سحربازیێن پەکەکێ و چیرۆکا ئێکەتییا نەتەوەیی

سحربازیێن پەکەکێ و چیرۆکا ئێکەتییا نەتەوەیی

هێزا پەکەکێ یا سەرەکی سحربازی یە، سحربازەک دێ دەسمالەک ڤالا نیشان دەت دێ هەژینیت و د ناڤا وێ دا چووچکەکێ دەرئێخیت، یان ژی قەفەسەکێ کو چووچک تێدایە دێ پاتەیەکێ هاڤێژیت سەر و چووچک دێ بەرزە بیت، پەکەکە درست ڤێ دکەت و ب ڤی رەنگی یە، تشتەکێ هەیی وەکو نەیی، تشتەکێ نەیی ژی وەکو هەیی نیشاندان د دەت، ژبەر ڤێ یەکێ ژی بزاڤا پەکەکێ، بزاڤەکا سحربازی یە.

سحرباز ژ تەماشەڤانان گەلەک دەست قوتانێن مەزن وەردگریت، لێ بەلێ هەموو هێزا وی ل سەر خاپاندنا چاڤایە، بۆ نموونە دەما ل سەر دەپێ شانۆیێ، مارەکێ د قەفەسێ دا ژناڤ دبەت لێ بەلێ گەر ب راستی مەترسیا ماری هەبیت نەشێت چ کاران بکەت، پەکەکە ژی وەسایە سحربازیەکێ دکەت و دێ خۆ وەکی کەسەک گەلەک ب هێز، ولات پارێز، و گەلەک مێرخاس  دیار کەت، لێ دەما مەترسیا راست یا دوژمنی بەر ب ویڤە دهێت نەشێت سحربازییا خۆ نیشان بدەت، بۆ نموونه‌ پەکەکێ ل سەر شەرێ رۆژئاڤا دگۆت: «هەموو دنیا پێدڤی مەیە، هه‌گه‌ر ئەمەریکا نەبیت ژی ئەم دێ هەر سەرکەڤین، هه‌گه‌ر ئەم نەباین ئەمەریکا شیانێن شەرکرنێ نەبوو…..». لێ بەلێ د شەرێ عەفرینێ دا ژ بەر کو هاریکارییا هێزێن بیانی نەبوو ژ بلی دەمەکێ ب زیانێن مەزن ناچار مان عەفرینێ بەردن (ل گەل ترکیێ پەیمانەک گرێدا و دەرکەفتن).

 هێزێن ئەمەریکا ل سەر سنۆرێ رۆژئاڤا و ترکیێ ڤەکێشان سەرێ کانیێ، و گرێ سپی د ناڤبەرا 10 رۆژان دا هاتە بەردان، دەما کو ئەم ڤان راستیان دبێژین رامانا وێ ئەو نینە کو ئەم بهایێ وان کەسێن شەر کری و بەرەڤانی ژ ولاتی کری و شەهید بووی کێم دکەین، ئەو ژ بۆ مە جهێ رێزەک مەزنن لێ بەلێ د راستیێ دا پەکەکێ وەسا دا خۆیا کرن کو دێ شەرەکێ گەلەک مەزن ئەنجام دەت، لێ دیاربوو کو شەرەک گەلەک بچووک روو دا، ئەو شەر ژی رۆحا خۆ ژ دیرۆکا کوردینیێ دگرت و بەرخوەدان ب وێ رۆحێ هات کرن.

بێ گۆمان سحرێن سحربازی ب دوماهی ناهێن، پەکەکێ ل رۆژئاڤا تا کو پێشیێ ل چوونا خوە یا نەباش بگریت دیسان دەست ب سحرێن نوو کرن، ڤێ جارێ ل بن دەستمالا ئێکەتییا نەتەوەیی دەرکەفت.

گەلۆ پەکەکە و ئێکەتییا نەتەوەیی دشێن دگەل هەڤدو بن؟

دەما پەکەکە تەنگاڤ دبیت چەند سلۆگانان ب کار دئینیت، ئێک ژ وان گۆتنان «ئێکەتییا نەتەوەیی یە»، لێ بەلێ د راستییا پەکەکێ دا، د راستی دا فکرا پەکەکێ یا ئایدۆلۆژی و ئارمانجا وێ یا ستراتیژی، ل دژی راستیا تەرزێ ئێکەتییا نەتەوەیی یە، پەکەکە دبێژیت: «پێدڤییه‌ کورد ل تەهرانێ ببنە ئیرانی، ل ترکیێ ببنە ترک، ل ئیراقێ ببنە ئیراقی و ل سووریێ ببنە سووری»، ڤێ یەکێ وەک ئەساس وەردگریت، پەکەکە ڤێ گۆتنێ نەتنێ ژ بەر سەدەمێن سیاسی دبێژیت، ب راستی ژی دخوازیت جڤاکا کوردی ب ڤان دەولەتان ڤە بهێن گرێدان، گەر وەسا نەبیت نەدگۆت شه‌نگال پارچەیەکا ئیراقێ یە و ئالایێ ئیراقێ نە ددا دەستێ گەنجێن ئێزدی و نەدبوو پارچەیەک ژ چەتەیێن حەشدا شەعبی.

بەلێ پەکەکە حەز ژ ئێکەتییا نەتەوەیی ناکەت، پەکەکە ل ڤان 3 مەهێن دوماهیێ تنێ ژ بەر ئالیگرێن خۆ یە کو باس ل ئێکەتییا نەتەوەیی دکەت، داکو ببێژیت لێ بنێرن ئەم دخوازین ئێکەتییا نەتەوەیی چێبیت، ل دەردۆرێن خوە ژی چەند هۆنەرمەند و چەند نڤیسکار و 3 تا 4 حزبان کۆم دکەت و خۆ وەکە خەباتکارێن ئێکەتییا نەتەوەیی ددەتە نیشاندان، د دووڤ دا دبێژن تشتێ ژ بۆ ئێکەتییا نەتەوەیی کەتییە سەر ملێن من، من بجهـ ئینان، لێ بەلێ لێ بنێرن PDK ناهێتە سەر ڤێ خەتێ، سیاسەتا خەندەکان یا سالا 2016ێ و تەسلیمکرنا عەفرینێ ل سالا 2018ێ و هەمان دەم ئەڤ داگیرکرنا رۆژئاڤا یا ڤێ دوماهیێ دیارکر کو پەکەکە د سیاسەتێ دا گەلەک لاوازە و گەلەک هێزا خوە ژی ژ دەست دایە، پەکەکە هەرسال دبێژیت ئەڤ سال سالا سەرکەفتنێ یە، ئەڤسالە ئەم دێ دوژمنێ خۆ ژناڤبەین، ئێدی گەلێ کورد باوەری ب ڤان رەنگێن سلۆگانان نەمایە، پەکەکە داکو ئیعتیبارا خۆ د ناڤ گەلێ کورد دا راستڤەکەت، خۆ وەک غەدرلێکری نیشان ددەت و وەکو هێزا سەرەکی یاکو ئێکەتییا نەتەوەیی دپارێزیت خۆ نیشان ددەت، د راستی دا پەکەکە نە دگەل ئێکەتییا نەتەوەیی یە، تنێ ژ بۆ کو ئیعتیبارا خوە نوو بکەت، هێزێ کۆم بکەت و ئالیگرێن خۆ بێخیتە سەر خەتێ ڤان گۆتنان ب کار دئینیت.

پەکەکە داکو ڤێ ئارمانجا خۆ پێکبینیت ل سەر چارچووڤەیا ستراتیژیەکێ حەرەکەتێ دکەت، پێیه‌كێ سەرەکی یێ ڤێ ستراتیژیێ میدیایا وانە دەما پێدڤی بکەت ئێریشێ ل سەر پارتییا دیمۆکرات یا کوردستانێ PDK د راوەستینیت و هەر رۆژ ل سەر ئێکەتییا نەتەوەیی نووچەیان بەلاڤ دکەت و ژ بلی شەرێ رۆژئاڤا ل سەر کورد و کوردستانێ نێزیک بوونەکا نەرم نیشان د دا، لێ بەلێ پیێ دووێ یێ ڤێ ستراتیژیێ دبێژیت تشتێ من دشیا ئەنجام بدەم، من ئەنجام دا لێ بنێرن هێزا کو ئێکەتییا نەتەوەیی دخوازیت تنێ ئەزم، و ڤان رۆژێن دوماهیێ دیسان دەست ب رەشکرنا په‌ده‌كێ کرییە و دبێژیت: «ناهێتە خەتا ئێکەتییا نەتەوەیی گەلۆ ئەز چ بکەم»، واتە سحرباز ئەو خەنجەرا بەرێ وێ ل نەتەوه‌یا کورد وەکو ئێکەتییا نەتەوه‌یا کورد نیشان ددەت.

 ل 18/1/2020ێ ل ئامەدێ ب ناڤێ خەباتا ئێکەتییا نەتەوەیی جڤینەک هاتە ل دارخستن، یێن بەشداری ڤێ جڤینێ بووی (DTK, DBP, HDP) بوون، ئەڤ پارتی یە هەموو ئەون یێن ل باکورێ کوردستانێ ل سەر خەتا پەکەکێ سیاسەتێ دکەن و ئارمانجا وان یا سەرەکی ئەڤە کو پرۆژەیا ترکیە بوونێ پێکبینن، نە مومکینە کو بزاڤەکا سیاسی هەم ترکیە بوونێ ئارمانج بکەت هەم ژی ئێکەتییا نەتەوەیی بپارێزیت، ئەڤ هەردو مەسەلە ل دژی ئێکن و د گەل هەڤ دو د شەرەکێ بەردەوام دا نە و دو نێزیک بوونێن سیاسی یێن ژ هەڤ جودانە.

ل ڤێرە پرسیارەکا بچووک دێ کەم، ئەو دەولەتا کو رێکێ نادەت هەدەپە خوە ب لڤینیت، چەوا چێدبیت مۆلەتا خەباتا ئێکەتییا نەتەوەیی بدەتن؟، گەلۆ دەولەت ژی ژ ئالیێ مژوولکرنا کوردانە؟ بەلێ مسۆگەر وەیە، دەولەت دزانیت کو ئەڤ خەباتە هەر هەموو دێ بێ ئەنجام بمینن، ژ بەر ڤێ یەکێ ژی دخوازیت کورد هەڤدو مژوول بکەن، هەدەپە و پەکەکە ل ئەنقەرە تورکچیتیێ ل ئامەدێ ژی وەکو کوردستانی بزاڤێ دکەن و ب ڤێ سەدەمێ ژی ئێکەتییا نەتەوه‌یا کورد ئێخستییە رەوشەکا وەها کو گاڤەکێ بەر ب پێش و دو گاڤان بەر ب پاش دچیت.

کوردان پێدڤی ب ڤێ سحربازیێ نینە، کوردان پێدڤێ ب ئێکەتییا نەتەوەیی یا راست هەیە، دەستکەفت و هەبوونا گەلێ کورد د بن مەترسیێ دا نە، ئێکەتییا نەتەوەیی ب سیناریۆیێن سیاسی و کۆنسێرتان بجهـ ناهێت، بەری هەر تشتەکێ ب فیداکاری و نیقاشەکا راستەقینە پێکدهێت و پێدڤییا وێ ژی ب ستراتیژییا نەتەوەیی و بەرنامەیەکێ رێكخستی هەیە، پەکەکە پێدڤییه‌ دەست ژ ڤێ سحربازیێ بەردەت بەری هەر تشتی میدیایا خۆ ل سەر خەتا دوژمناتییا کوردان دەربێخیت، پێدڤییە ئەوێن کو ب کۆد ناڤان گۆتاران دنڤیسن، وەکو دۆران کالکان و مستەفا قاراسۆ ڤان کریارێن خۆ یێن دوژمناتییا د ناڤبەرا کوردان د شارینن، دەست ژ ڤی کارێ خۆ بەردەن.

پوستێن ھەمان بەش