كوشتنا رێبه‌رێن 16ی ئۆكتۆبه‌رێ ده‌ریێ جه‌نگه‌كه‌ مه‌زن ل ناڤچه‌یێ ڤه‌كر

كوشتنا رێبه‌رێن 16ی ئۆكتۆبه‌رێ ده‌ریێ جه‌نگه‌كه‌ مه‌زن ل ناڤچه‌یێ ڤه‌كر

قاسم سوله‌یمانی و ئەبۆ مەهدی موهه‌ندس وەکە دو رێبەرێن جێبەجێکار یێن کارەساتا 16ی ئۆکتۆبەرێ ل کەرکووکێ باس لێ دهات کرن.

جڤاتا بلند یا ئاساییشا نەتەوەیی یا ئیرانێ د راگەهاندنەکێ دە ل سەر کوشتنا قاسم سولەیمانی، فەرماندارێ فەیلەقا قودس یا سپایێ پاسدارێن ئیرانێ باس ل تۆلهلدانەکە مەزن دکە و ل همبەر ڤێ گەفا ئیرانێ سازیێن مەدیایی یێن نووچەیان ئەشکەرە دکن کو ئەمەریکا هەزاران سەربازێن دن رەوانەی ناڤچەیێ دکە.

پاش کوشتنا قاسم سولەیمانی، فەرماندارێ فەیلەقا قودس یا سوپایێ پاسدارێن ئیرانی و ئەبۆ مەهدی موهه‌ندس، شەخسێ ژمارە دو یێ حەشدا شەعبی یا ئیراقێ و هەژمارەکە دن یا پاسداران و هێزێن حەشدا ئیراقی و حزبوللا ژ ئەنجامێ ئێریشا بالەفرێن بێ پیلۆت یێن ئەمەریکایێ ل نێزی بالەفرخانەیا بەغدایێ، جڤاتا بلند یا ئاساییشا نشتیمانی یا ئیرانێ، جڤینەکە نەئاسایی و بلەز ل دار دخە.

خامنه‌یی سۆزا تۆلهلدانه‌كه‌ ب زه‌بر دكه‌

ل گۆر چاڤکانییان بۆ یەکەم جار، عەلی خامەنەیی رێبەرێ بلند یێ ئیرانێ د جڤینێ دە بەشدار بوویە و ل داوییا جڤینێ دە راگهاندنەک بەلاڤ کرییە کو تێدە تەکەز ل سەر تۆلهەلدانەکە ب زەبر د دەم و جیەکە گۆنجایی دە کرییە. هەڤدەم جڤاتا بلند یا ئاساییشا نشتیمانی یا ئیرانێ، باس ل وێ یەکێ کرییە کو ئەمەریکا ب کوشتنا قاسم سولەیمانی هێلا سۆر یا ئیرانێ دەرباس کرییە و شاشتییەک ستراتیجیک و مەزن ئەنجام دایە، هەر وها کاربدەستێن ئەمەریکا ژی پشت راست دکن د دەمەکە نێز دە و ب ڤێ ئاسانیێ ل ژێر بارێ دەرەنجامێن ڤێ شاشتیا خوە رزگار نابن.

هەڤدەم تەخت رەوانچی، نوونەرێ کۆمارا ئیسلامی یا ئیرانێ ل نەتەوەیێن یەکبوویی، ژ بۆ ئاژانسا سی ئێن ئێن یا ئەمەریکی راگهاند کو کریارا ئەمەریکا سەربازی بوویە، پشت راست بن کو کارڤەدانا ئیرانێ و تۆلهلدانا وێ ژی دێ سەربازی به‌.

ئەڤ داخویانیێن رایەدارێن ئیرانێ د دەمەکێ ده‌ نە کو ئاژانسێن نووچەیان باس ل ئامادەباشییا هەموو هێزێن سەربازی یێن ئیرانێ ب تایبەتی هێزێن ئاسیمانی یێن وی ولاتی دکن، رەوش وها کرییە کو بهایێ بۆرسا تەهرانێ ب ئاوایه‌كه‌ نەچاڤەرێکری داکشانێ ب خوە ڤە ببینیت و جڤاتا بلند یا بورسا ئیرانێ نەچار بوو د جڤینەکە نەئاسایی دە، رەوشا خراب ئا بۆرسا ئیرانێ گەنگەشە بکە، بهایێ بۆرسا تەهرانێ ل دەستپێکا مامەلە کرنا ئیرۆ دە 15 هەزار یەکان دابەزییە و هەیا نها کەنالێ 369 هەزار یەکەیان داکشان ب خوە ڤە دیتیە.

هەڤدەم وەزارەتا بەرەڤانییا ئەمەریکا، پینتاگۆنێ پاش کوشتنا قاسم سولەیمانی راگهاند کو ئێریش ب فەرمانا راستە راست یا دونالد ترامپ، سەرۆک کۆمارێ وی ولاتی ب رێڤە چوویە و تەکەز ل سەر ڤێ یەکێ کر کو ئێریش ب مەبەستا رێگری کرنێ ژ سوپایێ پاسداران و دۆڤەلانکێن وێ بوویە و باس ل ڤێ یەکێ کرییە کو قاسم سولەیمانی و هەڤبیرێن وی مژوولی دانانا پلانێ بوون ژ بۆ ئێریش کرنا سەر بنکەیێن هێزێن ئەمەریکا و هەڤپایمانان.

ترامپ: مه‌ سوله‌یمانی كوشت داكو چ شه‌رێن مه‌زن روونه‌دن

بەشەک ژ رایەدارێن ئەمەریکا ئەشکەرە کرییە کو بەری نها مە چەندین جاران قاسم سوله‌یمانی ئاگەهدار کرییە کو ئەگەر دەست ژ چالاکیێن خوە ل دژی ئەمەریکا بەرنەدن وێ هەوە ژناڤ ببەین، لێ بەلێ وی گوهداری نەکرییە. ترامپ ژی دبێژە: قاسم سولەیمانی مە کوشت ژبەرکو شەرەکە مەزن سەرهلنەدەت و باس ل ڤێ یەکێ کر کو پێدڤی بوو قاسم سولەیمانی پێش چەندین سالان هاتبا کوشتن.

هەڤدەم ل همبەر گه‌فێن ئیرانێ، ئاژانسا ئەی پی ژ زارێ هەژمارەک ژ کاربدەستێن خوەدی پێگەهێن بلند یێن واشنتونێ ئەشکەرە کرییە کو ئەمەریکا 3000 سەربازێن خوە یێن دن شاندنە ناڤچەیێ، ل گۆر ڤێ ئاژانسێ ئەو 3000 سەرباز ل یەکەیا 82 یا هێزێن ئاسیمانی یێن ئەمەریکا ل فۆرت براگا ویلایەتا کالیفۆرنیا یا باکورێ وی ولاتی هاتینە شاندن ژ بۆ ناڤچەیێ.

کۆچکا سپی تەکەز ل ڤێ یەکێ کرییە کو ئاساییشا هێزێن دن یێن ئەمەریکا و هەڤپەیمانێن وێ ل ناڤچەیێ کەتییە خەتەرەیێ و ژ بۆ پاراستنا وان هێزێن زێدەتر وێ وەرن شاندن.

 ئەسۆشێتێد پرێس ئەشکەرە کرییە کو پێدڤی بوو هێزێن ئەمەریکا 700 سەرباز بن و هەفتییا رابووری هاتبان رەوانەکرن و ل کوێتێ جێگیر ببان.

 پێنتاگۆنێ راگهاندییە کو شاندنا هێزێن زێدەتر ژ بۆ ناڤچەیێ ب فەرمانا راستە راست یا سەرۆکێ ولاتی ب رێڤە دچە، چەندین ئاژانسێن نووچەیان ژ زارێ هەژمارەک ژ کاربدەستێن سەربازی یێن ئەمەریکا ئەشکەرە کرییە کو گەر ئیران ئێریشی سەر بەرژەوەندیێن ئەمەریکا بکە، ناڤەندێن پەترۆلێ یێن ئیرانێ وێ یەک بن ژ ئارمانجان کو وێ ب هێسانی ئێریش ل سەر وەرە پێکئانین و وها د دن زانین ژ ئەگەرا گرێدانا بێ ئەندازە یا ئیرانێ ب بەرهەمێن پەترۆلێ، هەر جۆرە ئێریشا ل سەر ناڤەندێن پەترۆلی یێن ئیرانێ وێ ببە سەدەما زەبرەک کەمەر شکێن ژ بۆ ئیرانێ و ئابوورا وی ولاتی.

باندۆرا كوشتنا رێبه‌رێن 16ی ئۆكتۆبه‌رێ ل سه‌ر كوردستانێ

 گەفێن ئیرانێ و ئەمەریکا ئالۆزیێن ناڤچەیێ زێدەتر کرینە و هەژمارەکە زیدە ژ چاڤدێران کوشتنا قاسم سولەیمانی فەرماندارێ فەیلەقا قودس یا سوپایێ پاسداران کو ب کەساتیێ ژمارە دو ل ئیرانێ و ب دارێژەرێ دارێشتنا سیاسەتا ئیرانێ ل ناڤچەیێ تێ ناسین، ب خالەکە وەرچەرخانێ د گوهەرینێن ناڤچەیێ د دن زانین و ل سەر وێ باوەرێ نە کو کارڤەدانێن ئیرانێ ل همبەر ئێریشا ئەمەریکا د کارە کێنجەکە بەرچاڤ ل سەر پێشەرۆژا رۆژهلاتا ناڤین درست بکە.

 قاسم سولەیمانی و ئەبو مەهدی موهه‌ندس دو ژ وان ناڤانە کو ل دەما داگیرکرنا کەرکووکێ ل 16ێ ئۆکتۆبەرێ دە پر باس لێ هات کرن و ب رێڤەبەر و جێبەجێکارێن وێ پرۆسەیا داگیرکاریێ ل سەر کوردستانا باشوور هاتن ناسین.

چاڤدێرێن رەوشا کوردستانێ ل سەر وێ باوەرێ نە کو کوشتنا قاسم سولەیمانی و ئەبۆ مەهدی موهه‌ندس دگەل ڤێ یەکێ دە کو دبە وەکە خالەکە پۆزەتیف ژ بۆ پرۆسەیا سەرخوەبوونا کوردستانێ وەرە هەژمارتن، هەڤدەم دبە ئەو کەسێن کو پشتا وان ب دوژمنان گەرمە وێ وانەیێ وەرگرن کو تو دەمان نابە پشت گەرمی دوژمنان بن. ئەڤ وانە دبێژە مە دوژمن هەرچەند بهێز ژی بە وێ رۆژەک هەر وەرە کو ژناڤ بچە و یاکو بەردەوام هێزێ ددە و تو جاران و د تو دەم و چاخان دە ژناڤ ناچە و لاواز نابە ب تەنێ هێزا گەلە، ژبەر ڤێ یەکێ پێدڤی دکە هەرتم پشت گەرمی هێزا گەل بین و ب تو ئاوایەکێ پشت گەرمی سۆزێن دوژمنان نەبین داکو شەرمەزاری دیرۆک و گەلێ خوە نەبین.

پوستێن ھەمان بەش