سالڤه‌گه‌را كۆمارا كوردستانێ و به‌رزه‌كرنا ده‌رفه‌ته‌كا زێرین ل رۆژئاڤایا وه‌لات
سالرۆژا 74ێ یا دامەزراندنا کۆمارا کوردستانێ و دەرسێن لادانێ ژ هزر و سومبلێن کۆمارا کوردستانێ و ژ دەستچوونا دەرفەتەکا زێرین ل رۆژئاڤایا وه‌لات
دامەزراندنا کۆمارا نەتەوەیی – دیمۆکراتیکی یا کوردستانێ، وەکە یەک ژ گرنگترین و وێره‌كترین وان بریارانه د دیرۆکا سەردەم یا گەلێ کورد دا و بوویەرێن ڤێ داویێ ل رۆژئاڤایێ وەلاتی زەلال دکەت کو لادان ژ هزر و سیمبۆلێن یەکەمین دەستهەلاتا سەردەم یا کوردی ژ بلی داگیرکاران زێدەتر چ دەستکەفتەکێ خوە نابیت.
ئه‌ڤرۆ 2ی رێبەندان 74 مین سال رۆژا دامەزراندنا کۆمارا کوردستانێ یە، کۆمارەک نەتەویی- دەمۆکراتیک کو ل سەر دەستێ پێشەوا «قازی محەمەد» و پارتیا دەمۆکرات ل چارچرا یا باژارێ مەهابادێ ل رۆژهلاتێ کوردستانێ ب پشتەڤانییا شۆرەشگێرێن پارچەیێن دی یێن کوردستانێ، هات دامەزراندن، ب تایبەتی جەنەرال «مستەفا بارزانی» و رێ هەڤالێن وی کو شیایین سەروەرییا نەتەوەیی بگەهینە گۆپیتکێ و بۆ دەما نێزیكی سالەکێ حکوومەتەکا نەتەوەیی – دەمۆکراتیک ب رێڤە ببەن.
هەرچەند ژبەر پیلانێن ناڤدەولەتی کۆمارا کوردستانێ نه‌شیا گەلەک بەردەوام بیت و ژیانا وێ یا کورت بوو، لێ بەلێ هنده‌ك دەرسێن گرنگ و پر بها ژ بۆ کوردان و خەباتا وان یا رەوا بجهـ هێلان کو د هەر جهەکێ دا ئەو دەرس یێن بووینە رێنیشاندەرێن خەباتا نەتەوەیی، کو کورد و کوردستانێ خێر ژێ دیتییە و بەرەڤاژی ڤان دەرسان کورد و کوردستان تووشی نەخوەشی و مالوێرانیێ بووینە.
کۆمارا کوردستانێ بریارەکە شۆرشگێرانە و دلێرانە بوو ژ بەر کو د رەوشەکا وها دا بریار ل سەر دامەزراندنا وێ هات دان کو داگیرکارێن کوردستانێ پیلانێن خوە ژ بۆ ئاسمیلە کرن و قرکرنا کوردان ل کوردستانێ گه‌هاندبوون قۆناغەکا خەتەر، د راستی دا ئەم دشێین ببێژین کو ژیانا کورت یا کۆمارا کوردستانێ هەزاران سالێن ژیانێ ب کوردستانێ و دۆزا وان یا رەوا به‌خشین و پیلانێن دوژمنێن خوە یێن ژناڤبرنا کورد و کوردستانێ هەلوەشاندن.
گرنگترین بوویەرێن کوردستانێ پاش ژناڤچوونا کۆمارێ و بدارڤەکرنا پێشەوایێ یەکەمین کۆمارا کوردستانێ، ژ بۆ مە زەلال دكه‌ن کو ئەو هزرێن کۆمار پێ هاتییە دامەزراندن نها ژی دشێن ببن بناغەیێ دانانا کیانەکێ نەتەوه‌یی یێ کوردی و ب لادان ژ سیمبۆل و هزرێن کۆمارێ، ب تەنێ دێ نەتەوەیا مە تووشی نەخوەشی و زولم و ستەما زێدەتر بیت.
ژ بۆ سەلماندنا ڤێ نه‌رینا خوە، ئەم دێ دو نموونه‌یێن باشوور و رۆژئاڤا کوردستانێ باس كه‌ین، د سالێن نۆتان ژ سەدەیا رابووری دا و پاش شاشیێن کوژەک یێن رژێما داگیرکارا بەعس، گەلێ رزگاریخوازێ باشوورێ کوردستانێ، ب رێبەراتیا پارتیێن شۆرەشگێر و خەباتکارێن کوردستانێ ئەڤ پارچه‌یا نیشتیمانێ خوە، د شۆرەشەکا مەزن دا، زنجیره‌یێن کوێلەبوونێ قەتاندن و بناغەیەک ب هێز ژ بۆ دامەزراندنا دەستهلاتەکا کوردی دانا، پارتیێن ڤێ پارچەیا کوردستانێ بگشتی و پارتییا دەمۆکرات ب تایبەتی کو ئەو ب خوە ل ژێر سیبەرا کۆمارا کوردستانێ هاتبوو ئاڤا کرن، ب بەرچاڤ وەرگرتنا هزرێن نەتەوەیی یێن کومارا کوردستانێ، پەرلەمان و حکوومەتەکا نەتەوەیی دامەزراند و ئەو ئالا جارەکا دی بلند هلدا کو پێشەوا ب ئیمانەت دابوو دەست جەنەرال «مستەفا بارزانی».
ده‌ستهه‌لاتا نه‌ته‌وه‌یی یا هه‌رێما باشوورێ كوردستانێ بۆ ستریه‌ك د چاڤێ دوژمن و داگیركارێن كوردستانێ دا و ب ده‌هان پیلانێن قرێژ و پیس ل دژی وێ هاتن ساز كرن، لێ به‌لێ ژ به‌ر كو حه‌زه‌كا نه‌ته‌وه‌یی و دیمۆكراتی ل پشت بوو، چ یه‌ك ژ وان پیلانان نه‌كاری وێ ژناڤ ببه‌ن.
داگیركاران شه‌رێ ناڤخوه تێدا دا ده‌ستپێكرن، ته‌رۆر و ته‌قاندن تێدا ئه‌نجام دان، داعش ڤێرا به‌ردا، كاره‌ساتا 16ی ئۆكتۆبه‌رێ خولقاند و ب ده‌هان پیلانێن دی ئه‌نجام دان، لێ به‌لێ نه‌شیان كوردستانێ ژناڤ ببه‌ن و ئه‌و ئالایێ ژ كۆمارا مهابادێ مایی ل باشوورێ كوردستانێ بیننه خوار.
كوردستان هه‌ر ل سه‌ر لنگایه، ژ به‌ر كو ئیراده‌یه‌كا بهێز وه‌كه ئیراده‌یا كۆمارا كوردستانێ سه‌ركرداتییا وێ دكه‌ت، وێره‌كییه‌ك كو هه‌ر چه‌ند هه‌موو جیهانێ و خوه به‌شه‌ك ژ كوردان ژی سه‌رخوه‌بوونا كوردستانێ ب خه‌ونا شاعێران ناڤ دكر، لێ به‌لێ د ریفراندۆمه‌كا دیرۆكی دا زێده‌تر ژ 90% ژ گه‌لێ كوردستانێ ب به‌لێ ده‌نگ ژ بۆ سه‌رخوه‌بوونا كوردستانێ دا و بۆ هه‌تا هه‌تایێ ب داگیركاران و ب جیهانێ گۆت: «سه‌رخوه‌بوونا كوردستانێ خه‌ون و خه‌یالا شاعێران نینه، به‌لكو حه‌ز و داخوازییه‌كا ره‌وا یا ده‌هان ملیۆن كوردێن ژێر ده‌سته».
هه‌ر چه‌نده پیلانگێری و خیانه‌تا قرێژ یا 16ی ئۆكتۆبه‌رێ رێ نه‌دا ئه‌ڤ جاره بریارێن ریفراندۆمێ ب پراكتیك بهێنه ئه‌نجام دان، لێ به‌لێ بێ گومان ده‌ستكه‌فتێن وێ بریارا وێره‌كانه یا گه‌لێ كوردستانێ، هه‌ڤشێوه‌یێ ده‌ستكه‌فتێن كۆمارا مهابادێ، هزر كرن د حه‌لاندن و ئاسمیله‌كرنا كوردان كرنه د گۆری دا، بریار یا نه‌ته‌وه‌یی بوو، هه‌ر ژ به‌ر ڤێ یه‌كێ كوردێن پارچه‌یێن دی، پێشوازییه‌كا گه‌رم لێ كر و گۆڤه‌ند گێران.
ئیمرالیێ و قه‌ندیلێ دهرفتهكا زێرین ل رۆژئاڤا وه‌لات ژ ده‌ست گه‌لێ كورد بر
د ڤان چه‌ند سالێن داویێ دا، ژ به‌ر خوه‌پێشاندانێن سووریێ، ده‌رفه‌ته‌كا زێرین ژ بۆ رۆژئاڤایێ كوردستانێ، په‌یدابوو، هه‌رچه‌ند ده‌وله‌تا داگیركارا به‌شار ئه‌سه‌د ژ به‌ر نه‌شیانێ و ب حه‌زا خوه ل سه‌ر راسپارده‌یا ئیرانێ، رۆژئاڤا كوردستانێ دا ده‌ست په‌كه‌كه یا هه‌ڤالبه‌ندا خوه، لێ بێ گومان وێره‌كی و باوه‌ر و تێهزرینه‌كا نه‌ته‌وه‌یی د شیا ڤێ پارچه‌یا كوردستانێ بكه‌ته كیانه‌كێ كوردی، لێ به‌لێ جهێ داخێ یه، سیاسه‌تا سه‌ركرده‌یێن په‌كه‌كێ «ئیمرالی و قه‌ندیل» كو به‌رده‌وام ل دژی سیمبول و هزرێن كۆمارا كوردستانێ بوو، ئه‌و ده‌رفه‌ت ژ ده‌ست كوردان بر و رۆژئاڤایێ كوردستانێ تووشی ره‌وشه‌كێ كرن كو هه‌ر رۆژ نووچه‌یێن كوشتنا گه‌نجێن كوردستانێ و قركرنا وان و گوهه‌رینا دیمۆگرافیا ناڤچه‌یێ ژ ئالیێ داگیركاران، جان و هه‌ست و وژدانا هه‌موو كوردێن نه‌ته‌وه‌پارێز بریندار دكه‌ت.
گه‌ر په‌كه‌كه ده‌ست ژ ئالیكاریكرنا داگیركاران به‌ردابا و ب ل به‌رچاڤ وه‌رگرتنا هزرێن دیمۆكراتی یێن كۆمارا كوردستانێ به‌ره‌ڤاژی ته‌رۆر و ب دارڤه‌كرن و زیندان كرنێ، رێ ب خه‌باتكارێن دی یێن رۆژئاڤایێ كوردستانێ دابا، ژ بۆ ئاڤاكرنا كیانه‌كێ كوردی به‌شدار ببان، ئه‌رێ گه‌لۆ رۆژئاڤا ب هێزتر نه‌دبوو؟
گه‌ر په‌كه‌كێ ده‌ست ژ مه‌زنخوازیێ و تاكره‌ویێ به‌ردابا و رێ ب پێشمه‌رگه‌یێن رۆژئاڤا دابا ڤه‌گه‌رن ناڤچه‌یێن خوه و هه‌موویان ب هه‌ڤرا به‌رگری ژ خاكا خوه كربا، ئه‌رێ دا رۆژئاڤا ب ڤێ ئاسانیێ هێته داگیر كرن؟
ئه‌گه‌ر په‌كه‌كێ نیڤا وێ باوه‌رییا دایه عه‌ره‌بان ب كوردان دابا و ل جهێ وێ چه‌ندێ كو هێزێن خوه ژ بۆ خزمه‌تكرنا پیلانێن داگیركاران (شه‌نگال و كه‌ركووكێ) ته‌رخان كربان، ئاراسته‌یا رزگارییا یه‌كجاری ل رۆژئاڤایێ كوردستانێ بكارئینابا، تو دبێژی ب وێ ئاسانیێ هاتبا داگیركرن؟
ب راستی گه‌ر رێڤه‌به‌رییا پارتییا كاركه‌رێن كوردستانێ په‌كه‌كێ وه‌كو رێكخستنه‌كا باكورێ كوردستانێ ل جهێ ده‌ستوه‌ردانێ د كاروبارێن رۆژئاڤا و دروست كرنا دووڤه‌لانكێن خوه و هلدانا وێنه‌یێ رێبه‌رێ خوه یێ زیندان كری و ئالایێن تایبه‌ت ب په‌كه‌كێ… هتد رێ دابا كوردێن رۆژئاڤا و رێكخستن و رێبه‌رێن وان ب خوه ناڤچه‌یا خوه ئیداره بكه‌ن و ب پارێزن، تو دبێژی توركیا ب ڤی ئاواییێ هێسان شیابا هێرشیێ وێ به‌شا خاكا نشتیمان بكه‌ت و ب هۆڤانه‌ترین شێوه وان ژناڤ ببه‌ت؟
ئه‌ڤ نڤیسینه ب رامانا كێم كرن و كێم ره‌نگ كرنا تاوان و جینایه‌ت و وه‌حشیگه‌ریێن تركیێ و سووریێ ناهێن، بێ گومان ژ وان كاره‌ساتێن ب سه‌ر رۆژئاڤایێ كوردستانێ دا هاتین، سووچبارا سه‌ره‌كی ده‌وله‌تا داگیركارا تركیێ و سووریێ نه، لێ به‌لێ نابیت چاڤێن خوه ل وان شاشی و كێماسیێن سه‌ركرداتییا په‌كه‌كێ ژی كرین، ب نقینین، به‌لكو پێدڤییه په‌ردێ ل سه‌ر وان سیاسه‌تێن په‌كه‌كێ هه‌لده‌ین كو جهێ گومانێ نه و ژ بلی خزمه‌تكرنا داگیركارێن كوردستانێ، بچووكترین ده‌ستكه‌فت ژ بۆ كوردستانێ و خه‌باتا وێ یا ره‌وا تێدا نه‌بوویه.
په‌كه‌كه ب هێجه‌تا نه‌هێلانا خه‌ته‌را شه‌رێ ناڤخوه رێ ب هێزا پێشمه‌رگه‌هێن رۆژئاڤا نه‌دا ڤه‌گه‌ریت، لێ جهێ داخێ یه سه‌ركرداتییا په‌كه‌كێ ل جهێ هزر كرن د چاوانییا به‌رهنگاربوونا هێرشێن توركیا دا، ئه‌و هێز ژ بۆ ده‌سته‌سه‌ر كرنا وان كه‌سان ته‌رخان دكر كو ئالایێ كوردستانێ یێ میراتێ كۆمارا كوردستانێ بلند هه‌لددان.
سیاسه‌تا شاش یا سه‌ركرده‌یێن په‌كه‌كێ، رۆژئاڤا كوردستانێ ژ هه‌مبێزا داگیركاره‌كی هاڤێته هه‌مبێزا داگیركاره‌كێ دی دا
په‌كه‌كێ د گۆت: دێ شه‌ری به‌م ئه‌نقه‌رێ، لێ به‌لێ مه دیت، عه‌فرین و زۆر ناڤچه‌یێن دی یێن رۆژئاڤا كوردستانێ هاتن داگیر كرن و نه ب ته‌نێ شه‌ر ل ئه‌نقه‌رێ نه‌هات كرن، به‌لكو یه‌ك گوللــه ژی ل وێ ده‌رێ نه هات ته‌قاندن.
ب كورتی سیاسه‌تا شاش یا سه‌ركرده‌یێن په‌كه‌كێ، رۆژئاڤا كوردستانێ ژ هه‌مبێزا داگیركاره‌كی هاڤێته هه‌مبێزا داگیركاره‌كێ دی دا و ئه‌ڤه ژی وه‌ك زۆر سیاسه‌تێن دی یێن په‌كه‌كێ ب ته‌نێ د به‌رژه‌وه‌ندییا فاشێستێن تورك و ب زیانا گه‌لێ ژێر ده‌ستێ كورد ب داوی هات، ب وێ هیڤیێ كو وه‌لاتیێن رزگاریخواز و نه‌ته‌وه پارێزێن رۆژئاڤایێ كوردستانێ وێره‌كی و نه‌ته‌وه‌خوازی و دیمۆكراتی بوون و سیمبولێن دی یێن كۆمارا كوردستانێ بكه‌نه بناغه‌یێ خه‌باتا خوه یا قۆناغا بهێت و رێ نه‌ده‌ن ژ ڤێ زێده‌تر خاك و نشتیمان و ئیراده‌یا وان ببیته یارییه‌ك د ده‌ست هنده‌ك رێكخستنێن ب ناڤ كوردی كو هه‌تا نها ژ بلی مفاگه‌هاندنێ ژ بۆ داگیركاران، چ خاله‌كا ئه‌رێنی د دیرۆكا كوردان دا تۆمار نه‌كرییه، ده‌ما وێ یه‌كێ هاتییه سه‌ركرده‌یێن رۆژئاڤا باوه‌ریێ ب خوه و شیان و پێگه‌ها خوه هه‌بیت و ل جهێ وێ چه‌ندێ كو گوهدارییا ئیمرالیێ و قه‌ندیلێ بكه‌ن، ئه‌و ب خوه بریارێ ل سه‌ر چاره‌نڤیسا خوه بده‌ن و ب یاخیبوونه‌كا ره‌وا رۆژئاڤا كوردستانێ به‌ر ب پاشه‌رۆژه‌كا باشتر ئاراسته بكه‌ن.
بێ گومان ب رێیا ئه‌ڤێ یه‌كێ، د شیان دایه نه‌هامه‌تیێن كوردان بهێن كێم كرن و دهرفتهكا دی دروست ببیت ژ بۆ وێ یه‌كێ كو ئالایێ یه‌كه‌م كۆمارا كوردی كۆمارا كوردستانێ پشتی باشوورێ كوردستانێ ل به‌شه‌كێ دی یێ ولاتی دا ئازادانه بهێته هه‌لدان.
