماره‌كه كۆلبه‌رێن رۆژهلاتا كوردستانێ كه‌تنه به‌ر پێله‌كه هه‌ری زێده یا به‌رفێ، یه‌ك ژ وان قه‌رسی و جانێ خوه ووندا كر یه‌كێ دن ژی كو برایێ ویه، ب سه‌ختی بریندار كه‌تیه.
ل گۆر رێخستنا هه‌نگاوی یا مافێن مرۆڤان، هه‌ژمارا 10 كۆلبه‌رێن رۆژهلاتا كوردستانێ، ل ناڤچه‌یێن سینۆرێ هه‌ورامانێ كه‌تن به‌ر پێله‌كه هه‌ری دژوارا به‌رف و سه‌قه‌مێ و ب سه‌ده‌ما وێ یه‌كێ، كۆلبه‌ره‌ك قه‌رسییه و جانێ خوه ووندا كر، یه‌كێ دن ژی كو برایێ وی یه، ب سه‌ختی بریندار كه‌تیه.
چاڤكانیان ده‌ست نیشان كرنه كو دوهـ رۆژا سێشه‌می 17/12/2019ان ب سه‌ده‌ما كه‌تنا به‌رفا زێده ل ناڤچه‌یێن سینۆرێ رۆژهلات و باشوورێ كوردستانێ، وان كۆلبه‌ران رێیا خوه ووندا كر، یه‌ك ژ وان جانێ خوه ژ ده‌ستدا و برایێ وی بریندار كه‌تیه، هه‌موه‌خت چاره‌نڤیسا كۆلبه‌رێن دن ژی نه زه‌لاله.
پشتی کو خەلکێ ناڤچەیێ و کەسوکارێن وان کۆلبەران ژ بوویەرێ هایدار دبن، دەست ب لێگەرینێ دکن.
پشتی لێگەرینەکە بەرفرەھ دو ژ وان کۆلبەران ب ناڤێ «ئازاد خوسرەوی و فەرھاد خوسرەوی» کو برایێن ھەڤن و خەلکێ گونده‌كێ مەریوانێ نە، ھاتنە دیتن.
ل گۆر زانیاریان، «ئازاد خوسرەوی» ژ بەر سەرمایێ رەق بوویە و جانێ خوە ژ دەست دایە، لێ «فەرھاد خوسرەوی» بۆ نەخوەشخانەیێ ھاتییە ڤەگوھاستن.
