ل خواكوركی و باسیان 5 گه‌ریلایان جانێ خوه‌ ووندا كر

باله‌فرێن ده‌وله‌تا داگیركار یا تركیێ، ئیرۆ جاره‌كا دن ناڤچه‌یێن سینۆری یێن هه‌رێما باشوورێ كوردستانێ بۆردۆمان كرن، زرارێن جانی یێن مه‌زن ب پارتییا كاركه‌رێن كوردستانێ خستن.

چاڤكانیێن پێگه‌ها «داركا مازی» ل باشوورێ كوردستانێ ده‌ست نیشان كرن، ئیرۆ رۆژا دوشه‌می 6-4-2020ێ، باله‌فرێن جه‌نگ یێن ده‌وله‌تا داگیركار یا تركیێ، لڤین و حه‌ره‌كه‌تێن په‌كه‌كێ ل ناڤچه‌یێن «خواكورك و باسییان» هه‌ده‌ف كرن و زرارێن مه‌زن گهاندن گه‌ریلایان.

د ئێریشان ده‌، 5 گه‌ریلایان جانێ خوه‌ ووندا كر، هه‌روه‌ها هه‌ژماره‌كه‌ پێگه‌هێن په‌كه‌كێ ئیمحا كرن.

ل گۆر پێزانێن چاڤكانیێن پێگه‌ها «داركا مازی»، ژ ده‌ستپێكا مه‌ها نیسانا ئیسال 2020ێ، په‌كه‌كێ پێتری 10 گه‌ریلایێن خوه‌ ل ناڤچه‌یێن جودا یێن هه‌رێما باشوورێ كوردستانێ ژ ده‌ست دا نه‌، لێ به‌لێ مه‌دیایا په‌كه‌كێ چ زه‌لالكرنه‌ك ل ده‌ربارا ژ ده‌ست دانا وان گه‌ریلایان نه‌دانه‌.