ل سالرۆژا بەرهنگاربوونا په‌نجه‌شێرێ دا ل باشوورێ کوردستانێ، درێژترین قردێلە یا تایبەت ب نەخوەشییا په‌نجه‌شێرێ ل سەر چیایێ گووێژە ل سلێمانیێ هات نمایشکرن کو درێژاهییا وێ 7 هەزار و 288 مەتر بوون و ب ڤی ئاوایی ناڤێ سلێمانیێ چوو ناڤا پرتووکا گێنس ژ بۆ نومرێن پیڤانەیی دا، لێ بەلێ یا راست زۆر ژ مێژ پێویست بوو ناڤێ هنەک سەرکردەیێن ڤی باژێری کو د دەما خوە دا نشتیمانپەروەرترین سەرکردە خەلکێ ڤی باژاری بوون ژ بۆ خیانەتێ چووبانە د ناڤاپەرتووکا گێنسێ دا.
پاش ئەنجام دانا کۆنگره‌یا خوە ناکۆکیێن یەکێتییا نشتیمانی یا کوردستانێ رۆژ ب رۆژ د زێدە بوونێ دانە، هەر ژ بەر ڤێ یەکێ ل رۆژا 1/2/2020ان ئەنجوومەنا گشتی یا سەرکرداتییا یەنەکێ، ب هەموو ناکۆکیێن خوە ڤە جارەکا دی دەرکەتن، ئەڤ یەک ژی پاش ڤێ چەندێ هات کو «مالباتا کۆسرەت رەسوول و یێن نێزی دلێرێ سەید مەجید نێزیکن ژ وان عیماد ئەحمەد، عەدنان حەمە مینە و رەفعەت عه‌بدوللا و ئاسۆ مامەند و چەند کەسەکێن دی» جڤینا ئەنجوومەنا سەرکرداتییا یەنەکێ بایکۆت کری.
ناکۆکیێن مالباتا مام جەلال ب تایبەتی پاڤێل تالەبانی کو پشتی خیانەتا 16ی ئۆکتۆبەرێ بوویە کەسەکێ هەری دیار د ناڤا ڤێ پارتیێ دا دگەل هەموو بال و گرۆپێن دی یێن جودا دا ل سەر هەیکەلێ ڤێ پارتیێ، هەر هه‌موو ل سەر یەک هەلوه‌ستن کو پێویستە هەیکەلێ یەکیتیێ د ناڤبەرا بالێن جودا یێن وێ دا ل سەر بنەمایێ هەڤپشکی و دادپەروەریێ بیت، نەک مالا مام جەلال پۆستێن بلند ژ بۆ خوە ببه‌ن و یێن دی بێ پۆست بمینن.
جوداهییا سەرەکی یا د ناڤبەرا بالێن جودا یێن یەنەکێ دا، پاش کۆنگره‌ی و پەیدابوونا جۆرە غرۆرەکا بێ وێنه د مالباتا تالەبانی دا ب زەلالی هات دیتن، مالباتا تالەبانی ژ بلی کو دەستێ خوە دانایە سەر هەموو تشتەکی د ناڤا یەنەکێ دا ئەڤجا ژ ئابوورا ڤێ پارتیێ بگرە هه‌تا دگه‌هیته دەزگەهێن ئەمنی، نها ژی دخوازن ژ بلی وان چ کەسەکێ دی پۆستێ هه‌ڤسه‌رۆكێ گشتی یێ ڤێ پارتیێ وەرنەگریت، لێ بەلێ ئەڤ یەک بوو سەدەم کو ناکۆکییا د ناڤبەرا بالێن یەنەکێ دا پتر دیار ببن ژ بەر کو مالباتا کۆسرەت رەسوول عەلی و عیماد ئەحمەد و گرۆپا کەرکووکێ و عەدنان حەمەی مینە داخوازا پۆستا هه‌ڤسه‌رۆكێ گشتی یێ یەنەکێ دکه‌ن و ڤی پۆستی ب مافێ خوە دزانن.
پاڤێل و لاهۆر ئاماده نینن ته‌نازولێ بۆ هه‌ڤدو بكه‌ن
ناکۆکیێ یەنەکێ پاش ئەنجامێن کۆنگرەی و دیاربوونا لاهۆر شێخ جەنگی وەک کەسێ یەکەم پتر بوون، ب ئاوەیەکێ وه‌ها کو پاش کۆنگرەی د ناڤبەرا هەر یەک ژ «باڤێل تالەبانی و پسمامێ وی لاهۆرێ شێخ جەنگی» گه‌هشتییه ئاستەکێ هەری کێم کو ئەم دکارین ببێژین گه‌هشتنه ئاستا سفرێ، چ کەس ژ ڤان ئامادە نینە تەنازۆلێ ژ بۆ کەسێ دی بکەت ل سەر پۆستێ سەرۆکێ یەنەکێ.
ئەڤ ناکۆکیێن د ناڤبەرا بالێن جودا یێن یەنەکێ دا کو وەکە ئێشا په‌نجه‌شێرێ ژ بۆ گەلێ کورد دهێت حەساب کرن، ناکۆکیێن نوو نینن، سەرکردەیێن ڤێ پارتیێ هەر ژ دەما کو د ناڤا پارتییا دەمۆکرات یا کوردستانێ دا بوون ژ بۆ ب دەست خستنا پلە و پۆستان نەک جارەکێ بەلکو ب سەدان جاران خیانەت ل دۆزا کوردان کرییە، یێن کو بووینە دارێژەرێن خیانەتا 16ێ ئۆکتۆبەرێ هەر کورێن وان سەرکردەیێن یەنەکێ نە کو ل سالا 1966ێ دا مەزنترین خیانەت ل کوردان کری و بووینە جاشێن رژێما بەغدایێ و ل دژی ولاتپارێزان راوەستاین.
به‌را ئەنجام دانا کۆنگره‌یێ یەنەکێ، بالێ دژبەرێ بنەمالا تالەبانی ژ بۆ کێمکرنا دەستهه‌لاتا ڤێ مالباتێ هەژمارەک ژ مەدیا و رۆژنامە و سازیێن رۆشەنبیری یێن سەر ب ڤێ مالباتێ د ناڤا یەنەکێ دا دائێخستن، هه‌تا كو بکارن رۆلا وان د کۆنگرەیا 4ێ یا یەنەکێ دا کێم بکن، لێ بەلێ ئەڤ پلانا وان سەرکەفتن نه‌ئینا ژ بەر کو ڤێ مالباتێ دەستێ خوە دانایه سەر هەموو جۆمگەیێن سەرەکی د ناڤا ڤێ پارتیێ دا.
بابێن وان کەسێن کارەساتا 16ێ ئۆکتۆبەرێ ب سەرێ کوردان ئینای پێش بوویەرێن 31ێ ئابێ سپایێ پاسدارێن ئیرانێ ئینابوون سەر هەولێرێ و پەرلەمانێ کوردستانێ داگیر کربوو، هێزێن پارتییا دیمۆکراتا ئیرانێ خستن ژێر رەحما تۆپ وتانکێن رەژیما ئیرانێ، سوپایێ پاسداران ئینابوو هەلەبجە و بوونە سەدەما کێمیاباران کرنا ڤی باژارێ کوردان، پاش نسکۆیا شۆرشا گۆلانێ ل دەما پێشمەرگه‌یان دخواست دەرباسی ئیرانێ ببن، بابێن خائینێن 16ێ ئۆکتۆبەرێ مەفرەزە دانان و پێشمەرگە شەهید کرن، ل ئەنفالێن سالا 1988ێ دا ڤان خائینان خالێن پشکنینێ ل دەشتا کۆیێ و دۆلا جافایەتی گەرمیان دانان و رێگری ل گوندیان کر کو دگەل خەلکێ باژاران برەڤن و نەهێن ئەنفالکرن.
بال بالانێ و ناکۆکیێن د ناڤ یه‌كێتیێ دا بوویە په‌نجه‌شێر ل سەر جەسەدێ ولاتەکێ داگیرکری
بال بالانێ و ناکۆکیێن د ناڤا یەنەکێ دا کو بوویە په‌نجه‌شێره‌ك ل سەر جەسەدێ ولاتەکێ داگیرکری ژ بۆ ب دەستخستنا پلە و پۆستان و پاره‌ی تشتەکێ دیرۆکی یە کو نها ژ بۆ ئەندامێن مالباتا ئیبراهیم ئەحمەد و جەلال تالەبانی مای ئەڤ مالباتە و بالێن گرێدایی وێ د ناڤا یەنەکێ دا حازرن ژ بۆ ب دەست خستنا ڤان تشتان هەر خیانەتەکا کو ناهێت هزرا مرۆڤی ئەنجام بدن.
هەژار مۆکریانی رەحمەتا خوەدێ لێ بیت د پەرتووکا خوە یا ب ناڤێ «چێشتی مجێور» دا دبێژیت: جارەکێ هنەک ژ پێشمەرگەیان ژ بۆ جەنەرال «مستەفا بارزانی» ڤەگەراند کو دەما پێشمەرگەیان ل دەردۆرێن هەولێرێ دیتی ب هەزاران ترومبێلێن سەربازی و تۆپ و تانکێن رژێما ئیراقێ به‌ر ب بارزان دچن، هەر هەموو دکه‌نه گری و هەوارا خوە د به‌ن جەم ئیبراهیم ئەحمەد و ژێرە دبێژن، ئەڤ كه‌نگی شەرەفە برایێن مە بهێن کوشتن و ئەم ژ بۆ هاریكارییا وان نەچین و وان ژ مرنێ رزگار نەکه‌ین؟ ئیبراهیم ئەحمەد د بەرسڤا وان پێشمەرگەیان دا دبێژیت: هوون نزانن! گەر بارزانی نه‌مینیت، سەرکرداتییا پارتیێ دێ بیته یەک، ئەڤجا ئەمێ وێنەیێ بارزانی وەکو شەهید ل بازاران بفرۆشین و پاره‌یه‌كێ هەری باش ب دەست خوە ئێخین!
ژ بۆ کێم کرنا ئالۆزی وناکۆکیێن د ناڤا بالێن جودا یێن یەنەکێ ب تایبەتی بالێن خودان هێز و تاکو یەنەکە بشێت هەری کێم دوو بالان نێزی هەڤ بکەت و رێكێ ل همبەر شەرێ د ناڤبەرا وان دا بگریت، ئەنجوومەنا سەرکرداتییا یەنەکی بریار ل سەر سیستەما هەڤسەرۆکاتیێ دا، ب ڤی رەنگی ژی بریارە کو دو کەس ژ بالێن جودا یێن ڤێ پارتیێ ببن هەڤسەرۆکێن یه‌نه‌كێ، لێ پرسیارا كو ل ڤێرێ سەرهلدده‌ت ئەڤەیه، گەلو سیستەما هەڤسەرۆکاتیێ دێ بیته جهێ رازیبوونا هەموو بالێن یەنەکێ؟ ئه‌رێ هه‌ڤسه‌رۆكاتیێ د ناڤ یه‌كێتیێ دا دێ بیته ئه‌گه‌را چاره‌سه‌رییا وێ په‌نجه‌شێرا ڤێ حزبێ كوردستان پێ تووش كری؟
بەلێ ب راستی یه‌كێتی و په‌نجه‌شێرا د ناڤ یه‌كێتیێ دا كو ب ئه‌گه‌را بالێن جودا و داخوازیێن نەرەوا کو نها بوویە په‌نجه‌شێر ژ بۆ هەموو کوردستانێ، پێدڤییه بچیته د ناڤ پەرتووکا گینس یا نومرەیێن پیڤانەیی دا ل جیهانێ.
