نێچیرڤان بارزانی سەرۆکێ ھەرێما کوردستانێ ب داخوازهكا فەرمی بەشداری ل کۆربەندا ئابۆریا جیھانی یا داڤۆسێ دکەت کو رۆژێن 21 ھەتا 24ێ ڤێ مەھێ و د سالڤەگەرا 50 سالیا دامەزراندنێ كۆربهندی دا برێڤە دچیت، كۆربهند دێ ب ناڤێ «جیھانەکا یەکگرتی یا گهشهیا بەردەوام» دهێته ساز كرن و دێ رۆناهیێ ئێخیته سەر پرسێن جیھانی یێن تایبەت ب ئابووری، سیاسەت، ئاساییش و ئارامیێ ڤه.
د دەما بەشداریکرنێ دا، سەرۆک نێچیرڤان بارزانی دێ ل گەل دۆنالد ترامپ سەرۆکێ ئهمەریکا و ئانتۆنیۆ گۆتیرێز سكرتێرێ گشتی یێ نەتەوەیێن ئێكگرتی و ھەژمارەکا سەرکردە، وەزیر و بەرپرسێن بلندێن وەلاتان كۆم بیت.
د کۆمبوونان دا پێشخستنا پەیوەندیێن ھەرێما کوردستانێ ل گەل جڤاکا ناڤدەولەتی و سیاسەت و ھەلوەستا ھەرێمێ و گوههرینا بیر و رامانێن د دەربارێ پرسێن ھەرێمی و جیھانی دا دێ هێن گۆتوبێژ كرن.
ھەر ل ڤێ بەشداریکرنێ دا، سەرۆک نێچیرڤان بارزانی د روونشتنەکا داڤۆسێ دا ب ناڤێ «رۆژھلاتا ناڤینا نەئارام» دا دێ گۆتارهكێ پێشكێش كهت و تێدا ئەنجامێن دەمدرێژێن ئالۆزی و تێکدانێن بەردەوامێن رۆژھلاتا ناڤین کو بووینە ژێدهرا ترس و دلگرانیەکا مەزنا جیھانی و ناڤچەیی بهحس بكهت، ههر وها دێ رۆناهیێ ئێخیته سەر كاریگهریا ستراتیجیا قەیرانا نھا ل سەر ئاشتی و ئارامیا ل کەنداڤی، ئیراق و سووریێ.
