نێچیرڤان بارزانی ملیار دینار بۆ لێقه‌ومایێن دهۆكێ ته‌رخان كرن

نێچیرڤان بارزانی ملیار دینار بۆ لێقه‌ومایێن دهۆكێ ته‌رخان كرن

سه‌رۆكێ هه‌رێما باشوورێ كوردستانێ ئیرۆ راگه‌هاند، ئه‌وێ دووڤچوونێ ژ بۆ ره‌وشا لێقه‌ومایێن  له‌هی و بارانێن پارێزگه‌ها دهۆكێ كه‌ن و بودجه‌یه‌كا بله‌ز ژ بۆ دهۆكێ ته‌رخان كر.

پشتی نیڤرۆ ئیرۆ رۆژا پێنچشەمی 19/3/2020ێ د پەیوەندیەکا تەلەفوونی دا ل گەل فەرھاد ئەترووشی پارێزگەرێ دھۆکێ، نێچیرڤان بارزانی ژ بلی سەرخوەشی و ھەڤخەمیا خوە یا ژ بۆ مالبات و کەسوکارێن وان دو قوربانیێن کو ژ ئەنجاما لەھیا سنۆرێ پارێزگەھێ ل سێمێلێ و زاخۆ جانێ خوە ژ دەست دای، ب ھووری دووڤچوون و پرس ژ رەوشا لێقەومایان كر.

نێچیرڤان بارزانی هه‌روه‌ها پرسا تەخمینا وێ زه‌ره‌ و زیانا ب وه‌لاتییان كه‌تی و چاوانییا قه‌ره‌بوویا وان ژ پارێزگه‌رێ دهۆكێ كر.

سەرۆکێ ھەرێما کوردستانێ، هه‌روه‌ها پشتگری ژ بۆ کارێ دامودەزگەھێن پەیوەندیدار یێن ژ بۆ هاوار چوونا لێقەومایان دوپات کر و بریار دا بودجه‌یه‌كا بله‌ز ژبۆ هاریكارییا لێقه‌ومایان ب قه‌بارێ یه‌ك ملیار دیناران ژبۆ پارێزگه‌ها دهۆكێ بێ ته‌رخان كر.

ژ ئالیێ خوە ڤە پارێزگەرێ دھۆکێ، ژ بۆ خەمخوری و ب سەرکرنا رەوشا لێقەومایان و پارێزگەھێ، سپاسی سەرۆکێ ھەرێما کوردستانێ کر.