ئیرانێ ب هێجه‌تا تۆلهلدانا قاسم سوله‌یمانی ئیراق و باشوورێ كوردستانێ مۆشه‌ك باران كرن
سپایێ پاسدارێن ئیرانێ پێگه‌ها سه‌ربازیا ئه‌ین ئه‌ل ئه‌سه‌د و هه‌رێما باشوورێ كوردستانێ مۆشه‌ك باران كرن، خامنه‌یی دبێژه: «ئه‌ڤ ئێریش زللـه‌هه‌كا هه‌ژین بوو و ئه‌مه‌ریكا ته‌كه‌ز دكه كو تو سه‌ربازێن وان بریندار نه‌كه‌تنه، هه‌موه‌خت چاڤدێر به‌هسا پیلانێن نهێنی یێن كۆمارا ئیسلامی بۆ سه‌ر هه‌رێما باشوور دكن».
د ساتێن یه‌كه‌م یێن ئیرۆ رۆژا چارشه‌میێ ده 8/1/2020ان، سپایێ پاسدارێن كۆمارا ئیسلامی یا ئیرانێ، ل ژێر ناڤێ تۆلهلدانا كوشتنا قاسم سوله‌یمانی، 12 مۆشه‌ك ئاڤێتن پێگه‌ها سه‌ربازی یا ئه‌ین ئه‌ل ئه‌سه‌د ل پارێزگه‌هیا ئه‌نبارێ و هه‌ر وها پارێزگه‌هیا هه‌ولێرێ یا پایته‌ختا هه‌رێما باشوورێ كوردستانێ، ژ سه‌رجه‌ما وان 12 مۆشه‌كان 10 مۆشه‌ك ب پێگه‌ها ئه‌ین ئه‌ل ئه‌سه‌د كه‌تنه و 2 مۆشه‌كێن دن یه‌ك ژ وان ب سینۆرێ ناڤچه‌یا به‌رده‌ره‌ش كه‌ت و یه‌ك ژی ب نێزی باله‌فرگه‌ها هه‌ولێرێ، لێ به‌لێ نه ته‌قی.
ل ده‌ستپێكێ سپایێ پاسداران راگهاند كو ب سه‌ده‌ما ئێریشان بێهتری 80 سه‌ربازێن ئه‌مه‌ریكایێ هاتن كوشتن، پشتره ئه‌شكه‌ره بوو كو ته‌نێ 5 سه‌رباز بریندار كه‌تنه و برینێن وان سڤكن و سه‌ربازێن ئیراقی نه.
دۆنالد ترامپ و وه‌زاره‌تا به‌ره‌ڤانیا ئه‌مه‌ریكایێ راگهاند كو ئه‌و به‌روه‌خت ئاگاهی ئێریشا مۆشه‌كیا ئیرانێ بوون و خوین ژ دفنا یه‌ك سه‌ربازێ وان ژی نه‌هاتیه.
ئێریشا سپایێ پاسداران ژ ئالیێ هه‌ژماره‌كه ولاتێن جیهانێ هات پرۆته‌ستۆ كرن و داخواز ژ هه‌ردو ئالییان هات كرن ل سه‌ر خوه بن و ره‌وشێ ئالۆزتر نه‌كن، خامنه‌یی دبێژه: «ئێریش مینا زللـه‌هه‌كه هه‌ژین بوو، لێ واتایا تۆلهلدانێ دێ ل وێ ده‌مێ ب جی هێت، وه‌ختا كو هێزێن ئه‌مه‌ریكایێ ژ ناڤچه‌یێ ده‌ردكه‌ڤن».
ئه‌ڤ ئێریش زللـه‌هه‌ك بوو هه‌گه‌ر ئه‌مه‌ریكایێ به‌رسڤ دا جارا بهێت وێ مسته‌كه مه‌زن لێخن
ژ ئالیێ خوه‌ڤه وه‌زیرێ كارێن ده‌رڤه یێ ئیرانێ و پشتی ده‌مه‌ك كێم ژ ئێریشێ راگهاند، تۆلا سوله‌یمانی هات هلدان و ئێدی تو ئێریشێن دن نایێن كرن، ئارته‌شا ئیرانێ ژی زێده‌باری پشتگریێ ل ئێریشێ دبێژه: «ئه‌و زللـه‌هه‌ك بوو و هه‌ر وه‌ختا ئه‌مه‌ریكایێ به‌رسڤ دا، ڤێ جارێ وێ مسته‌كه مه‌زن لێخن».
نه‌ته‌وه‌یێن یه‌كبوویی دلگرانییا خوه ئیلان كر و ئیراق ژی دبێژه: «ته‌هرانێ ئه‌م ژ ئێریشێ هایدار كربوون»، ئیراقێ و ئیرانێ جودا ل ئه‌نجوومه‌نا ئاساییشا ناڤنه‌ته‌وه‌یی سكالا ل ئه‌مه‌ریكایێ كرنه، نرخا په‌ترۆلێ به‌رز بوویه و نرخێن بۆرسێن ناڤچه‌یێ ژی داكه‌تنه.
نه‌دووره ئه‌ڤ جۆره سه‌ردێر ل ده‌ربارا ئێریشا ته‌هرانێ و كارڤه‌ندانێن وێ زۆر بن، لێ به‌لێ مه‌به‌ستا ڤێ راپۆرێ رۆناهی خستنه سه‌رهه‌ژماره‌كه دن یا بوویه‌رانه.
چما ئیرانێ ئێریشا هه‌ولێرێ كر؟
ل ده‌مه‌كی ئیرانێ ژ هه‌موویان باشتر دزانه كو تو هێزه‌كه شه‌ركه‌را ئه‌مه‌ریكی و تو ولاتێن دن ل هه‌رێما باشوورێ كوردستانێ نینه، هه‌گه‌ر هێزه هه‌به ژی د چارچووڤه‌یا هه‌ڤپه‌یمانییا ناڤنه‌ته‌وه‌یی یا دژی دائیشێ ده یه و بۆ مه‌به‌ستا مه‌شقێ ل ورن، له‌وما چما ئێریش ل سه‌ر هه‌ولێرێ هات كرن؟
هه‌ر وه‌كه د شیرۆڤه‌كه پێشتر یا پێگه‌ها «داركا مازیێ» ده ئاماژه هاتیه كرن كو كۆمارا ئیسلامی یا ئیرانێ دخوازه كوشتنا قاسم سوله‌یمان بكه هێجه‌ت ژ بۆ كو پیلانێن خوه ل ناڤچه‌یێ ب جی بكه و گه‌له‌ك زه‌لاله كو دژاتیكرنا پرسا كورد و لاواز كرنا پێگه‌ها باشوورێ كوردستانێ د رێزێن پێشیێ یێن پیلانێن ئیرانێ ده یه، ته‌رخان كرنا دو مۆشه‌كان بۆ هه‌رێما باشوور ئاماژه‌یه‌كه ب هێزه و راستی یا ئه‌ڤێ ئیدیعایا مه د سه‌لمینه.
پێگه‌ها هه‌رێما باشوورێ كوردستانێ و تێكلیێن وێ یێن ناڤنه‌ته‌وه‌یی و گه‌شه‌یا ئابوورییا وێ، كۆمارا ئیسلامی و سه‌رجه‌م داگیركه‌ر و دوژمنێن كوردستانێ دلگران كرینه، كۆمارا ئیسلامی باش فێهم دكه ب لاواز كرنا هه‌رێما باشوور و دابرانا وێ ژ جڤاكا ناڤنه‌ته‌وه‌یی، دێ پرسا كوردی و ته‌ڤگه‌را كوردان یا رزگاریخوازیێ وێ راستی لاوازی و شكه‌ستنێ به، ژ به‌ر كو هه‌رێما باشوورێ كوردستانێ قیبله و په‌ناگه‌ها هه‌موو كوردێن رزگاریخوازێن جیهانێ نه و ئیران دخوازه ئه‌ڤێ قیبلا كوردان بكه كووراهییا ستراتیجیكا خوه و وه‌كه (حه‌وشا پشتێ) ره‌فتارێ ل گه‌ل بكه.
هه‌ر وه‌ك د په‌یاما دوهـ ده مه‌سعوود بارزانی سه‌رۆكێ پارتییا ده‌مۆكرات یا كوردستانێ و رێبه‌رێ ملله‌تێ كورد ته‌كه‌زی ل دوور كرنا كوردان ژ شه‌رێ ب وه‌كاله دابوو، لێ به‌لێ نه‌یارێن كوردان دخوازن كوردان تێ بێخن، دوژمنێن كوردان قه‌بوول ناكن شه‌ره‌ك ل ناڤچه‌یێ رووبده و كورد تێده نه‌یێن كوشتن و كوردستان تێده وێران نه‌به.
په‌یامه‌كه دن ل پشت وان دو مۆشه‌كێن ئاراسته‌ی هه‌ولێرێ هاتنه كرن هه‌یه ئه‌و ژی، ئه‌ڤ ئێریش وه‌كه لێدانه‌كه راسته راست بوو ل سه‌ر فكرا سه‌ربه‌خۆخوازێن كوردان وه‌كه ئه‌شكه‌را، مۆشك ژ پارێزگه‌ها كرمانشانێ یا رۆژهلاتا كوردستانێ هاتنه ئاڤێتن، ئه‌ڤ ژی په‌یامه‌كه زه‌لاله ب مه‌ره دبێژه كو ئه‌و ژی دوژمن هه‌ولێ دده‌ن په‌رچه كرنا كوردستانێ د مێشك و ناخێ كوردان ده بجی بكن ژ بۆ كو وه‌كه دیفاكتۆ قه‌بوول بكن، پشتگرییا خه‌لكێ كرمانشانێ ل پرسا ره‌فه‌راندۆما هه‌رێما باشوور و د هانا چوونا گه‌لێ باشوور وه‌ختا ئه‌ردهه‌ژا كرمانشانێ، ئه‌ڤێ پارێزگه‌هیێ ب داگیركه‌رێن كوردستانێ گۆتبوو كو فكرا په‌رچه‌بوونا كوردستانێ ته‌نێ ل جه‌م داگیركاران هه‌یه و تو كورده‌كه نشتیمان په‌روه‌ر وها نا فكره، له‌وما ئیران دخوازه ڤێ تۆلێ ژ كوردێن باشوور بستینه.
پیلانێن نهێنی یێن كۆمارا ئیسلامی یا ئیرانێ و خه‌ته‌را وان ل سه‌ر كوردان
هه‌ر وه‌كه پێگه‌ها داركا مازی پێشتر پێشبینی كری، ب عه‌كسا سلۆگانێن توند یێن به‌رپرسیارێن ره‌ژیما ته‌هرانێ ل ده‌ربارا تۆلهلدانا قاسم سوله‌یمانی، ئه‌ڤا ژ بۆ كۆمارا ئیسلامی و سپایێ پاسداران گرینگ، ئالیێ پرۆباگندیا تۆلهلدانێ یه، خوه‌یا بوو كو تۆلهلدانا قاسم سوله‌یمانی گه‌له‌ك ژ وێ یه‌كێ لاوازتر بوو وه‌كه به‌رپرسیارێن ئیرانێ پێشتر به‌هس كری، لێ تشتا كو دلگرانیا مه كوردان زێده دكه مێژوویا ره‌فتارێن كۆمارا ئیسلامی نه د ره‌وشێن هه‌ڤئاوا ده ل ناڤچه‌یێ و جیهانێ و د ڤێ مێژوویێ ده تێ خوه‌ندن كو كارێن نهێنی یێن ئیرانێ گه‌له‌ك ژ كارێن وێ یێ ئه‌شكه‌ره خه‌ته‌ر ترن.
كۆمارا ئیسلامی هه‌ولا سه‌ره‌كه ژ بۆ وێ یه‌كێ د ده كو هێزێن ئه‌مه‌ریكایێ ژ ناڤچه‌یێ ده‌ربخه، مۆشه‌ك بارانا ئیرۆ وه‌كه ئه‌شكه‌ره گه‌له‌ك ژ وێ یه‌كێ لاوازتره كو ئه‌مه‌ریكا ب سه‌ده‌ما وان ناڤچه‌یێ چۆل بكه، له‌ورا پرسا كو دمینه ئه‌ڤه نه‌دووره ئیرانێ پیلانێن ڤه‌شارتی ژ بۆ تێكدانا ناڤچه‌یێ ب رێیا ته‌رۆرێ و ته‌قینان هه‌به ژ به‌ر كو ئیرانێ گه‌له‌ك د ڤی واری ده ژیره، میناك هه‌گه‌ر به‌لگه‌یێن موحكه‌م به‌روه‌خت نه‌هاتبان ئیلان كرن، تو كه‌سێ باوه‌ر نه‌دكر كو سوله‌یمانی په‌یوه‌ندی ل گه‌ل رێخستنا دائیشێ ده هه‌نه، نها ژی سوله‌یمانی ل جه‌م خه‌لكێ ئاسایی وه‌كه قاره‌مانێ جه‌نگا دژی دائیشێ تێ مێزه كرن.
ئالی هه‌نه ئیران دكاره ب رێیا وان نه‌هامه‌تییان ل باشوورێ كوردستانێ بكه
هه‌ر وها پرسا كو جیێ دلگرانیێ یه ئه‌ڤه كو جیێ داخێ یه، تێكلیێن نێزیك یێن هنه‌ك ئالی و كه‌سێن كورد ژ كۆمارا ئیسلامی یا ئیرانێ و سپایێ پاسداران ده‌رفه‌ته‌ته گونجای ژ بۆ ره‌ژیما ئیرانێ چێكریه كو بكار كریارێن ڤه‌شارتی و تێكدانێ و نه‌هامه‌تییان ل ناڤا هه‌رێما باشوور بكه و خه‌ته‌ر بكه‌ڤه سه‌ر ده‌ستهلاتا كوردی.
پێویسته جڤاكا كوردی ب یه‌كگرتی و ئیرده‌یا رزگاریخوازانه و هه‌ستا نشتیمان په‌روه‌ریێ به، هه‌ر وها پشت ب رێبه‌رێ راسته‌قینه یێن خوه و كوردستانێ بگرن ژ بۆ كو پیلانێن داگیركه‌رێن كوردستانێ و نشتیمانفرۆشێن ب كرێگرتی بكه‌نه بلقا سه‌ر ئاڤێ و رێ نه‌ده‌ن ده‌ستكه‌فتێن مه ژ ناڤ ببن.
