كۆنگره‌یا یه‌كێتیا نشتیمانی یا كوردستانێ ئیرۆ بۆ رۆژا 3یێ به‌رده‌وامه و تێ چاڤه‌رێ كرن، هه‌ر ئیرۆ ئه‌ندامێن ئه‌نجوومه‌نا گشتی یا سه‌ركرداتیێ بهێن هلبژارتن، پشتره و د ده‌ما 45 رۆژان ده، سه‌رۆكێ یه‌كێتیێ و جێگرێن وی دێ بهێن هلبژارتن.
ئیرۆ رۆژا دوشه‌می 23/12/2019ێ سێیه‌مین رۆژا كۆنگره‌یا 4ێ یا یه‌كێتیێ ل باژارێ سلێمانیێ برێڤه دچه، د به‌رنامه‌یا ئیرۆ ده یه ئه‌ندامێن ئه‌نجوومه‌نا گشتی و سه‌ركرداتیێ بهێن هلبژارتن كو هه‌ژمارا وان دگه‌هه 118 كه‌سان و كۆنگره دێ ب داوی هێت.
پشتره سه‌رۆكێ یه‌كێتیێ و جێگرێن وی دێ ژ ئالیێ ئه‌نجوومه‌نا سه‌ركرداتیێ هێن هلبژارتن و ئه‌ڤ یه‌ك دێ د ده‌ما 45 رۆژان ده هێت یه‌كلا كرن.
هه‌ژمارا ئه‌ندامێن ئه‌نجوومه‌نا گشتی یا سه‌ركرداتیا یه‌كێتیێ دبنه 121 كه‌س، لێ ب سه‌ده‌ما كو هه‌ر یه‌ك ژ د. به‌رهه‌م سالح، رێواز فایق و قوباد تاله‌بانی پۆستێن به‌رز ل ئیراقێ و كوردستانێ هه‌نه، د رۆژا یه‌كه‌م یا كۆنگره‌ی ده ب ته‌ڤاهیا ده‌نگان وه‌كه ئه‌ندامێن وێ ئه‌نجوومه‌نێ هاتن ده‌ست نیشان كرن.
هه‌یا نها نه دیاره كانێ چ كه‌سه‌ك دێ پۆستا سه‌رۆكێ یه‌كێتیێ وه‌رگریت، لێ به‌لێ د. به‌رهه‌م سالح ژ هه‌ر كه‌سی زێده‌تر چانسێ وه‌رگرتنا وێ پۆستێ هه‌یه.
هلبژارتنا ئه‌ندامێن ئه‌نجوومه‌نا گشتی یا سه‌ركرداتیێ ب سه‌ر 16 بازنه‌یان ده هاتنه پارڤه‌كرن ئه‌و ژی هه‌ر یه‌ك ژ بازنه‌یێن (هه‌ولێر، سلێمانی، بادینان، كه‌ركووك، هه‌له‌بجه، هه‌ر وها شاره‌زوور و چه‌مچه‌مال، راپه‌رین، مووسل و گه‌رمیان، خانه‌قین به‌غدا و حه‌مرین، كۆیه مه‌خموور، شه‌نگال و سۆران).
