سه‌رۆكێ هه‌رێما باشوورێ كوردستانێ ئیرۆ په‌یامه‌ك د سالڤه‌گه‌را ده‌ستپێكرنا سه‌رهلدانا گه‌لێ باشوور دا به‌لاڤ كر و تێدا گۆت: سه‌ركه‌تنا سه‌رهلدانێ ژ ئه‌نجاما قوربانیدانا هێزێن پێشمه‌رگه و كوڕێن ولات، هه‌روه‌ها یه‌كرێزییا ئالیێن سیاسی و ته‌ڤاهییا پێكهاته‌یێن كوردستانێ بوو.
سه‌رۆكێ هه‌رێما باشوورێ كوردستانێ گۆت: سه‌ركه‌تنا سه‌رهلدانێ ب ده‌ستكه‌فته‌ك ژ بۆ هه‌ر تاكه‌كێ كوردستانێ تێ هه‌ژمارتن.
ده‌قێ په‌یامێ
جەماوەرێ سەربلند و خوەراگرێ کوردستانێ
ب ھەلکەفتا بیست و نەھەمین سالڤەگەرا راپەرینا ب روومەت یا ئادارا 1991ێ، گەرمترین پیرۆزباھیێ ل مالباتێن سەربلندێن شەھیدان و پێشمەرگەیێن قەھرەمان و ھەموو کوردستانیان ل ناڤخوە و دەرڤەیێ کوردستانێ دکه‌م.
راپەرین کو یەک ژ سەروەریێن مەزنێن دیرۆکا گەلێ مەیە، دەربرینا باوەری و داخوازا گەلێ کوردستانێ یا ژ بۆ ژیانەکی ئازاد و سەرفرازانە و رەتکرنا ستەم و زۆرداریێ بوو. کەد و خەبات و قوربانیدانا ھێزێن پێشمەرگە و جوانێن گەل و یەکیتی و یەکرێزیا ئالیێن سیاسی و پێکھاتان و ھەموو خەلکێ کوردستانێ بوو. پاراستنا دەستکەفتان ژی، ئەرک و بەرپرسیاریا ھەموو ئالیان و پێکھات و ھەموو تاکە کەسەکی کوردستانە و وەفاداریانە ژ بۆ گیانێ پاکێ شەھیدێن مە یێن قەھرەمان و ھەموو قوربانیێن رێیا رزگاریا مەیە.
کوردستانیێن عەزیز
گیانێ خوەراگری و بەرخوەدانا وە ژ بلی وێ یەکێ کو وە لێبۆرین یێ ل راپەرینێ دا نیشاندا، ھەمان ئەو کولتوورا مرۆڤدۆستانەیە کو ئیلھامبەخش و نەخشەرێیا ھەموو بەرخوەدان و شۆرەشێن کوردستانێ ب راپەرینێ ڤە ژی بوویە. خەباتا وە، ھەردەم ھلگرێ باوەری و نەریت و بھا و جیھانبینیەکی بلند بوویە کو ھێژایی ئەوەنە نفش ب نفشا ڤی گەلی، شانازیێ پێڤە بکه‌ن. ئەوە راپەرین و داخوازا وە بوو خویاکر کو زەحمەتە ھیچ زەبر و زەنگ و سەرکوتکاریەک بکارێ روومەت و داخوازا گەلێ کوردستانێ ژ بۆ ژیانەکی سەرفرازانە و ئارمانجێن وێ یێن نشتمانی بشکینە.
کوردستانیێن خوەشتڤی
راپەرین بەلگەیا زیندی یا وێ راستیێیە کو یەکرێزی و تەبایی یا د ناڤبەرا ئالیان و پێکھاتێن کوردستانێ و ئاشتەڤایی یا ناڤخوەیی، ھەردەم گەلێ مە بەرەڤ سەرکەفتن و سەرفرازیا زێدەتر ڤە بریە. ژ بۆ وێ یەکێ ژ بۆ پێکانینا ھەموو ئارمانجێن مە یێن نشتمانی و مسۆگەرکرنا ژیانەکێ ھێژان ب خەبات و قوربانیێن گەلێ مە و پاشارۆژەکە گەشتر ژ بۆ نفشا مە، د ڤێ ھەولا ھەموو ئالیان و پێکھاتان و ھەر تاکە کەسەکی کوردستانێ ل خزمەتا زێدەتر ب ھێزکرنا گیانێ تەبایی و بنگەھێن پێکڤەژیانێ و لێبۆرین و ئاشتیخوازیێ دا بێ.
بلا بیرانینا راپەرینێ و ئیرادەیا مە، ووزە و ئەنەرژیا زێدەتر ژ بۆ یەکرێزی و تەبایی و خزمەتکرنا گەل و وەلات ببەخشێ.
بلند و ب روومەت بیت سالڤەگەرا راپەرینا مەزنا ئادارا 1991.
سلاڤ ژ بۆ گیانێ پاکێ شەھیدێن راپەرین و ھەموو شەھیدێن کوردستانێ.
نێچیرڤان بارزانی
سەرۆکێ ھەرێما کوردستانێ
4/3/2020
