پێگه‌ها به‌عسییان د خوه‌پێشاندانان ده‌ بهێزه‌ و دخوازن ڤه‌گه‌رن ده‌ستهلاتێ

خوه‌نیشاندانێن ئیراقێ ده‌ما 2 مه‌هانه‌ به‌رده‌وامن و نها گه‌هشتنه‌ ئاسته‌كی وها كو خه‌ته‌را وان نه‌ ته‌نێ ل سه‌ر ئیراقێ یه‌، به‌لكو یه‌ك ژ ئامانجێن وێ، لاوازكرنا پێگه‌ها هه‌رێما كوردستانێ یه‌.

ب ده‌رباسوونا دو مه‌هان ل سه‌ر خوه‌پێشاندانان، نها ئیراق كه‌تییه‌ دگێله‌شۆكه‌كێ ده‌ كو ده‌رباسبوون تێده‌ زۆرا ب زه‌همه‌ته‌، هه‌ر كو دچه‌، ئاگرێ خوپێشاندانان گه‌شتر دبه‌ و ئیراق به‌ر ب ئاراسته‌یه‌كه‌ نه‌دیار و نه‌زه‌لا دچه‌.

ب گۆر چاڤكانێن داركا مازى، ئاگرێ خوه‌پێشاندانێن ئیراقێ ب سه‌ده‌ما هنه‌ك خالێن سه‌ره‌كه‌ گه‌ش دبه‌، دكارین وها رێز بكین:

خالا یه‌كه‌مین: ژ به‌ر كو ژ سالا 2003ان و هه‌یا نها پاره‌ ل ئیراقێ تێ خه‌رجكرن و خزمه‌ت تێده‌ تونه‌یه‌، واته‌ ب كوردى دبێژنه‌ ڤێ جوره‌ خزمه‌تێ «ژ گاى گوهـ بۆ خه‌لكێ دچه‌» ئه‌ڤ بوویه‌ سه‌ده‌م كو به‌شا هه‌ر زۆر یا خوه‌پێشاندانان ژ ولاتیێ سته‌م دیتی به‌، ئه‌و ولاتیێ ئیرۆ ژیان لێ بوویه‌ گۆرستان.

ئالیێ دوویه‌مین یێ خوه‌پێشاندانێن ئیراقێ ژ كه‌ڤنه‌ به‌عسیان پێك تێ كو هه‌موو هه‌ولان دد‌ن جادده‌یا ئیراقێ ژ بۆ خوه‌ بكن ئامراز ب ئارمانجا گوهه‌رینا سیسته‌ما حكومرانیێ و ب گوهه‌رینا ده‌ستهه‌لاتێ، ئه‌و بكارن جاره‌كه‌ دن ده‌ستهلاتا خوه‌ یا جاران ڤه‌گه‌رینن.

سه‌راستكرنا ده‌ستووری و سیسته‌ما هلبژارتنێ ل سه‌ر كوردستانێ خه‌ته‌ره‌

خالا سێیه‌مین: به‌شه‌كێ هێزێن شیعه‌ رۆل د ڤان خوپێشاندانان ده‌ هه‌یه‌ و ئارمانجا وان ئه‌وه‌ كو ب ئازراندنا جادده‌یا ئیراقێ، ئه‌و بگه‌هن ئارمانجا خوه‌، ئارمانج ژى ئه‌وه‌ كو گوهه‌رتنان د ده‌ستوورا ئیراقێ و سیسته‌ما هلبژارتنان ده‌ بكن، فوكسا وان ژڤان گوهه‌رینان لاوازكرنا پێگه‌ها هه‌رێما كوردستانێ د ده‌ستووری ده‌ و گوهه‌رینا سیسته‌ما فه‌ده‌رال و كێم كرنا رێژه‌یا كوردان د پارلمه‌نا ئیراقێ ده‌.

خالا چاره‌مین: ئالیێن كو به‌شدار د ڤان خوپێشاندانان ده‌ د بێ سه‌ركێشن، چونكى ئارمانجێن وان نه‌یه‌كن و ئه‌ڤ ژى دێ ئیراقێ به‌ر ب مالوێرانیه‌كه‌ مه‌زن ببه‌ت.