پشتی وێ ئەردهەژا ل باکوری کوردستانی ل شەڤا 24/1/2020ان چێبووی و بوویە سەدەما زەرەر و زیانێن هەری مەزن ل باکورێ کوردستانێ، تشتا هەری بالکێش و پر خەم ئەڤ بوو، دەما هاتیە ئەشکەرە کرن پشتی ئەردهەژێ پرسا هەری زیدە کو ل ناڤا ترکیێ دە، ترکان ل بەرسڤا وێ نێری د ناڤا ئەنتەرنێتێ دە ئەڤ پرسە بوو “گەلۆ یێن زرار دیتی و مری تورکێن رەسەنن یانژی تورکێن چیا” کو هەر کەس باش دزانە مەبەست ژ ڤێ پرسێ و مەبەست ژ تورکێن چیایی کینە!
ئەڤ پرسا کو زۆرترین جاران گەران ل دووف بەرسڤا وی هاتیە کرن د گۆگلی دە پرسەکە سادە نینە بەلکو هوڤیتیا گەلێ ترک ئەو گەلی کو نها ئۆجالان و پەکەکە ب تایبەتی گرۆپا ئەنقەرەیێ دخوازن وەکە برا ب کوردان رە بدن ناسین و قەبوولکرن، نیشان ددە، هوڤیتیەک وها کو دبە ئەڤ رەنگێ هۆڤیتیێ دناڤا گیانداران ب دەگمەن بهێت دیتن.
گەلۆ براتییا گەلان ژ کو دەرێ هات؟!
ئا رووهن و ئەشکەرە یە کو پاش گرتنا ئۆجالان و تەسلیم بوونا ئۆجالان د زیندانێ دە، ئۆجالان ب پراکتیک کەتە د خزمەتا ترکیێ دە و خوەست ژ بۆ کو خوە بپارێزە، ستراتیژیا کو پەکەکێ پێش وێ خەبات ژ بۆ دکر و لسەر وێ ستراتیژ و ئەساسێ ب هەزاران جوان و خورتێن کورد گهانە ناڤا وێ رێخستنێ دە و جانێ خوە کر قوربانی، بگوهەرە و باس ل تشتەکێ وها بکە کو خزمەت ژ بۆ ترکیێ تێدە هەبە، ئەو ستراتیژ ژی براتیا گەلان بوو کو ئۆجالان بێ کو ل سەرکرداتیا پەکەکێ ڤەگەرە بێ کو کەسەکێ ئاگەهـ ژێ هەبە د کوژیێن تاری یێن زیندانا ئیمرالیێ دە بریار ل سەر دا و ب رێیا پارێزەرێن خوە وەکە فەرمانەکە ئیلاهی ژ گرۆپا ئەنقەرێ رە شاند.
ئۆجالان و پەکەکێ ب ڤێ ستراتیژا نوو کو بێ گۆمان ستراتیژیەکە ب تەنێ دکەڤە د خزمەتا گەلێن سەردەست ل سەر کوردان هەموو سۆز و ئارمانج سلۆگانێن خوە یێن بەرێ کو جوان و خورتێن کوردان جانێ خوە ل سەر دانابوو ژ بیر کرن، ب ڤێ یەکێ پەکەکە ژ ستراتیژا دەولەتا مەزن ئا کوردستانێ هاتە سەر وێ یەکێ کو ب تەنێ باس ل مافێن زۆر بچووک یێن کوردان د چارچۆڤێ ولاتێن داگیرکارێن کوردستانێ دە بکە، و گەلێ کورد ب تشتەک وها ڤە مژوول بکە کو تو جوران وێ پیک نەهێ.
ب بەرچاڤگرتنا وێ یەکێ کو د شەرێ سیاسی دە کوردان پێتڤی ب چوونە ناڤ کووراتیێن فەلسەفێ و شەرێ زاراڤێن سیاسی نینە، هندی پێتڤی ب سیاسەتەک ریالیستی و پراگماتیک هەی، لێ دیسان ئۆجالان دخوازە وی شەری ب فەلسەفەیا شکلانیەت و عەقلانیەتێ ب رێڤە ببە. ئۆجالان هەیا نها ل بن باندۆرا تشتێن دەستپێکی و کۆمەک بها و گۆتەگۆتایە کو ب تو ئاوای دگەل دەرەنجامین کەتواری دە هەڤناگرە. ب بەرچاڤ وەرگرتنا وێ یەکێ کو هەیا نها ئۆجالان دگەل تشتێن نوو و کەتواری و دەرەنجام و کاریگەریا وان د قادا سیاسی یا ترکیێ دە مامەلە نەکریە، هەیا نها ژی ئەو ل بن باندۆرا بەکارئانینا چەمکێن ژەنگ گرتی یێن سەر دەمێ شەرێ سا و چەرخێن کۆلۆنیالیزما پۆرتۆگال و ئیسپانیا و هۆلەند و دەولەتێن دن یێن مینا وان دە یە د ناڤچەیێ دە.
بکار ئانینا چەمکێ ئیمپریالیست و هەڤ شێوەیێن وێ ل سەر دەمێ تەک جەمسەریا جیهانێ دە، ژ بلی خوە خشیم کرن ژ جەوهەرا دۆزا نەتەوەیەکێ زێدەتر چ رامانەکا دی نینە. ئەو براتیا گەلان کو ئۆجالان و پەکەکە لسەر دئاخڤن، دگەل باهۆزا هەڤرکی و بەرژەوەندیێن هێزێن هەرێمی و ناڤدەولەتی ژناڤ چوویە و چیێ دی ڤەگەرا وێ نەمومکینە.
ب کورتی ئەم دکارن ڤێ یەکێ باس بکین کو باسکرن ل براتیا گەلان ب تایبەتی براتیا دناڤبەرا کوردان دگەل گەلێن دن وەکە “ترک، عەرەب و فارس” کو ب درێژاهیا دیرۆکێ هێزا خوە ژ خوینا کوردان وەرگرتیە و هەرتم ب خوینا کوردان تێهنینە تو واتایەکا خوە نینە ئەڤ یەک ب تەنێ ژ بۆ خاپاندنا کوردان و خزمەتکرنا پەیمانا مللی یا ترکیێ یە.
هەر دەما گۆر دگەل پەزی بۆ برا وێ دەمێ وێ تورک ژی دگەل کوردان ببن برا، ئەڤ راستیەک پر تەحلە.
