ته‌رۆریستێن داعشێ، ب ئالیكارییا «عه‌ره‌بێن هاورده» ده‌ست ئاڤێتنه سۆتنا زه‌ڤیێن ده‌خلودانێ جۆتكارێن كورد ل ناڤچه‌یێن 140ێ، به‌رپرسه‌كێ ناڤچه‌یێ ژی دبێژه: «ئه‌و ب رۆژ پۆلیسن و ب شه‌ڤ داعشی» نه.
ده‌مه‌كه ل ناڤچه‌یێن كوردستانی یێن ده‌رڤه‌ی ئیداره‌یا هه‌رێما باشوورێ كوردستانێ كو ب ناڤچه‌یێن 140ێ تێن ناس كرن، كریارێن ته‌رۆری چێدبن و كوشتنا هه‌مولاتیێن سڤیل زێده‌بوویه، ل سنۆرێ ناڤچه‌یا مه‌خموورێ چه‌ندین زه‌ڤیێن جۆتكارێن كوردان به‌را كو بێن دروین، هاتنه سۆتن.
كرمانج عه‌بدوللا، به‌رپرسیارێ لقا 23 یا پارتییا ده‌مۆكرات یا كوردستانێ، ل ده‌ربارا بوویه‌رێن ته‌رۆری یێن ناڤچه‌یێن كوردستانی داخوه‌یانی ژ مه‌دیایێ را دایه و دبێژه: «عه‌ره‌بێن هاورده كو پاش بوویه‌رێن 16ی ئۆكتۆبه‌را 2017ێ هاتنه ناڤچه‌یێن 140ێ، ل ڤێ داویێ ده‌ستێ خوه خستنه ناڤ ده‌ست ته‌رۆریستێن داعشێ، ب رۆژ ئه‌و وه‌كه هێزێن ئه‌وله‌هیێ كار دكن و ب شه‌ڤ ئالیكارییا ته‌رۆریستان دكن».
ده‌ست نیشان كر، ده‌مه‌كه ل سنۆرێ ناڤچه‌یا مه‌خموورێ زه‌ڤیێن هه‌مولاتی و جۆتكارێن كورد یێن ده‌خلودانی تێن سۆتن و سۆتنا وان ب كاره‌كی ب ئه‌نقه‌ست ب ناڤ كر و ته‌كه‌ز كر كو ئه‌ڤ عه‌ره‌بێن هاورده ئالیكارییا داعشێ دكن ژبۆ سۆتنا زه‌ڤیێن جۆتكارێن كورد.
كرمانج عه‌بدوللا ئه‌ڤ یه‌ك راگهاند و هه‌لوه‌ستا حكوومه‌تا فه‌ده‌رال یا ئیراقێ ره‌خنه كر كو نه ئالیكارییا خه‌لكێ ناڤچه‌یێن 140ێ دكه‌ت و نه رێ دده تیمێن ئاگرڤه‌مراندنێ یێن باشوورێ كوردستانێ ب وێ ئه‌ركێ رابن.
به‌رپرسیارێ لقا 23ێ یا په‌ده‌كێ دبێژه: «ناڤچه‌یا مه‌خموورێ خه‌ته‌ره‌كا زێده ل سه‌ره ب سه‌ده‌ما هه‌بوونا داعشێ، عه‌ره‌بێن هاورده ژی كو ب ئاوایه‌كی نه‌یاسایی هاتنه سه‌ر مولك و مالێن كوردان، ب رۆژێ ل گه‌ل هێزێن ئه‌وله‌هیێ كار دكن و ب شه‌ڤ هه‌مان ئه‌و كه‌سن ئالیكارییا داعشێ دكن».
