به‌رهه‌م سالح مانۆره‌كه سیاسی كر و كورسی گارانتی كر
سه‌رۆك كۆمار د. به‌رهه‌م سالح، ئیرۆ گۆت: ئه‌ز ئاماده‌مه پۆستا سه‌رۆك كۆماریێ ب جی بهێلم، هه‌گه‌ر ئالیێن سیاسی ئیسرارێ بكن (ئه‌سعه‌د عێدانی) د سه‌ر بریارا خوه‌پێشانده‌ران ده ژ بۆ ئاڤاكرنا حكوومه‌تا نوو ئه‌ركدار بكم كو ل سه‌ر بالێ ئیرانێ تێ حه‌ساب كرن، هه‌ر چه‌ند كو ئه‌ڤ هه‌نگاڤا د. به‌رهه‌م سالح ب فێله‌كه سیاسی تێ حه‌ساب كرن، لێ ئامانجا سه‌ره‌كه ژ وێ هه‌نگاڤێ ب واتایا گارانتیكرنا كورسییێ تێ.
سه‌رۆك كۆمارێ ئیراقێ د. به‌رهه‌م سالح، د نامه‌یه‌كێ ده حازریا خوه ژ بۆ ده‌ست به‌ردانێ ژ پۆستا سه‌رۆكتییا كۆمارێ دیار كر و گۆت كو ئه‌و نكار ده‌ستوورا ولات بن پێ بكه و نامزه‌ده‌كی كو خوه‌پێشانده‌ران تێبینی ل سه‌ر هه‌نه، ژ بۆ ئاڤاكرنا حكوومه‌تا نوو ئه‌ركدار بكه.
د. به‌رهه‌م سالح، پشتی ل حه‌فتییا رابووری گه‌فا ده‌ست به‌ردانێ ژ پۆستا سه‌رۆكتیا ئیراقێ كری، رۆژا پێنجشه‌می 26/12/2019ان نامه‌یا ده‌ست به‌ردانێ راگهاند، لێ به‌لێ بۆ سه‌رۆكێ پارلمه‌نا ئیراقێ نه‌شاند ژ بۆ كو ببه واقع و د رێكێن خوه یێن یاسایی ده ده‌رباس ببه.
د. به‌رهه‌م سالح حازری نیشان دایه كو ده‌ست ژ پۆستا سه‌رۆك كۆماریێ به‌رده، ل شوونا كو ده‌ستوورا بنگه‌هین یا ولات وه‌ره بن پێ كرن.
هه‌موه‌خت دبێژه: «ده‌ست نیشان كرنا كوالیسیۆنا مه‌زن ژ بۆ ئاڤاكرنا حكومه‌تێ ئه‌ركا سه‌رۆك كۆماری یه، رێكێن وێ د ده‌ستوورا ولات ده هاتنه ده‌ست نیشان كرن، لێ به‌لێ ژ به‌ر كو هه‌ژماره‌كه داخوازییان ژ بۆ ده‌ست نیشان كرنا كوالێسیۆنا مه‌زن گهانه ده‌ست سه‌رۆكتیا كۆمارێ، ئه‌و نكاره ده‌ستووری بن پێ بكه و ژ ده‌رڤه‌ی رێكێن ده‌ستوور كوالێسیۆنه‌كێ ئه‌ركدار بكه».
د. به‌رهه‌م سالح ئه‌شكه‌ره كریه، هه‌ژماره‌كه داخوازییان گه‌هشتنه ده‌ست وان و هه‌ر یه‌ك ژ وان خوه وه‌كه كوالێسیۆنا مه‌زن دایه ناساندن، ژ به‌ر ڤێ سه‌ده‌مێ ئه‌و ئاماده‌یه، ده‌ست ژ سه‌رۆكتیێ به‌رده و ب زه‌لالی گۆتییه: «ئه‌و ده‌ستوورا ولات بن پێ ناكه».
چما به‌رهم سالح ئه‌سعه‌د عێدانی بۆ ئاڤاكرنا حكوومه‌تێ ئه‌ركدار ناكه؟
ئه‌سعه‌د عێدانی نامزه‌دێ ئاڤاكرنا حكووتا نوو كی یه.؟، كی ل پشت وی یه و چ ئالیه‌كی ئه‌و نامزه‌د كریه؟
عه‌بدوللا سالح شاره‌زا د كاروبارێن سیاسی یێن ئیراقێ ده ل ئه‌كاونتا خوه یا فه‌یسبووكی گۆتیه كو ئه‌سعه‌د عێدانی جێگری ئه‌میندارێ گشتی یێ كۆنگره‌یا نشتیمانی یا ئیراقێ یه كو به‌را نها ئه‌حمه‌د چه‌له‌بی سه‌رۆكتیا وێ دكر، ل هه‌مان ده‌مێ جێگرێ سه‌رۆكێ ئه‌نجوومه‌نا برێڤه‌به‌ر یا به‌نكا بیلاد یا ئیسلامی یه، ئاراس حه‌بیب سه‌رۆكێ كۆنگره‌یا نشتیمانی و سه‌رۆكێ به‌نكا بیلاده و د لیستا جه‌زایێن ئه‌مه‌ریكایێ ده یه و ب چه‌ندین تومه‌تان هاتیه سووچبار كرن.
عه‌بدوللا سالح دبێژه: «ئاراس حه‌بیب و ئه‌حمه‌د چه‌له‌بی ب ره‌حمه‌ت به ل ئه‌مه‌ریكایێ ب گهاندنا زانیاریێن شاش ل ده‌ربارا ئیراقێ و چه‌كێ وێ یێ كۆم كوژ سووچبارن، له‌ورا نامزه‌د كرنا كه‌سه‌كی وه‌كه ئه‌سعه‌د عێدانی كو جێگرێ ئاراس حه‌بیبه ژ بۆ ئاڤاكرنا حكوومه‌تا نوو یا ئیراقێ ب ته‌حدایه‌كه ئیرانی ژ بۆ ئه‌مه‌ریكایێ تێ حه‌ساب كرن، واته ئالیێن سیاسی یێن ئیراقێ و ئیران هه‌یا نها بابه‌تا ئالۆزا ئیراقێ وه‌كه هه‌ڤركیه‌كه ئیرانی – ئه‌مه‌ریكی مێزه دكن و چ گرنگیه‌كێ ب گه‌لێ ئیراقێ نادن و گه‌ل ژی ئێدی ڤێ چه‌ندێ فێهم دكه.
د. به‌رهه‌م سالح ژی ل ڤر دخواز خوه وها نیشا گه‌ل بده كو ئه‌و ناكه‌ڤه بن هه‌ژموونا ئیرانێ و رێ ناده ئیراق ببه خالا ل هه‌ڤگه‌هشتنا ناكۆكیێن ئیرانێ و ئه‌مه‌ریكایێ.
ده‌ستوورا ئیراقێ ل ده‌ربارا ده‌ستبه‌ردانا سه‌رۆك كۆماری چ دبێژه؟
ل گۆری ده‌ستوورا بنگه‌هین یا ئیراقا فه‌ده‌رال و ب تایبه‌ت مادده‌یا 75ان كو تایبه‌ته ب سه‌رۆك كۆمار ڤه، هاتیه: «سه‌رۆك كۆمار مافێ وی هه‌یه ده‌ست به‌ردانا خوه پێشكێشی سه‌رۆكێ پارلمه‌نا ئیراقێ بكه، ده‌ست به‌ردانا وی ژی ب په‌ژراندی تێ حه‌ساب كرن، هه‌گه‌ر 7 رۆژ ل سه‌ر ده‌رباس ببن، خوه هه‌گه‌ر پارلمه‌ن نه‌په‌ژرینه ژی، ب په‌ژراندی تێ حه‌ساب كرن».
ل ڤر د. به‌رهه‌م سالح ب عه‌كس كر و ته‌نێ د به‌یانه‌كێ ده حازری دیار كر كو ده‌ست ژ سه‌رۆكتیێ به‌رده، نامه‌یا فه‌رمی یا ده‌ست به‌ردانێ ژی ژ بۆ سه‌رۆكێ پارلمه‌نێ نه‌شاندیه.
ل گۆر خالا دویه‌مین یا مادده‌یا 75ان یا ده‌ستوور: «جێگرێ سه‌رۆك كۆمار وێ ئه‌ركێن سه‌رۆك كۆماری وه‌رگره، وه‌ختا كو سه‌رۆك كۆمار نه‌به».
خالا سێیه‌مین یا مادده‌یا 75ان یا ده‌ستوور: «جێگرێ سه‌رۆك كۆمار، ئه‌ركێن سه‌رۆك كۆماری وه‌ردگره ل وه‌ختا كو سه‌رۆك كۆمار ژ به‌ر هه‌ر سه‌ده‌مه‌كێ نه‌به یان نه‌ئاماده به، ل ڤر ژی پێویسته پارلمه‌نا ئیراقێ سه‌رۆكه‌كێ نوو ده‌ست نیشان بكه و د وه‌ختا 30 رۆژان ده».
خالا چاره‌مین ژ مادده‌یا 75ان یا ده‌ستوور: «وه‌ختا كو سه‌رۆك كۆمار جێگر نه‌به، سه‌رۆكێ پارلمه‌نا ئیراقێ ئه‌ركێن سه‌رۆك كۆماری وه‌ردگره».
د. به‌رهه‌م سالح ل سه‌ر لیستا یه‌كێتیا نشتیمانی یا كوردستانێ، پۆستا سه‌رۆك كۆمارییا ئیراقێ وه‌رگرتیه، هه‌ر چه‌ند كو ئه‌ڤ پۆست وه‌كه ئستحقاق ب به‌هرا پارتییا ده‌مۆكرات یا كوردستانێ په‌ده‌كێ تێ حه‌ساب كرن، د هه‌رسێ خولێن ده‌ستپێكێ ده، په‌ده‌كێ ئه‌ڤ پۆست ب یه‌كێتیێ دابوو، لێ به‌لێ پشتی بوویه‌رێن ره‌فه‌راندۆمێ، پارتییا ده‌مۆكرات نامزه‌دێ خوه ژ بۆ وێ پۆستێ هه‌بوو، لێ د ده‌نگدانا پارلمه‌نێ ده، د. به‌رهه‌م سالح پرانیا ده‌نگان ب ده‌ست خستن، كو ئه‌ڤ ژی پێویستی ب شیرۆڤێ هه‌یه.
سه‌ركه‌تنا د. به‌رهه‌م سالح د هلبژارتنا سه‌رۆكتیێ ده، ژ بۆ وێ سه‌ده‌مێ ڤه‌دگه‌ره كو د. به‌رهه‌م سالح كاری پێتر خوه وه‌كه ئیراق پارێزه‌ك نیشا ئیراقییان بده، هه‌ر وها سه‌ده‌ما سه‌ره‌كه ئه‌و بوو كو ئه‌ره‌بان خه‌لاتا راده‌ستكرنا كه‌ركووكێ ب یه‌كێتیا نشتیمانی و سه‌ركێشێ وێ مانۆرا قرێژ پاڤێل تاله‌بانی و لاهۆرێ شێخ جه‌نگی، ئاراسێ شێخ جه‌نگی و گرۆپا خیانه‌تكار به‌خشی.
د خولا یه‌ك و دو ده، جه‌لال تاله‌بانی ل وێ پۆستێ بوو، پشتره د. فوئاد مه‌عسووم ئه‌وێ جادده‌یا ئیراقی و كوردستانی ب خه‌رابترین سه‌رۆك ناسكری، د خولا چاره‌مین ژی ده، به‌رهه‌م سالح ل وێ پۆستێ وه‌زیفه‌دار بوویه.
د. به‌رهه‌م سالح كو پۆستا جێگرێ دوێ یێ سه‌كره‌ته‌رێ گشتی یێ یه‌كێتیا نشتیمانی هه‌یه، ب سه‌ده‌ما ئالۆزی و ناكۆكیێن ل ناڤ بالێن یه‌كێتیێ ده، ب تایبه‌ت ئالۆزبوونا تێكلیێن وی ب (هێرۆ خانێ) ره، ل سالا 2017ان جودابوونا خوه ژ یه‌كێتیێ راگهاند و پارتییه‌كه سیاسی ب ناڤێ (هاوپه‌یمانی بۆ ده‌مۆكراسی و دادپه‌روه‌ریێ) ئاڤا كر، د. به‌رهه‌م سالح دگه‌ل خوه هه‌ژماره‌كه كادرێن پێشكه‌تی یێن یه‌كێتیێ برن ناڤا پارتییا نوو، ئه‌وا ته‌مه‌نێ وێ ساله‌كێ ده‌وام نه‌كری.
پاڤێل تاله‌بانی، كوڕێ جه‌لال تاله‌بانی هه‌ر ل ده‌ستپێكا جودابوونا د. به‌رهه‌م سالح ژ یه‌كێتیێ، گه‌له‌ك هه‌ول دان وی ڤه‌گه‌رینه، ل داویێ ژی كاری به‌رهه‌م سالحێ ژ یه‌كێتیێ تۆره رازی بكه، پشتی كو پۆستا سه‌رۆك كۆماریێ وه‌كه خه‌لاتا ڤه‌گه‌رینێ ژ بۆ ده‌ست نیشان كری.
ل وه‌ختا كو د. به‌رهه‌م سالح بانگه‌شه ژ بۆ پارتییا خوه یا نوو دكری، هه‌ژماره‌كه زۆرا كادرێن یه‌كیتیێ و یه‌كگرتوو یا ئیسلامی، ته‌ڤگه‌را گۆرانێ و هه‌یا هه‌ژماره‌كه پارتیێن دن لێ كۆم بوون، د. به‌رهه‌م سالح ل وێ ده‌مێ داخوه‌یانی دا و گۆت: «سیاسه‌ت ل سه‌ر فێل كرنێ نایێ كرن، من پۆست د ناڤا یه‌كێتیێ ده هه‌بوو، پۆستێن مه‌زن ژی دگه‌ل من هاتن گۆتن و ل ده‌ربارا پۆستا سه‌رۆك كۆماریێ ژی گۆت كو بێ حورمه‌تیه ئینسان ل سه‌ر حه‌سابا مووچه‌یا خانه‌نشینیا مامۆستایه‌كی ببه سه‌رۆك».
ل گه‌ل نێزیكبوونا وه‌ختا هلبژارتنان د. به‌رهه‌م سالح ب هه‌ولێن پاڤێل تاله‌بانی ڤه‌گه‌ری ناڤ یه‌كێتیێ و پشت دا هه‌ڤالێن خوه یێن د ناڤا وێ پارتییا نوو ده، ل ڤر جادده‌یا كوردستانی ئه‌و ب بێ حورمه‌ت ناسكر.
به‌رهه‌م سالح ب وێ هه‌نگاڤێ كورسی گارانتی كر
ل رۆژێن رابووری ژی و پشتی ده‌رباسبوونا ساله‌كێ و دو مه‌هان ل سه‌ر خولا چاره‌مین یا سه‌رۆك كۆمارییا ئیراقێ، د. به‌رهه‌م سالح گه‌فا ده‌ست به‌ردانێ كربوو، ژ به‌ر كو وه‌ختا ده‌ست نیشان كرنا كوالێسیۆنا مه‌زن ژ بۆ ئاڤا كرنا حكوومه‌تا نوو ب چه‌ند رۆژه‌كان ژ وه‌ختا ده‌ستووری ده‌رباس بوویه، رۆژا پێنجشه‌م 26/12/2019ان ژی یاریه‌كه سیاسی كر و ل شوونا ب كریار نامه‌یا ده‌ست به‌ردانێ بده سه‌رۆكێ پارلمه‌نا ئیراقێ، ته‌نێ نامه راگهاند و مه‌دیا خاپاند، ژ به‌ر كو مه‌دیایێ گۆت: د. به‌رهه‌م سالح رازی نه‌بوو ده‌ستوور بن پێ بكه و رازی نه‌بوو داخوازییا خوه‌پێشانده‌ران پشتگوهـ بخه، ده‌ست ژ كار به‌ردا، لێ یا راست به‌رهه‌م سالح ته‌نێ مانۆره‌كه سیاسی ژ بۆ گارانتیكرنا كورسیا سه‌رۆكتیێ كریه.
چاڤدێرێن كو ره‌وشا ئیراقێ د شۆپینن و هه‌موه‌خت كه‌سێن نێزیكی به‌رهه‌م سالح ل قادا كوردستانی، نه‌رینه‌كه دن هه‌یه، ئه‌و ژی، كو د. به‌رهه‌م سالح مانۆره‌كه سیاسی دكه، ئامانجا سه‌ره‌كه ژ وێ مانۆرێ گارانتی كرنا كورسیا سه‌رۆكتیا كۆمارێ یه، هه‌موه‌خت رازی كرنا گه‌لێ ئیراقێ كو ژ 25 ئۆكتۆبه‌را ئیسالێ ل جادده‌یان بانگا چاكسازیێ و گوهه‌رینێ دكه، هه‌ر وها خاپاندنا مه‌دیایێ یه كو دكتۆرێ سالح وه‌كه ولاتپارێز و پارێزه‌رێ ده‌ستوورا ولات و رومه‌تا وێ نیشان بده.
