ئیران ب رێیا «په‌ژاكێ و یه‌نه‌كێ» بزاڤا ڤه‌گه‌راندنا ناسر ره‌زازی دكه‌

ئیران ب رێیا «په‌ژاكێ و یه‌نه‌كێ» بزاڤا ڤه‌گه‌راندنا ناسر ره‌زازی دكه‌

سیامه‌ند موعینی سه‌رۆكێ په‌ژاكێ و جه‌لال جه‌لالیزاده‌ ژ بۆ ڤێ مه‌به‌ستێ ل گه‌ل ره‌زازی جڤیانه‌ و تێ گۆتن كو كو والیێ سنه‌ هێسانكاریێ ژ بۆ دكه‌

كۆمارا ئیسلامییا ئیرانێ دخوازه‌ ته‌شهیرێ ب ناڤدارێن كورد بكه‌

جه‌لال جه‌لالیزاده‌، ئه‌شكه‌ره‌ كر كو حكوومه‌تا ته‌هرانێ ب رێیا والیێ سنه‌، بزاڤێن ڤه‌گه‌راندنا ناسر ره‌زازی ژ بۆ رۆژهلاتا كوردستانێ ده‌ست پێ كرنه‌، ل گۆر وان پێزانینێن ب ده‌ست پێگه‌ها «داركا مازی» كه‌تنه‌، ئیران ژ بلی یه‌كێتییا نشتیمانییا كوردستانێ، ب رێیا سیامه‌ند موعینی، سه‌رۆكێ په‌ژاكێ داخواز ژ ناسر ره‌زازی كرییه‌ ڤه‌گه‌ریته‌ ئیرانێ و وه‌كه‌ چاوا ل سالێن به‌رێ مه‌زهه‌رێ خالقی ڤه‌گه‌ری یه‌ و چ گرفته‌ك ژ بۆ نه‌هاتنه‌ چێكرن!! له‌وما ره‌زازی ژی دكاره‌ بێ كێشه‌ ڤه‌گه‌ریته‌ باژارێ خوه‌.

كۆمارا ئیسلامییا ئیرانێ، د درێژاهییا ستراته‌ژییا خوه‌ یا شه‌رێ نه‌رم و شه‌رێ ده‌روونی ده‌ ل دژی هزرا رزگاریخواز و هه‌ستا نه‌ته‌وه‌ییا كوردان، ده‌مه‌كه‌ كه‌ساتیێن هونه‌ری یێن كوردستانی ژ بۆ خوه‌ كرنه‌ ئامانج و دخوازه‌ شكۆیا هونه‌رمه‌ندێن كورد بشكینه‌، ژ هه‌یبه‌تا سروود و ئاوازێن كوردی كێم بكه‌ و ده‌نگێن بلند و هاوارێن رزگاریخوازێن كورد بێ بها بكه‌.

ده‌مه‌كه‌ حكوومه‌تا ته‌هرانێ، بزاڤێن خوه‌ یێن ده‌ستوه‌ردانێ د هونه‌را كوردی ده‌ زێده‌ كرنه‌ و ئه‌و دخوازه‌ ده‌نگێ هۆنه‌را كورد نه‌شرین بكه‌ كو ل ده‌مه‌كێ ب گه‌وریێن تژی و ب هاوارێن ئازادیێ لاوێن كورد به‌ر ب خه‌بات و سه‌نگه‌رێ به‌رگریێ ژ ماف و كه‌رامه‌تا كوردان هان ددان.

جیێ داخێ ئه‌ڤه‌ كو هنه‌ك رێخستنێن كوردستانی یێن دۆستێن ئیرانێ ژ بۆ ڤێ ئامانجێ ئالیكارییا ته‌هرانێ دكن

كۆمارا ئیسلامییا ئیرانێ، ل درێژاهییا ستراته‌ژییا خوه‌ ژ بۆ ئامانج گرتنا كه‌ساتی و هێمایێن نه‌ته‌وه‌یی یێن كوردستانێ، ئه‌ڤێ جارێ نیشانا خوه‌ ل كه‌ساتیێن هۆنه‌را كوردی گرتییه‌ و دخوازه‌ ب فێل و ب ئالیكارییا خیانه‌تكارێن كورد هه‌یبه‌تا هونه‌رمه‌ندێن قادا نه‌ته‌وه‌ییا كورد تێك بده‌ و ب هه‌رفینه‌، دخواز ب ڤه‌خواندنا وان ژ بۆ ولاته‌كێ داگیركار، ئه‌ڤێ كه‌لها مۆرالێ و ئیرادێ ژناڤ ببه‌، ئه‌و كه‌لها كو ب سالانێن دوور و درێژ یێن خه‌بات و به‌رخوه‌دانێ د رێیا رزگارییا نه‌ته‌وه‌یی ده‌ هاتییه‌ ئاڤا كرن.

د ڤێ ده‌ربارێ ده‌، هه‌ر چ یا ژ ده‌ستێ كۆمارا ئیسلامی و داگیركارێن دن یێن كوردستانێ تێ ژ بۆ دژاتی كرنا ماف و كه‌رامه‌ت و كلتوورێ كوردی و ئاسمیله‌كرنا وی و بۆ ژناڤ برنا خاكا كوردستانێ، دێ ئه‌نجام بدن، تشته‌ك ئاسایی یه‌ چونكه‌ ژ دوژمنێ غه‌ددار و داگیركار هه‌ر ئه‌ڤ یه‌ك تێ چاڤه‌رێ كرن، لێ به‌لێ تشتێ كو جیێ داخێ ئه‌ڤه‌ كو چ مرۆڤه‌كێ نیشتیمان په‌روه‌ر نكاره‌ ب هێسانی ڤێ یه‌كێ به‌رچاڤ وه‌رگره‌ كو هنه‌ك رێخستنێن كوردستانی یێن دۆستێن ئیرانێ ژ بۆ ڤێ ئامانجێ ئالیكارییا ته‌هرانێ دكن.

د داوی پیلان ده‌، وها دیاره‌ كو كۆمارا ئیسلامییا ئیرانێ، بزاڤێن خوه‌ ژ بۆ د سه‌ردا برن و شكاندنا كاك ناسر ره‌زازی، هونه‌رمه‌ندێ دیارێ  كوردستانێ دكه‌ و ل گۆر چاڤكانییان ژ بۆ ڤان بزاڤان ژ بلی یه‌نه‌كێ كو به‌رده‌وام پیلانێن نه‌رم یێن ئیرانێ بجی دكه‌ و نێزیكاتییه‌كه‌ باش ل گه‌ل ناسر ده‌ هه‌یه‌، هنه‌ك ئالیێن كوردی ژی كه‌تنه‌ د ناڤا بزاڤێن مه‌زن ده‌ ژ بۆ كو ڤێ پیلانا ئیرانێ بجی بكن.

په‌ژاكێ و یه‌نه‌كێ ڤه‌خوانده‌ قه‌ندیلێ و ل ور بزاڤا رازی كرنا وی ژ بۆ ڤه‌گه‌رینێ بۆ ئیرانێ كرنه‌

یه‌ك ژ وان ئالییان پارتییا ژیانا ئازادی كوردستان «په‌ژاك» ـه‌ كو وه‌كه‌ تایێ رۆژهلاتا كوردستانێ یا په‌كه‌كێ تێ ناس كرن، ل گۆر چاڤكانیێن پێگه‌ها «داركا مازی»،  ئیران ژ بلی یه‌نه‌كێ ب رێیا هه‌ڤپه‌یمانێن دن ئانكو په‌ژاكێ، بزاڤێن رازی كرنا هونه‌رمه‌ند ره‌زازی ژ بۆ ڤه‌گه‌رینێ ژ بۆ رۆژهلاتا كوردستانێ كرنه‌، په‌ژاكێ ژ بۆ ڤێ ئامانجێ ره‌زازی ڤه‌خوانده‌ قه‌ندیلێ و سیامه‌ند موعینی سه‌رۆكێ په‌ژاكێ ل گه‌ل ره‌زازی جڤیایه‌ و ئه‌ڤ بابه‌ت ل گه‌ل ده‌ نیقاش كریه‌ و د وه‌ختا مانا ره‌زازی دا ل قه‌ندیلێ په‌كه‌كێ و په‌ژاكێ بزاڤا رازی كرنا ره‌زازی كرنه‌.

كرێگرتیێن ئیرانێ ل رۆژهلاتا كوردستانێ په‌یوه‌ندی ب ره‌زازی كرنه‌

هه‌موه‌خت ژ ئالییه‌كی دن ڤه،‌ كۆمارا ئیسلامییا ئیرانێ، ب رێیا كرێ گرتیێن خوه‌ ل رۆژهلاتا كوردستانێ، په‌یوه‌ندی ب ناسر ره‌زازی كرییه‌، جه‌لالی جه‌لالیزاده‌، یه‌ك ژ كرێگرتیێن ره‌ژیما ئیرانێ یه‌ كو كه‌سه‌كه‌ باوه‌رداره‌ و تێ گۆتن كو ل گه‌ل گرۆپا «ده‌عوه‌ت و ئیسلاح»ێ ژی په‌یوه‌ندیێن باش هه‌نه‌، یه‌ك ژ وان كه‌سانه‌ كو ژ ئالیێ ره‌ژیما ئیرانێ ڤه‌ هاتییه‌ راسپاردن ژ بۆ كو په‌یوه‌ندیێ ب ره‌زازی بكه‌ و پرسا ڤه‌گه‌رینا وی ژ بۆ ئیرانێ ل گه‌ل ده‌ نیقاش بكه‌.

جه‌لال جه‌لالیزاده‌ یه‌ك ژ نوونه‌رێ به‌رێ یێ ئه‌نجوومه‌نا شوورا یا ئیسلامییا ئیرانێ و ژ كه‌سێن ناسیار یێن بالێ ریفۆرمخوازێن حكوومه‌تا ته‌هرانێ یه‌، ل پارێزگه‌ها سنه‌ ل پێگه‌ها خوه‌ یا تایبه‌ت یا تۆرا ئینستاگرامی وێنه‌یه‌كێ خوه‌ ل گه‌ل هونه‌رمه‌ندێ ب ناڤ و ده‌نگێ كوردستانێ ناسر ره‌زازی به‌لاڤ كرییه‌ و نڤیساندییه‌: «ئه‌ز پر ژ ناسر ره‌زازی حه‌س دكم، ژ به‌ر كو هونه‌رمه‌نده‌كی نه‌ته‌وه‌یی و كه‌سه‌كی ب ئه‌خلاقه‌ و خوه‌ ژ زیندانا حزباتیێ دوور خستییه‌».

پشتره‌ كۆمێنتێن ب مه‌به‌ست ل سه‌ر ڤێ پۆستێ هاتنه‌، یه‌ك ژ وان كۆمێنتان جه‌لالیزاده‌ نڤیساندییه‌: «ئاغایێ مورادی نیا یێ والیێ سنه‌ بزاڤێن ڤه‌گه‌راندنا ناسر ره‌زازی ژ بۆ ئیرانێ ده‌ست پێ كرنه‌ و خه‌باتا وی د ڤی واری ده‌ د دۆمه»‌.

جه‌لالیزاده‌ ل ده‌مه‌كێ به‌حسا ڤه‌گه‌راندنا ناسر ره‌زازی  و حه‌ز كرنا خوه‌ ژ بۆ ڤی هونه‌رمه‌ندی دكه‌ كو زۆر به‌لگه‌یێن ئالیكارییا ناڤبووری و برایێ وی ل گه‌ل «خه‌لخالی» بكوژێ زیندانیێن كورد ل كوردستانێ و ناڤچه‌یێن ئیرانێ، دیرۆكا ئالیكاریێن ناڤبووری ل گه‌ل ره‌ژیمێ ژبۆ ده‌ستپێكا ده‌ستبكاربوونا ده‌ستهلاتا كۆمارا ئیسلامی ڤه‌دگه‌رن، هه‌گه‌ر ب هووری ل نڤیساندنین ناڤبووری مێزه‌ بكین، دێ ب هێسانی ئه‌شكه‌ر بیت كو ئه‌و گه‌له‌ك بزاڤان دكه‌ ژ بۆ سه‌رخستنا جه‌نگا ده‌روونی یا ئیرانێ ل كوردستانێ دكه‌.

ئیرانێ بزاڤێ دكه‌ ل پارتیێن وه‌لات پارێزه‌ بده‌ و وان ب چاڤكانییا گرفتێن كوردستانێ بده‌ ناس كرن

ره‌ژیما ئیرانێ فام دكه‌ كو هه‌بوونا پارتییا نه‌ته‌وه‌یی دێ ببه‌ سه‌ده‌ما لهه‌ڤ كۆم كرنا خه‌لكێ نه‌ته‌وه‌خوازێ كورد، ئه‌ڤ یه‌ك ژی هه‌م دێ هێزا وان ل به‌رانبه‌ر دوژمن زێده‌ بكه ‌و هه‌م ژی رۆشنگه‌ری و فكرا نه‌ته‌وه‌یی ل ناڤا جڤاكی دێ ب سه‌ر ئێخیت، هه‌موخت هێزا وان دێ ل به‌رانبه‌ر پیلانێن داگیركاران پێتر به‌، هه‌ر ژ به‌ر ڤێ سه‌ده‌مێ، ئیران بزاڤێ دكه‌ ل پارتییان بده‌ و وان بكه‌ چاڤكانییا گرفتێن كوردستانییان و ل پێش چاڤێن گه‌ل وان نه‌شرین بكه‌.

ئه‌ڤ هه‌ول ل به‌شێن دن یێن كوردستانێ ژی هه‌نه‌ و ب تایبه‌ت ل باشوور، ولاتێن داگیركار دخوازن باوه‌رییا جڤاكا كوردی ب پارتیێن وان لاواز بكه‌ و نه‌مینه‌، ژبه‌ر كو ب ڤێ رێكێ دێ گه‌له‌ك ب هێسانی هێن ته‌په‌سه‌ر كرن و حه‌زا نه‌ته‌وه‌خوازان دێ هێسان تر هێت خه‌راب كرن و ژ ناڤ برن.

ده‌ستواژێ «زیندانا حزباتیێ» كو جه‌لالیزاده‌ د نڤیسا خوه‌ ده‌ بكارئانییه‌، بنگه‌ها خوه‌ ژ وێ ستراته‌ژییا ره‌ژیما ته‌هرانێ دگریت، هه‌گه‌ر نه‌ حزبایه‌تی د جیهانا سه‌رده‌م و مۆده‌رێن ده‌ ب واتایا رزگاری و پێشكه‌تنا جڤاكان تێ.

جه‌لالیزاده‌ هه‌ر وها نڤیساندییه‌: «ره‌زازی وه‌كه‌ وان كه‌سێن ل ده‌رڤه‌ی ولات، حه‌ز ژ خه‌به‌ردانێ، حورمه‌ت فرۆشی و توهمه‌تان ناكه‌»، مه‌به‌ستا جه‌لالیزاده‌ ئه‌ڤه‌ كو ببێژه‌، ئه‌وا شۆرشگێرێن كورد، ئۆپۆزسیۆن و دوژمنێن كۆمارا ئیسلامی ل ده‌رڤه‌ی ئیرانێ ل سه‌ر وێ ره‌ژیمێ باس دكن، ته‌نێ خه‌به‌رفرۆشی، توهمه‌تێن چێكری و نه‌راستن، ب كورتی جه‌لالیزاده‌ دخوازه‌ روویێ ئیرانێ و كارێن وێ یێن قرێژ سپی بكه‌».

جه‌لالیزاده‌ د داوییا نڤیسا خوه‌ ده‌ وه‌كه‌ كلتوورێ كه‌سێن به‌رژه‌وه‌ندی خواز، به‌حسا وێ یه‌كێ كرییه‌ كو مالباتا ناسر ره‌زازی ل وه‌ختا هلبژارتنێن رابووری پشتگری ل وی ئانكو ل «جه‌لالیزاده» ب خوه‌‌ كرنه‌، ئه‌ڤ یه‌ك ژبلی كو ریكلامه‌كه‌ دنه‌ جه‌لالیزاده‌ ژ بۆ خوه‌ دكه‌، وێ یه‌كێ ژی پێشان دده‌ كو كه‌سێن بایكۆتا هلبژارتنان كری چ باندۆره‌كا وان نه‌بوو، به‌ره‌ڤاژی مالباتا ره‌زازی باندۆره‌كه‌ باش و به‌شدارییه‌كه‌ باش د هلبژارتنێن كۆمارا ئیسلامییا ئیرانێ ده‌ هه‌بوو.

پرۆژه‌یا ڤه‌گه‌راندنا هونه‌رمه‌ندێن كورد به‌شه‌كه‌ ژ پرۆژێن مه‌زن یێن ده‌وله‌تا داگیركارا ئیرانێ

ئه‌ڤ ئه‌نالیزا كورت ل سه‌ر نڤیسا جه‌لالیزاده‌ وێ یه‌كێ باشتر زه‌لال دكه‌ كو پرۆژه‌یا ڤه‌گه‌راندنا هونه‌رمه‌ندێن كورد به‌شه‌كه‌ ژ پرۆژێن مه‌زن یێن ده‌وله‌تا داگیركارا ئیرانێ ل دژی گه‌لێ كورد، خه‌باتا وان یا ره‌وا، له‌وما ئه‌ركا هه‌ر كورده‌كی یه‌ به‌رهنگارییا ئه‌ڤان پیلانان بكه‌.

«مه‌زهه‌رێ خالقی» كه‌ته‌ ڤێ ته‌پكا ئیرانێ و ب ئالیكارییا خزمێن ئیرانێ یێن یه‌نه‌كێ سه‌رێ خوه‌ ته‌واند

ل سالا رابووری ل باژارێ سنه‌ یێ رۆژهلاتا كوردستانێ، كۆنفه‌ره‌نسه‌ك ب ناڤێ ناڤدارێن كورد هاتبوو ساز كرن و به‌شه‌ك ژ هونه‌رمه‌ندێن ناڤدار یێن كورد ژ بۆ كۆنفه‌ره‌نسێ هاتن ڤه‌خواندن، هه‌ر چه‌ند كو به‌شه‌كا زۆر یا هونه‌رمه‌ندان دروست به‌شدار نه‌بوون و ژ ئالیێ خه‌لكێ رۆژهلات ڤه‌ راستی ته‌شهیرێ بوون، میناك شاعرێ ناسیارێ كورد «جه‌لال مه‌له‌كشا»، لێ به‌لێ جیێ داخێ بوو هونه‌رمه‌ندێ كورد «مه‌زهه‌رێ خالقی» كه‌ته‌ ڤێ ته‌پكا ئیرانێ و ب ئالیكارییا خزمێن ئیرانێ یێن یه‌نه‌كێ، ئه‌و ب رێیا ده‌ریێ مه‌ریوانێ ب ئاوایه‌كی پری سه‌رشۆری و شه‌رمه‌زاری ڤه‌گه‌ری رۆژهلاتا كوردستانێ و به‌شداری كۆنفه‌ره‌نسێ بوو.

ئێقبالی یه‌ك ژ وان كه‌سان بوو كو پێشوازی ل مه‌زهه‌رێ خالقی كری، ئه‌ڤ كه‌س د خوه‌پێشاندنێن پاییزا رابووری ده‌ ل مه‌ریوانێ، بریارده‌رێ سه‌ره‌كه‌ یێ كوشتنا لاوێن خوه‌پێشانده‌ر یێن كورد بوویه‌ و ده‌ستێن وی ب خوینا ده‌هان لاوێن كورد سۆر بوونه‌.

هه‌موه‌خت «موراد نیا» یێ پارێزگه‌رێ سنه‌ كو كرێگرتیێ سه‌ره‌كه‌ یێ ره‌ژیما ئیرانێ یه‌ ژ بۆ ب جی كرنا پیلانێن وێ یێن جه‌نگا ده‌روونی، ئه‌ڤ كه‌س ل وه‌ختا خوه‌پێشاندانێن پاییزا رابووری ئه‌شكه‌ره‌ بوو كانێ چه‌ند دژه‌ كورده‌ و چه‌ند ل دژی حه‌زا رزگاریخوازێن گه‌له‌، ل ڤێره‌ پرس ئه‌ڤه‌، گه‌لۆ دبه‌ كه‌سه‌كه‌ وها كو ده‌ستێ خوه‌ ژ بۆ كوشتنا لاوێن كورد درێژ كربه‌ ل هه‌مان ده‌مێ دۆستێ هۆنه‌ر و كلتوورێ كوردی به‌؟، ئه‌رێ دبه‌ كه‌سێن كو باوه‌ر ژ ئاغایێ «مورادی» دكن ب كه‌سێن ئاقل و ژیر بهێن حه‌ساب كرن؟.

گه‌لێ كورد چاڤه‌رێ دكه‌ كو ره‌زازی ب پیلانێن ئیرانێ، په‌ژاكێ و یه‌نه‌كێ نه‌هێت خاپاندن

ل داویێ پێویسته‌ ئه‌ڤ یه‌ك وه‌ره‌ گۆتن كو لاو و گه‌لێ خه‌باتكارێ كوردستانێ چاڤه‌رێیا وێ یه‌كێ ژ ناسر ره‌زازی و هونه‌رمه‌ندێن دن یێن شۆرشگێر دكن كو ب ڤان بزاڤێن ئیرانێ نه‌هێن خاپاندن و دیرۆك و خه‌باتا خوه‌ یا نه‌ته‌وه‌یی نه‌كه‌نه‌ قوربانی هنه‌ك گۆتن و درویشمێن بریسقه‌دار و بێ ئه‌ساسێن فێلبازیێن ته‌هرانێ، ناسر ره‌زازی پێویسته‌ ئه‌و كورێ كوردستانی به‌ كو ئاماده‌ نه‌به‌ ل چ ده‌مه‌كێ و د چ ره‌وشه‌كێ ده‌ سه‌رێ خوه‌ ژ بۆ داگیركاران بته‌وینه‌، پر زه‌لاله‌ كو مفادارێن ڤه‌گه‌رینا كه‌ساتیێن هونه‌ری، ته‌نێ دوژمنێن گه‌لێ كوردن، چونكه‌ ژ ئالییه‌كی شكۆیا هونه‌را به‌رخوه‌دانێ و هونه‌رمه‌ندان دێ بهێته‌ شكاندن و ژ ئالییه‌كێ دن ڤه‌ گه‌لێ كورد دێ ژ هۆنه‌را كوردی دوور كه‌ڤه‌ ئه‌ڤ ژی دێ خزمه‌ته‌ك به‌ ژ بۆ پێڤاژۆیا ئاسمیله‌ كرنا نه‌ته‌وه‌ییا كورد.

پێویسته‌ یه‌نه‌كه‌ باش بزانه‌ كو ره‌ژیما ئیرانێ ل به‌ر لێڤا هه‌رفتنێ یه‌

پێویسته‌ ئالی و كرێگرتیێن كۆمارا ئیسلامییا ئیرانێ ژی ب تایبه‌ت په‌كه‌كه‌ و یه‌نه‌كه‌ ب باشی د ڤێ راستیێ بگه‌هن كو ره‌ژیما كه‌ڤنه‌په‌رستا ته‌هرانێ ل سه‌ر لێڤا هه‌رفتنێ یه‌ و هه‌ر پشتبه‌ستنه‌كه‌ ب ڤێ ره‌ژیمێ وێ مینا قوماركرنێ به‌ ل سه‌ر هه‌سپه‌كێ سكتی به‌ و ژبلی سه‌رشۆری و شه‌رمه‌زاریێ تشته‌كی دن ژ بۆ نابه‌، كۆمارا ئیسلامییا ئیرانێ پێویسته‌ باش فام بكه‌ كو گه‌لێ كورد ب ڤان بزاڤێن قرێژ ناهێت شكاندن و وه‌كه‌ مه‌زنان گۆتی هه‌ی هۆ هه‌ی هۆ، كوردستان ل كو ده‌رێ و سه‌ر ته‌واندن ل كۆ ده‌رێ!!