چاڤكانیێن «پێگه‌ها داركا مازی» ل باشوورێ كوردستانێ پێزانێنن گرنگ ل ده‌ربارا لڤینێن په‌كه‌كێ یێن ڤێ حه‌فتیێ ل ده‌ڤه‌را به‌رواری بالا ب ده‌ست خستنه، كانێ چاوا په‌كه‌كێ باره‌گه‌هێن خوه ڤه‌گوهاستنه ناڤا گوندان و گه‌ف و هۆشداری ل ئاكنجیێن وان گوندان و هه‌روه‌ها وی خه‌لكێ دهۆكێ كریه ئه‌وێ ژبه‌ر نه‌خۆشییا كۆرۆنایێ ره‌ڤین.
ل گۆر پێزانینێن تایبه‌ت یێن پێگه‌ها «داركا مازی»، په‌كه‌كێ ل ڤێ حه‌فتیێ بنگه‌هه‌كێ خوه ل ناڤا مالا وه‌لاتییه‌كێ گوندێ (ئاسه‌هێ) یێ سه‌ر ب ناڤچه‌یا كانی ماسێ ڤه دانایه، پاش چوونا خه‌لكه‌كێ زۆر یێ باژارێ دهۆكێ ژ بۆ ڤی گوندی كو ئه‌ڤ خه‌لكه ژ ترسا ڤایرۆسا كۆرۆنایێ ره‌ڤینه، ل رۆژا دوشه‌مبێ 23/3/2020ێ موختارێ گوندی ب ناڤێ (س) دگه‌ل هه‌ژماره‌كا ریهسپیێن گوندی چووینه وی باره‌گه‌هێ په‌كه‌كێ و داخواز ژێ كرییه كو باره‌گه‌هێ خوه ژ گوندی ده‌ربێخن.
موختارێ گوندی، ب ناڤێ ته‌ڤ ئاكنجیێن گوندێ خوه گۆتییه په‌كه‌كێ: «ژ به‌ر كو خه‌لكه‌كێ زۆر ژ دهۆكێ و ده‌ردوورا وێ هاتینه ناڤا گوندی و ئه‌ڤ خه‌لكه هه‌موو ژن و زارۆ و كه‌سێن سڤیلن، پێویسته هوون باره‌گه‌هێ خوه ژ گوندی ده‌ربێخن، ژ به‌ر كو ترس هه‌یه گوند بكه‌ڤیته به‌ر ئێریشێن ئاسمانی یێن ده‌وله‌تا داگیركار یا تركیێ و ل وی ده‌می ئه‌ڤ هه‌موو خه‌لكه دێ بنه قوربانی».
په‌كه‌كه بۆ موختارێ گوندێ ئاسه‌هێ: «ژ ڤێرێ وێڤه ئه‌م ل ڤێ ده‌ڤه‌رێ حاكمین و تو ژی نه‌مایه موختار و هه‌ره موهرا خوه ته‌سلیمی وی ئالی بكه یێ تو كرییه موختار»
چاڤكانیێن «داركا مازی» ئه‌شكه‌ره كرن، پاش ڤێ دیدارا موختار و ریهسپیێن گوندێ دگه‌ل په‌كه‌كێ ب 3 رۆژان، ئانكو ل شه‌ڤا 26/3/202ێ به‌رپرسیارێ بنگه‌هێ په‌كه‌كێ ل ئاسه‌هێ كو چه‌كداره‌كێ ب ناڤێ (دختۆر رووباره) ب سه‌ر مالا موختارێ گوندی دا گرتینه و گه‌ف لێ كرینه و گۆتینێ كو ئه‌و بنگه‌هێ خوه ژ گوندی ده‌رنائێخن.
هه‌روه‌ها (دختۆر رووبار) گۆتییه موختارێ گوندێ ئاسه‌هێ: «ژ ڤێرێ وێڤه ئه‌م ل ڤێ ده‌ڤه‌رێ حاكمین و تو ژی نه‌مایه موختار و هه‌ره موهرا خوه ته‌سلیمی وی ئالی بكه یێ تو كرییه موختار».
چاڤكانیێن «داركا مازی» پشت راست كرن كو (دختۆر رووبار) و هه‌ژماره‌كا چه‌كدارێن ل گه‌ل، وه‌ختا ب سه‌ر مالا موختاری دا گرتین و گه‌ف لێكرین، ریهسپیێن گوندی ل هه‌وارێ هاتن و هه‌گه‌ر ژ خه‌لكێ گوندی نه‌بایه، په‌كه‌كه دا موختاری ل گه‌ل خوه به‌ت.
ژ ته‌باخا سالا رابووری و پاش ده‌ستپێكرنا ئۆپه‌راسیۆنا ب ناڤێ (په‌نج) یا ده‌وله‌تا داگیركار یا تركیێ ل دژی په‌كه‌كێ ل ناڤا خاكا هه‌رێما باشوورێ كوردستانێ و دژواربوونا ئێریشێن ئاسمانی، په‌كه‌كه ژ بۆ كو خوه ژ ڤان ئێریشان بپارێزیت، لڤین، حه‌ره‌كه‌ت و بنگه‌هێن خوه ڤه‌گوهاستینه ناڤا گوندان، خه‌لكێ باشوور ژ ڤی كارێ په‌كه‌كێ تۆره و نه‌رازییه و ب به‌رده‌وامی داخوازێ ژێ دكه‌ن كو رێیا خوه نه ئینن ناڤا گوند و ئاقارێن وان ژ بۆ كو نه‌كه‌ڤن به‌ر هێرشێن ده‌وله‌تا تركیێ.
ژ ناڤه‌راستا سالا رابووری پێتر ژ 20 ولاتیێن باشوور ب ئه‌گه‌را په‌كه‌كێ شه‌هید و بریندار بووینه
ل گۆر ئامارێن فه‌رمی یێن حكوومه‌تا باشوورێ كوردستانێ، ژ ناڤه‌راستا سالا رابووری 2019ێ، پێتر ژ 20 كه‌سان ژ خه‌لكێ سڤیلێ گوندێن باشوورێ كوردستانێ، ب سه‌ده‌ما په‌كه‌كێ كه‌فتینه به‌ر ئێریشێن ده‌وله‌تا داگیركار یا تركیێ و شه‌هید و بریندار كه‌تینه.
پارتییا كاركه‌رێن كوردستانێ، سیاسه‌ته‌كا وه‌ها ل هه‌رێما باشوورێ كوردستانێ د مه‌شینیت، هه‌ر وه‌ختا كریزه‌ك چێدبیت، وێ كریزێ ب ده‌رفه‌ت ژ بۆ پیلانێن خوه یێن قرێژ بكاردئینیت، بێی كو گیان و سلامه‌تییا خه‌لكێ سڤیلێ باشوور ل به‌ر چاڤ بگریت، نێزیكبوونا وێ ژ گوندان ژی، ته‌نێ یه‌ك ئارمانج پێ هه‌یه، ئه‌و ژی به‌هانه‌یه‌كێ ژ بۆ ده‌وله‌تا تركیێ دروست بكه‌ت كو وان گوندان بۆردۆمان بكه‌ت و هه‌روه‌ها له‌شكه‌ركێشیێ ژ بۆ بكه‌ت، هه‌روه‌ها ژ بۆ كو خه‌لك وان گوندان چوول بكه‌ت، ئانكو سه‌ربوورا (شه‌رێ خه‌نده‌كان) ل باشوور دوباره بكه‌ت، چونكه خه‌ونا په‌كه‌كێ ئه‌وه گوندێن باشوورێ كوردستانێ وه‌ك یێن باكورێ وه‌لاتی چوول و وێران بكه‌ت.
كۆرۆنا ل ناڤ په‌كه‌كێ به‌لاڤه
گرێدای به‌لاڤبوونا ڤایرۆسا كۆرۆنایێ ژی، چاڤكانیێن «داركا مازی» ل رۆژێن رابووری سه‌راست كربوون كو ژبه‌ر هه‌ڤدیتنێن به‌رده‌وام یێن رایه‌دارێن په‌كه‌كێ و ئیرانێ ب تایبه‌ت ئه‌وێن ل باژارێن شنۆ و سه‌رده‌شتێ هاتینه كرن، ترسه‌ك هه‌یه كو ئه‌ڤ ڤایرۆس ل ناڤا رێخستنێ به‌لاڤه‌بوویه، هه‌روه‌ها هاورده‌كرنا په‌كه‌كێ ژ بۆ كه‌لوپه‌لێن خوه یێن خوارنێ و پێدڤیێن خوه ژ ئیرانێ بێی چاڤدێری و پشكنین، نووچه‌یا به‌لاڤبوونا ڤێ ڤایرۆسێ ل ناڤ رێخستنێ زێده‌تر نێزیكی راستیێ دكه‌ت.
